നീ അഭിനയം നിര്‍ത്തുമോ എന്ന് ചോദിച്ച് അമ്മ കരഞ്ഞു, ആള്‍ക്കാരുടെ മനസില്‍ ഞാനൊരു ക്രൂരനായി: ഡിസ്‌കോ രവീന്ദ്രന്‍

ഞാന്‍ തമിഴ് സിനിമയിലൂടെയാണ് വന്നത്. അവിടെ വന്‍ വിജയങ്ങള്‍ നേടിയതിനാല്‍ എന്നെയൊരു തമിഴ് നടനായാണ് പിന്നീട് കണ്ടത്. അന്ന് ഇന്ത്യയിലെ തന്നെ വലിയ നിര്‍മ്മാണ കമ്പികളായ എവിഎം, ദേവര്‍ ഫിലിംസ്, വിജയവാഹിനി തുടങ്ങിയവര്‍ക്കൊപ്പമാണ് ഞാന്‍ സിനിമകള്‍ ചെയ്തത്. ഐവി ശശി, ഹരിഹരന്‍, കെ ബാലചന്ദര്‍, എസ്പി മുത്തുരാമന്‍ തുടങ്ങിയവര്‍ക്കൊപ്പം സിനിമ ചെയ്യാനായി. ഐവി ശശിയുടെ സിനിമയിലൂടെയാണ് മലയാളത്തിലെത്തുന്നതെന്നാണ് രവീന്ദ്രന്‍ പറയുന്നത്.

പിന്നീട് മദ്രാസിലെ മോന്‍ എന്ന പടം വലിയ ഹിറ്റായി മാറി. യഥാര്‍ത്ഥ സംഭവത്തെ ആസ്പദമാക്കി ഒരുക്കിയ സിനിമയായിരുന്നു അത്. മദ്രാസിലെ മോന്‍ അറിയപ്പെട്ട റെനി എന്റെ അടുത്ത സുഹൃത്തായിരുന്നു. ഞങ്ങള്‍ തമ്മിലുള്ള സൗഹൃദം പിരിഞ്ഞ് മാസങ്ങള്‍ക്കകമാണ് കരിക്കിന്‍ വില്ല കൊലപാതക കേസില്‍ അവനെ അറസ്റ്റ് ചെയ്ത വാര്‍ത്ത കേള്‍ക്കുന്നത്. പിന്നീട് സിനിമയില്‍ ആ കഥാപാത്രമായി എനിക്ക് തന്നെ സാധിച്ചുവെന്നത് യാദൃശ്ചികതയാവാം. ആ സിനിമ ഇറങ്ങി 20 വര്‍ഷങ്ങള്‍ക്ക് ശേഷമാണ് ഞങ്ങളുടെ സൗഹൃദത്തിന്റെ കഥ ജനം അറിഞ്ഞതെന്നും താരം പറയുന്നത്.

അതേസമയം തന്റെ അമ്മ രവീന്ദ്രനോട് സിനിമാ അഭിനയം തന്നെ നിര്‍ത്താന്‍ ആവശ്യപ്പെട്ടിരുന്നു ഒരിക്കല്‍. താന്‍ അഭിനയിച്ച സിനിമ സൂപ്പര്‍ ഹിറ്റായ സമയത്തായിരുന്നു അമ്മ മകനോട് അങ്ങനൊരു ആവശ്യം ഉന്നയിച്ചത്. അതേക്കുറിച്ചും രവീന്ദ്രന്‍ മനസ് തുറക്കുന്നുണ്ട്.

പപ്പയുടെ സ്വന്തം അപ്പൂസ് ഇറങ്ങി വലിയ ഹിറ്റായപ്പോള്‍ എന്റെ അമ്മയ്ക്ക് ഞാന്‍ അഭിനയം നിര്‍ത്തണമെന്നായിരുന്നു ആഗ്രഹം. കാരണം അമ്മയുടെ അടുത്ത് വരുന്ന രോഗികള്‍ പറഞ്ഞിരുന്നത്, ഡോക്ടറെന്ത് പാവമാണ് എന്നാല്‍ മോന്‍ എന്തൊരു ദുഷ്ടനാണെന്ന് അറിയാമോ. പപ്പയുടെ സ്വന്തം അപ്പൂസില്‍ ആ പാവം കൊച്ചിനെ ചവിട്ടിയിട്ട് ഓ കണ്ണില്‍ച്ചോരയില്ല. എല്ലാവരും ഇത് പറഞ്ഞപ്പോള്‍ അമ്മ എന്റെ അടുത്ത് വന്ന് കരഞ്ഞിട്ടുണ്ടെന്നാണ് താരം പറയുന്നത്.

നീ ഈ സിനിമാ അഭിനയം ഒന്ന് നിര്‍ത്തുമോ എന്ന് ചോദിച്ചു. ഇപ്പോഴും എന്നെ കാണുമ്പോള്‍ പല പഴയ കാല സ്ത്രീകളും ആ സിനിമയില്‍ കൊച്ചിനെ ചവിട്ടിയ കാര്യമാണ് പറയുന്നത്. നമ്മുടെ അഭിനയത്തിന്റേയും സിനിമയുടേയും വിജയമാണെങ്കിലും ആള്‍ക്കാരുടെ മനസില്‍ ഞാനൊരു ക്രൂരനായി മാറിയെന്നാണ് രവീന്ദ്രന്‍ പറയുന്നത്.

സിനിമയില്‍ നിന്നും ഇടവേളയെടുത്തതിനെക്കുറിച്ചും താരം മനസ് തുറക്കുന്നുണ്ട്. കോര്‍പ്പറേറ്റ് ലോകത്തോടുള്ള ഭ്രമം തന്നെയായിരുന്നു കാരണമെന്നാണ് രവീന്ദ്രന്‍ പറയുന്നത്.. ടാറ്റയുടേയും ബിര്‍ലയുടേയും കേരളത്തിലെ വിതരണക്കാരായിരുന്നു ഞങ്ങളുടെ കമ്പനി. കേരളത്തിലെ നിര്‍മ്മാണ രംഗത്ത് വലിയ മുന്നേറ്റം ഉണ്ടാക്കാനായെന്നും താരം ചൂണ്ടിക്കാണിക്കുന്നുണ്ട്.