Click it and Unblock the Notifications
സമാന്തയെ തുറുങ്കിലടയ്ക്കണം! താരത്തിനെതിരെ ഡോക്ടര്; ആരേയും ഉപദ്രവിക്കാനില്ലെന്ന് സമാന്ത
തനിക്കെതിരെയുള്ള ഡോക്ടറുടെ വിമര്ശനത്തിന് മറുപടിയുമായി സമാന്ത. വൈറല് അണുബാധകളെ പ്രതിരോധിക്കാന് ഹൈഡ്രജന് പെറോക്സൈഡ് ഉപയോഗിച്ച് നെബുലൈസേഷന് ചെയ്താല് മതിയെന്ന സമാന്തയുടെ പോസ്റ്റ് വലിയ വിവാദമായിരുന്നു. ഇതിനെതിരെയുള്ള ഡോക്ടര് സിറിയക് ഫിലിപ്സിന്റെ ട്വീറ്റ് വൈറലായിരുന്നു. ലിവര് ഡോക്ടര് എന്ന് അറിയപ്പെടുന്ന സിറിയക് എബി സമാന്തയക്കെതിരെ രൂക്ഷമായ ഭാഷയിലൂടെയാണ് വിമര്ശിച്ചത്.
ഇതോടെ ഇപ്പോഴിതാ സമാന്ത പ്രതികരണവുമായി എത്തിയിരിക്കുകയാണ്. സോഷ്യല് മീഡിയയില് പങ്കുവച്ച കുറിപ്പിലൂടെയായിരുന്നു സമാന്തയുടെ പ്രതികരണം. നീണ്ടൊരു കുറിപ്പിലൂടെ താന് തന്റെ അനുഭവത്തില് നിന്നുമൊരു നിര്ദ്ദേശം മുന്നോട്ട് വെക്കുക മാത്രമാണ് ചെയ്തതെന്നാണ് സമാന്ത പറയുന്നത്. താരത്തിന്റെ വാക്കുകള് വായിക്കാം തുടര്ന്ന്.
കഴിഞ്ഞ കുറച്ച് വര്ഷങ്ങളായി ഞാന് വിവിധ തരം മരുന്നുകള് കഴിക്കുന്നുണ്ട്. എന്നോട് നിര്ദ്ദേശിച്ചതെല്ലാം തന്നെ ഞാന് പരീക്ഷിച്ചു. ഉയര്ന്ന ക്വളിഫിക്കേഷനുള്ള പ്രൊഫഷണലുകളുടെ നിര്ദ്ദേശ പ്രകാരവും എന്നെ പോലൊരു സാധാരണ വ്യക്തിയ്ക്ക് സാധ്യമാകുന്ന സെല്ഫ് റിസര്ച്ചും അനുസരിച്ചായിരുന്നു എല്ലാം. മിക്ക ചികിത്സയും ചിലവേറിയതുമായിരുന്നു. ഇതെല്ലാം അഫോര്ഡ് ചെയ്യാനുള്ള ഭാഗ്യം എനിക്കുള്ളതിനെക്കുറിച്ചും അതുപോലുമില്ലാത്തവരെക്കുറിച്ചും ഈ സമയത്ത് ഞാന് ഒരുപാട് ചിന്തിച്ചിരുന്നു.
ദീര്ഘനാളായിട്ടും പരമ്പരാഗത ചികിത്സാരീതികള് എന്നെ ഗുണപ്പെടുത്തിയിരുന്നില്ല. മറ്റുള്ളവര്ക്ക് അവ ഉപകരിക്കുമെന്നും എനിക്ക് മാത്രമാണ് അങ്ങനെ സംഭവിക്കാത്തത് എന്ന സാധ്യത നിലനില്ക്കുന്നുണ്ട്. ഈ രണ്ട് കാര്യങ്ങളും എന്നെ ബദല് തെറാപ്പികളെക്കുറിച്ചും ചികിത്സകളെക്കുറിച്ചും വായിക്കുന്നതിലേക്ക് നയിക്കുകയായിരുന്നു. ഒരുപാട് ശ്രമങ്ങള്ക്ക് ശേഷം ഞാന് എനിക്ക് നല്ല മാറ്റമുണ്ടാക്കുന്ന ചികിത്സ രീതി കണ്ടെത്തി. നേരത്തെ പരമ്പരാഗത ചികിത്സയ്ക്കായി ഞാന് ചെലവാക്കിയതിന്റെ ചെറിയ പങ്ക് മാത്രമായിരുന്നു അതിന് ചെലവാക്കേണ്ടി വന്നത്.
ഒരു ചികിത്സരീതിയ്ക്ക് വേണ്ടി ശക്തമായി വാദിക്കാന് മാത്രം നിഷ്കളങ്കയല്ല ഞാന്. കഴിഞ്ഞ കുറച്ച് വര്ഷങ്ങളായി ഞാന് നേരിടുകയും പഠിക്കുകയും ചെയ്ത കാര്യങ്ങളുടെ അടിസ്ഥാനത്തില് നല്ല ഉദ്ദേശത്തോടെ നിര്ദ്ദേശിക്കുക മാത്രമാണ് ചെയ്തത്. പ്രത്യേകിച്ചും ചികിത്സ എന്നത് വളരെ ചിലവേറിയതും പലര്ക്കും അത് താങ്ങാന് സാധിക്കാത്തതും ആയതിനാലും. ആത്യന്തികമായി വിദ്യാസമ്പന്നരായ ഡോക്ടര്മാരുടെ നിര്ദ്ദേശങ്ങളെയാണ് നമ്മള് ആശ്രയിക്കേണ്ടത്.
എംഡി ആയ, 25 വര്ഷത്തോളം ഡിആര്ഡിഒയില് സേവിച്ച, ഉന്നത യോഗ്യതയുള്ള ഡോക്ടറാണ് എനിക്ക് ഈ ചികിത്സ നിര്ദ്ദേശിച്ചത്. കാലങ്ങളോളം പരമ്പരാഗത ചികിത്സ രീതി പഠിച്ച ശേഷമാണ് അദ്ദേഹം ബദല് തെറാപ്പി തിരഞ്ഞടുക്കാന് അദ്ദേഹം തീരുമാനിക്കുന്നത്.
മാന്യനായ ഒരു വ്യക്തി എന്റെ ഉദ്ദേശശുദ്ധിയെ രൂഷമായ വാക്കുകള് ഉപയോഗിച്ച് ആക്രമിക്കുകയുണ്ടായി. ഈ മാന്യനും ഡോക്ടറാണ്. അദ്ദേഹത്തിന് എന്നേക്കാള് അറിവുണ്ടാകുമെന്നതില് എനിക്ക് യാതൊരു സംശയവുമില്ല. അദ്ദേഹത്തിന്റെ ഉദ്ദേശവും നല്ലതാണെന്ന് എനിക്ക് ഉറപ്പാണ്. തന്റെ വാക്കുകളില് അദ്ദേഹം ഇത്ര പരുക്കനാകാതെ കനിവും അനുകമ്പയും കാണിച്ചിരുന്നുവെങ്കില് എന്നു മാത്രം. പ്രത്യേകിച്ചും എന്നെ ജയിലില് അടയ്ക്കണം എന്ന് പറയുന്ന ഭാഗത്ത്. വിട്ടുകളയാം. സെലിബ്രിറ്റി ആയതിനാലാണെന്ന് ഞാന് കരുതുന്നു.
ഞാന് പോസ്റ്റിട്ടത് സെലിബ്രിറ്റി എന്ന നിലയില്ല, ചികിത്സ വേണ്ടി വന്നൊരാള് എന്ന നിലയിലാണ്. പോസ്റ്റില് നിന്നും ഞാന് ഒരു രൂപ പോലും സമ്പാദിക്കുകയോ ആരേയും പ്രൊമോട്ട് ചെയ്യുകയോ ചെയ്യുന്നില്ല. ഇതേ ചികിത്സ ചെയ്തൊരാള് എന്ന നിലയില് പരമ്പരാഗത ചികിത്സ രീതിയല്ലാതൊരു സാധ്യത തേടുന്നവര്ക്ക് വേണ്ടി നിര്ദ്ദേശിക്കുക മാത്രമാണ് ഞാന് ചെയ്തത്. പ്രത്യേകിച്ചും സാമ്പത്തികമായി താങ്ങാന് സാധിക്കുന്നത് എന്ന നിലയിലായിരുന്നു. മരുന്നുകള് ഫലിക്കുന്നില്ലെന്ന് കരുതി എനിക്ക് വിട്ടുകളയാന് സാധിക്കില്ലായിരുന്നു. തോറ്റു കൊടുക്കാന് ഞാന് ഒരുക്കമായിരുന്നില്ല.
ആ മാന്യനായ ഡോക്ടറിലേക്ക് തിരികെ വരാം. അദ്ദേഹം മാന്യമായി എന്നെ ഡോക്ടറെ ക്ഷണിക്കുകയായിരുന്നുവെങ്കില് നന്നായേനെ. അദ്ദേഹത്തെ ഞാന് എന്റെ പോസ്റ്റില് ടാഗ് ചെയ്തിരുന്നു. അവരുടെ ചര്ച്ചയില് നിന്നും എനിക്ക് പഠിക്കാന് സാധിച്ചേനെ.
ആരേയും വേദനിപ്പിക്കുക എന്നല്ല, മറ്റുള്ളവരെ സഹായിക്കുക എന്നതാണ് എന്റെ ഉദ്ദേശം. എന്നിരിക്കെ എന്റെ ആരോഗ്യം മെച്ചപ്പെടുത്താന് സഹായിച്ച ചികിത്സയെക്കുറിച്ച് പങ്കുവെക്കുന്നതില് ഞാന് കുറേക്കൂടി കരുതല് കാണിക്കണമായിരുന്നു. എന്നോട് പലരും ആയുര്വേദയും ഹോമിയോപതിയും അക്യുപംഗ്ചറും നിര്ദ്ദേശിച്ചിരുന്നു. ഞാന് അവരെയെല്ലാം കേട്ടു. സമാനമായതൊന്ന് ചെയ്യുക മാത്രമാണ് ഞാന് ചെയ്തത്. എനിക്ക് ഗുണകരമായി മാറിയത് ഒരു ഓപ്ഷന് ആയി നിര്ദേശിക്കുക മാത്രമായിരുന്നു.
നമ്മള് പലരും ആരോഗ്യ പ്രശ്നങ്ങള് നേരിടുന്നുണ്ടെന്നും സഹായം വേണമെന്നും എനിക്കറിയാം. അതത് മേഖലകളില് അറിവുള്ളവര് തങ്ങളുടെ ഭാഗത്തിന് വേണ്ടി ഉറച്ചു നില്ക്കുകയും ചെയ്യുന്നു. എല്ലാ ചികിത്സാരീതിയേയും അനുകൂലിച്ചും എതിര്ത്തും സംസാരിക്കുന്നവരുണ്ട്. ഇതിലൂടെ സഞ്ചരിക്കുകയും സഹായം കണ്ടെത്തുകയും ചെയ്യുന്നത് പ്രയാസമാണ്.
Continue with Google