ഇനി വെറും അമൽ ഡേവിസ് അല്ല; മികച്ച എഡിറ്റർക്കുള്ള സംസ്ഥാന പുരസ്കാരം നേടി സം​ഗീത് പ്രതാപ്

സച്ചിനും അമൽ ഡേവിസും പ്രേക്ഷകർക്കിടിയിൽ ഉണ്ടാക്കിയ ഓളം ചെറുതല്ല. പ്രേമലു എന്ന ചിത്രത്തിന്റെ ഏറ്റവും ഹൈലൈറ്റിം​ഗ് ഫാക്ടർ ഈ രണ്ട് കഥാപാത്രങ്ങളാണ്. സം​ഗീത് പ്രതാപിന്റെ അഭിനയ ജീവിതത്തിലെ ഏറ്റവും പോമിസിം​ഗ് ആയ വേഷവും അമൽ ഡേവിസ് തന്നെ. ഇപ്പോൾ സംസ്ഥാന ചലചിത്ര പുരസ്കാരങ്ങൾ പ്രഖ്യാപിച്ചപ്പോൾ സം​ഗീത് പ്രതാപിനെ തേടിയെത്തിയത് മികച്ച എഡിറ്റർക്കുള്ള അവാർഡാണ്.

അഭിനേതാവായി മാറിയെങ്കിലും എഡിറ്ററായാണ് സിനിമയിൽ എത്തുന്നത്. ചെയ്യുന്ന പ്രൊജക്ടുകളെല്ലാം മികച്ച രീതിയിൽ പ്രേക്ഷകരിലേക്ക് എത്തിക്കാൻ സം​ഗീതിന് സാധിച്ചു. 2023ൽ വിഷ്ണു ദേവ് സംവിധാനം ചെയ്ത 'ലിറ്റിൽ മിസ്സ് റാവുത്തർ' എന്ന ചിത്രത്തിനു വേണ്ടിയാണ് മികച്ച എഡിറ്ററിനുള്ള സംസ്ഥാന ചലചിത്ര പുരസ്കാരം സം​ഗീത് പ്രതാപിന് ലഭിച്ചത്. ക്യാമറക്കു പിന്നിൽ മാത്രമല്ല, ലിറ്റിൽ മിസ്സ് റാവുത്തർ സിനിമയിലും മികച്ചൊരു കഥാപാത്രം സം​ഗീത് പ്രതാപ് അവതരിപ്പിച്ചിട്ടുണ്ട്.

'പത്രോസിന്റെ പടപ്പുകൾ' എന്ന ചിത്രത്തിലൂടെയാണ് സിനിമയിൽ എഡിറ്ററായി സം​ഗീത് പ്രതാപ് എത്തുന്നത്. ചിത്രത്തിൽ ഒരു ടാറ്റൂ ആർട്ടിസ്റ്റായി സം​ഗീത് പ്രതാപ് അഭിനയിച്ചിട്ടുമുണ്ട്. അതിനു ശേഷം 4 ഇയേഴ്സ്, ലിറ്റിൽ മിസ്സ് റാവുത്തർ, ജയ് ​ഗണേഷ് എന്നീ സിനിമകളുടെ എഡിറ്ററായും നിരവധി സിനിമകളിലെ സ്പോട്ട് എഡിറ്ററായും പ്രവർത്തിച്ചിട്ടുണ്ട്. ഗിരീഷ് എ.ഡി സംവിധാനം ചെയ്ത തണ്ണീർമത്തൻ ദിനങ്ങളിൽ സം​ഗീത് പ്രതാപ് സ്പോട്ട് എ‍‍ഡിറ്റർ ആയിരുന്നു.

എഡിറ്റർ ഷമീർ മുഹമ്മദിന്റെ അസോസ്യേറ്റ് ആയി പ്രവർത്തിക്കുമ്പോഴാണ് ആ സിനിമ സംഭവിക്കുന്നത്. ആ സിനിമയുടെ സെറ്റിൽ വെച്ചാണ് സം​ഗീതും ​ഗിരീഷ് എ.ഡിയും സുഹൃത്തുക്കളാവുന്നത്. ഇവരുടെ സൗഹൃദ ബന്ധത്തിന്റെ തുടർക്കാഴ്ചയാണ് ​ഗിരീഷിന്റെ അടുത്ത സിനിമയായ സൂപ്പർ ശരണ്യയിൽ സം​ഗീതിനെ അഭിനയിപ്പിച്ചത്. എഡിറ്ററിൽ നിന്നും അഭിനേതാവിലേക്കുള്ള ചുവടുമാറ്റം ഇങ്ങനെയായിരുന്നു. അതിനു ശേഷമാണ് ഹൃദയത്തിലേക്ക് അവസരം വന്നത്.

​ഗിരീഷ് എ.ഡിയുടെ സെറ്റിൽ വെച്ച് സം​ഗീത് പ്രതാപ് മിമിക്രി കാണിക്കാറുണ്ടായിരുന്നു. അതെല്ലാം ​ഗിരീഷും ശ്രദ്ധിക്കുമായിരുന്നു. അങ്ങനെയാണ് പ്രേമലുവിലെ അമൽ ഡേവിസ് എന്ന കഥാപാത്രത്തിന് ജീവൻ നൽകാൻ കാരണമായത്. അഭിനയം അപ്രതീക്ഷിതമായി സംഭവിച്ചതാണ്. എഡിറ്ററായി സിനിമയിൽ എത്തിയപ്പോൾ ലഭിച്ചതിനേക്കാൾ വലിയ സ്വീകാര്യതയാണ് അഭിനേതാവായി മാറിയപ്പോൾ സം​ഗീതിന് കിട്ടിയത്. പുരസ്കാര നേട്ടത്തിലൂടെ വീണ്ടും താൻ ഒരു എഡിറ്ററുമാണെന്ന് സം​ഗീത് പ്രതാപ് ലോകത്തോട് വിളിച്ചു പറയുന്നു.

ലിറ്റിൽ മിസ്സ് റാവുത്തർ ഒരു മ്യൂസിക്കൽ റൊമാന്റിക് ഡ്രാമയാണ്. സിനിമയിലെ ചില ഫ്രെയിമുകളെല്ലാം അതി മനോഹരമാണ്. കഥാപരമായി നോക്കിയാൽ ചിത്രം വലിയൊരു വിജയമായിരുന്നില്ല. മികച്ച എഡിറ്റർക്കുള്ള 54ാമത് സംസ്ഥാന ചലചിത്ര പുരസ്കാരം നേടുമ്പോൾ സം​ഗീത് പ്രതാപിന്റെ സ്കെയ്ലും വലുതാവുന്നു.

ചില സിനിമകളുടെ വിജയത്തിനു പിന്നിൽ ചില കഥാപാത്രങ്ങളുടെ സ്വാധീനം കാരണമാവാറുണ്ട്. ചില പരാജയ ചിത്രങ്ങൾ ഇന്നും പ്രേക്ഷകർ ഓർത്തിരിക്കുന്നുണ്ടെങ്കിലും അതും അത്തരം കഥാപാത്രങ്ങളുടെ മികവാർന്ന അഭിനയം മൂലമാണ്. പ്രേമലുവിലെ അമൽ ഡേവിസും അങ്ങനെയാണ്. ആ കഥാപാത്രമാണ് പ്രേക്ഷകരെ ആ സിനിമ കാണാനുള്ള ആവേശം ഉണർത്തുന്നത്. ഇന്ന് എഡിറ്റർക്കുള്ള പുരസ്കാരം നേടിയെങ്കിൽ അഭിനയത്തിനുള്ള അവാർഡുകളും സം​ഗീതിന് വിദൂരമല്ല.