ആദ്യം സഹോദരനെ പോലെ ആയിരുന്നു, അവസാനം അത് വിവാഹത്തിലെത്തി; പ്രണയകഥ പറഞ്ഞ് ആത്മിയ രാജൻ

ഏറ്റവും ഒടുവിൽ ഉണ്ണി മുകുന്ദൻ നായകനായ ഷഫീഖിന്റെ സന്തോഷത്തിലാണ് നടി അഭിനയിച്ചത്. നഴ്സിങ്ങിൽ ബിരുദം നേടിയിട്ടുള്ള ആത്മിയ അവിചാരിതമായി സിനിമയിൽ എത്തുകയായിരുന്നു. കഴിഞ്ഞ വർഷമാണ് നടിയുടെ വിവാഹം കഴിഞ്ഞത്. മറൈൻ എഞ്ചിനീയറായ സനൂപിനെയാണ് നടി വിവാഹം ചെയ്തത്. പ്രണയ വിവാഹമായിരുന്നു ഇവരുടേത്.

കോളേജിൽ വെച്ചുള്ള സൗഹൃദം ഒരു സഹോദരി സഹോദരൻ ബന്ധത്തിലേക്ക് മാറുകയും പിന്നീട് പ്രണയമാവുകയും ചെയ്യുകയായിരുന്നു. ഒടുവിൽ മൂന്ന് വർഷത്തെ പ്രണയത്തിന് ശേഷം ഇരുവരും ഒന്നിക്കാൻ തീരുമാനിക്കുകയായിരുന്നു.

ഇപ്പോഴിതാ, തന്റെ ആ പ്രണയകഥ പറയുകയാണ് ആത്മിയ. ഇന്ത്യ ഗ്ലിറ്റ്‌സിന് നൽകിയ അഭിമുഖത്തിലാണ് നടി പ്രണയവിവാഹത്തെ കുറിച്ച് പറഞ്ഞത്. ആത്മിയയുടെ വാക്കുകൾ വിശദമായി വായിക്കാം തുടർന്ന്.

'ഞങ്ങൾ തമ്മിൽ മൂന്ന് വർഷത്തെ പ്രണയമായിരുന്നു. എന്റെ കോളേജിൽ പഠിച്ചതാണ് സനു. ഒരേ ഡിപ്പാർട്മെന്റ് ഒന്നുമായിരുന്നില്ല. കോളേജിൽ പഠിക്കുമ്പോൾ എനിക്ക് സനുവിനെ അറിയില്ലായിരുന്നു. എന്റെ ആദ്യ സിനിമ കഴിഞ്ഞപ്പോൾ സനു എനിക്ക് മെസ്സേജ് ചെയ്യുകയായിരുന്നു.

ഞാൻ കോളേജിൽ പഠിച്ചതാണ്. അഭിനന്ദനങ്ങൾ, നമ്മുടെ കോളേജിൽ നിന്ന് ആദ്യമായിട്ടാണ് ഒരാൾ സിനിമയിലോക്കെ അഭിനയിക്കുന്നത്, എന്നൊക്കെ പറഞ്ഞാണ് മെസേജ് അയച്ചത്. പിന്നെ ഞങ്ങൾ അന്ന് ചാറ്റ് ചെയ്തിരുന്നു. ഒരു സഹോദരനും സഹോദരിയും പോലത്തെ ബന്ധമായിരുന്നു ഞങ്ങൾക്കിടയിൽ.

പിന്നെ സനു ഒരു വഴിക്ക് പോയി ഞാൻ എന്റെ വഴിക്കും പോയി. കുറെ നാൾ സോഷ്യൽ മീഡിയയിൽ ഒന്നും ഉണ്ടായിരുന്നില്ല. ഇടക്ക് ഞാൻ വിട്ട് നിൽക്കാറുണ്ട്. ഒന്നും ഉണ്ടായിട്ടല്ല. ഇടക്ക് ഒരു ഡിപ്രഷൻ പോലെ വരും. അപ്പോൾ എല്ലാത്തിൽ നിന്നും വിട്ട് നിൽക്കും. അങ്ങനെയാണ്.

പക്ഷെ ഇപ്പോൾ അങ്ങനെ ചെയ്യാറില്ല. അതിനു ശേഷം സനു ആയിട്ട് ഒരു ടച്ചും ഇല്ലായിരുന്നു. പിന്നീട് ഞാൻ അദ്ദേഹത്തിന്റെ നാട്ടിലേക്ക് വീട് മാറി വന്നപ്പോഴാണ് വീണ്ടും ആ ടച്ച് വന്നത്. അപ്പോഴാണ് സനുവിനെ വീണ്ടും കാണുന്നത്.

പിന്നെ ഞങ്ങൾ ഒരേ ജിമ്മിലായിരുന്നു. അങ്ങനെ പഴയ കൂട്ടുകെട്ട് പൊടി തട്ടിയെടുത്ത് നല്ല സുഹൃത്തുക്കളായി. അതിന് ശേഷം കല്യാണം കഴിച്ചു', ആത്മിയ പറഞ്ഞു.

പ്രണയമായിട്ട് രണ്ടുപേരും പറഞ്ഞിട്ടില്ല. ഞങ്ങൾ നല്ല സുഹൃത്തുക്കളായിരുന്നു. സനു സനുവിന്റെയും ഞാൻ എന്റെയും പേഴ്സണൽ കാര്യങ്ങളെല്ലാം പറയുമായിരുന്നു. സനുവിന് എന്നെ അറിയുന്നത് കൊണ്ട് തന്നെ. എല്ലാ കാര്യങ്ങളും പറയാൻ എളുപ്പമായിരുന്നു. സനു എന്നെ മനസിലാകുന്നുണ്ടായിരുന്നു. സനു വളരെ പാവം മനുഷ്യൻ ആണ്. ഒരു നല്ല മനുഷ്യനാണ് എന്നും ആത്മിയ പറഞ്ഞു.