നവ്യയ്ക്ക് ഒന്നാം സ്ഥാനം കൊടുത്തത് കള്ളക്കളി! നവ്യയോട് മത്സരിച്ച് തോറ്റതിനെപ്പറ്റി ഷൈന്‍ ടോം ചാക്കോ

ഒരു കാലത്ത് സിനിമയിലേക്ക് എത്താനുള്ള പ്രധാന മാര്‍ഗ്ഗങ്ങളില്‍ ഒന്നായിരുന്നു കലോത്സവങ്ങള്‍. നൃത്തത്തിലും മോണോ ആക്ടിലും മിമിക്രിയിലുമെല്ലാം സമ്മാനങ്ങള്‍ നേടി സിനിമാക്കാരുടെ ശ്രദ്ധ നേടാന്‍ സാധിക്കുമായിരുന്നു. അങ്ങനെ കലോത്സവത്തിലൂടെ സിനിമയിലെത്തിയ ധാരാളം താരങ്ങളുമുണ്ട്. മഞ്ജു വാര്യര്‍ മുതല്‍ നവ്യ നായര്‍ വരെ നീണ്ടു നില്‍ക്കുന്ന താരങ്ങളുണ്ട് ആ പട്ടികയില്‍.

കലോത്സവ വേദിയില്‍ നിന്നും സിനിമയിലെത്തിയവരില്‍ ഒരാള്‍ നടന്‍ ഷൈന്‍ ടോം ചാക്കോ. മോണോ ആക്ടായിരുന്നു ഷൈന്‍ ടോം ചാക്കോയുടെ മത്സരയിനം. നവ്യ നായരും ഷൈന്‍ ടോം ചാക്കോയും തമ്മില്‍ മത്സരിക്കുകയും ചെയ്തിട്ടുണ്ട്. ഇപ്പോഴിതാ നവ്യയോടുള്ള മത്സരത്തെക്കുറിച്ച് മനസ് തുറന്നിരിക്കുകയാണ് ഷൈന്‍ ടോം ചാക്കോ.

തന്റെ പുതിയ സിനിമയായ ഡാന്‍സ് പാര്‍ട്ടിയുടെ പ്രൊമോഷന്റെ ഭാഗമായി നല്‍കിയ അഭിമുഖത്തിലാണ് ഷൈന്‍ നവ്യയോട് മത്സരിച്ചതിനെക്കുറിച്ച് വെളിപ്പെടുത്തിയത്. അന്നത്തെ കാലത്ത് നൃത്തം പഠിക്കുന്നതും കലോത്സവത്തില്‍ പങ്കെടുക്കുന്നതുമെല്ലാം സിനിമയിലേക്ക് എത്താന്‍ വേണ്ടിയായിരുന്നുവെന്നാണ് ഷൈന്‍ പറയുന്നത്. ഇന്നത്തേത് പോലെ സോഷ്യല്‍ മീഡിയ ഇല്ലാതിരുന്ന കാലമായിരുന്നു. അതിനാല്‍ സംവിധായകരുടെ ശ്രദ്ധ നേടാനുള്ള വഴിയായിരുന്നു യുവജനോത്സവം.

വിനീത്, മോനിഷ, മഞ്ജു വാരിയര്‍, നവ്യ നായര്‍ എല്ലാവരും യുവജനോത്സവത്തില്‍ നിന്നും വന്നതാണെന്നും ഷൈന്‍ ചൂണ്ടിക്കാണിക്കുന്നു. അതേസമയം പ്ലസ് ടു എത്തിയപ്പോഴാണ് ഷൈന്‍ ആദ്യമായി സംസ്ഥാന കലോത്സവത്തില്‍ എത്തുന്നത്. ഡാന്‍സിന് പകരം മോണോ ആക്ടായിരുന്നു ഷൈന്‍ തിരഞ്ഞെടുത്തത്. അതിനുള്ള കാരണവും ഷൈന്‍ പങ്കുവെക്കുന്നുണ്ട്. ഡാന്‍സ് വഴി എത്താന്‍ കുറച്ച് ബുദ്ധിമുട്ടാണ്. കാരണം ആണ്‍കുട്ടികളും പെണ്‍കുട്ടികളും ഒന്നിച്ചാണ് മത്സരം. അവരോട് മത്സരിച്ചിട്ട് കാര്യമില്ലെന്നാണ് ഷൈന്‍ പറഞ്ഞത്.

കൂടാതെ കുറച്ചുകൂടി എക്സ്പെന്‍സീവ് ആണ് ഭരതനാട്യം, മോഹിനിയാട്ടം ഒക്കെ കളിക്കാനെന്നും ഷൈന്‍ തുറന്നു പറയുന്നുണ്ട്. ഡാന്‍സ് പഠിക്കണം, അതിന്റെ വസ്ത്രം, ആഭരണം, അതിനൊക്കെ മാര്‍ക്കുണ്ട്. അതിനാല്‍ പൈസ നന്നായി ചിലവാക്കുന്ന കോണ്‍വന്റ് സ്‌കൂളുകളാണ് കൂടുതലും ഡാന്‍സിന് കൊണ്ടുപോവുകയെന്നും ഷൈന്‍ അഭിപ്രായപ്പെടുന്നു. പക്ഷെ മോണോആക്ടിന് ചിലവില്ല, വെറുതെ പോയി നിന്നിട്ട് ചെയ്യാമെന്നതാണ് ഷൈന്‍ ടോം ചാക്കോയുടെ ന്യായം.

പിന്നീടാണ് നവ്യ നായരുടെ എന്‍ട്രി. അതേക്കുറിച്ചും ഷൈന്‍ സംസാരിക്കുന്നുണ്ട്.''അപ്പോഴുണ്ട് മോണോആക്ട് തുടങ്ങാന്‍ നോക്കുമ്പോ നവ്യ നായര്‍ വരുന്നു. നന്ദനത്തിന്റെ ലൊക്കേഷനില്‍ നിന്നാണ് വരവ്. അപ്പോള്‍ തന്നെ ഞാന്‍ പറഞ്ഞു, സിനിമാക്കാര്‍ തന്നെ കൊണ്ടുപോകും ഇത് എന്ന്. പറഞ്ഞ പോലെ തന്നെ നവ്യ നായര്‍ക്ക് ഫസ്റ്റ്'' എന്നാണ് ഷൈന്‍ പറയുന്നു. തനിക്ക് സമ്മാനമൊന്നും കിട്ടിയില്ലെന്നാണ് ഷൈന്‍ പറയുന്നത്. തന്റെ സ്ഥാനം 14 ആയിരുന്നുവെന്നും ആകെ 14 ജില്ലകളല്ലേ ഉള്ളൂവെന്നും ഷൈന്‍ തമാശരൂപേണ പറയുന്നുണ്ട്.

മത്സര ശേഷം നവ്യ നായരോട് സിനിമാക്കാരല്ലേ, ഇത് കള്ളക്കളിയാണെന്ന് താന്‍ പറഞ്ഞുവെന്നാണ് ഷൈന്‍ പറയുന്നത്. ഇത് കേട്ടതും നിങ്ങള്‍ക്ക് രണ്ടാം സ്ഥാനമാല്ലേ എന്ന് നവ്യ ചോദിച്ചു. അല്ല, പതിനാലാം സ്ഥാനം എന്നായിരുന്നു ഷൈന്റെ മറുപടി. അതിന്റെ മുന്നിലത്തെ കലോത്സവത്തിലാണ് നവ്യ നായര്‍ കരഞ്ഞതെന്നും ഷൈന്‍ ഓര്‍ക്കുന്നുണ്ട്. അമ്പിളി ദേവിയും നവ്യ നായരും തമ്മിലായിരുന്നു അന്ന് മത്സരം. ഒടുവില്‍ അമ്പിളി ദേവിയ്ക്ക് ഒന്നാം സ്ഥാനം ലഭിച്ചപ്പോള്‍ പൊട്ടിക്കരഞ്ഞ നവ്യ അന്ന് വാര്‍ത്തകളില്‍ നിറഞ്ഞിരുന്നു. പിന്നീടാണ് നവ്യ സിനിമയിലെത്തുന്നതും താരമാകുന്നതും.

അതിനാല്‍ നവ്യ വരുമ്പോള്‍ തന്നെ ക്യാമറയും എല്ലാം എത്തും. അവരുടെ മോണോആക്ട് കഴിഞ്ഞാ പിന്നെ ആരുമുണ്ടാവില്ല കാണാനെന്നും ഷൈന്‍ ഓര്‍ക്കുന്നുണ്ട്.