വിവാഹം കഴിഞ്ഞ് അധികം വൈകാതെ ഡിവോഴ്‌സായി! ആകെ തകർന്നുപോയി; മനസുതുറന്ന് അഞ്ജു ജോസഫ്

മലയാളികള്‍ക്ക് സുപരിചിതയാണ് ഗായിക അഞ്ജു ജോസഫ്. സ്റ്റാര്‍ സിംഗറിർ റിയാലിറ്റി ഷോയിലൂടെയാണ് അഞ്ജു പ്രേക്ഷകർക്ക് മുന്നിലേക്ക് എത്തുന്നത്. തന്റെ മനോഹരമായ പാട്ടും നിഷ്‌കളങ്കമായ ചിരിയും കൊണ്ട് അഞ്ജു മലയാളികളുടെ മനസില്‍ ഇടം നേടി. ഇന്ന് ഗായിക എന്ന നിലയിൽ അഞ്ജു സ്വന്തമായൊരു ഇടം കണ്ടെത്തിക്കഴിഞ്ഞു. താരത്തിന്റെ ബാൻഡും യൂട്യൂബ് ചാനലുമൊക്കെ പ്രശ്‌സ്തമാണ്. നിരവധി ആരാധകരുണ്ട് അഞ്ജുവിന്റെ പാട്ടിന്.

നിരവധി പേരാണ് സോഷ്യൽ മീഡിയയിലും യൂട്യൂബിലുമെല്ലാം താരത്തെ ഫോളോ ചെയ്യുന്നത്. അഞ്ജുവിന്റെ പാട്ടുകളുടെ വീഡിയോ പലപ്പോഴും സോഷ്യല്‍ മീഡിയയില്‍ വൈറലായി മാറാറുണ്ട്. മൂന്ന് ലക്ഷത്തിലധികം ഫോളോവേഴ്‌സുള്ള അഞ്ജുവിന്റെ ചാനലില്‍ പാട്ട് മാത്രമല്ല, യാത്രയും ബ്യൂട്ടി ടിപ്പ്‌സുമെല്ലാം പങ്കുവെക്കാറുണ്ട്.

അടുത്ത കാലത്തായി അഭിനയത്തിലേക്കും അഞ്ജു ചുവടുവെച്ചിരുന്നു. വലിയ വേദനകളെയും പ്രതിസന്ധി നിറഞ്ഞ കാലഘട്ടത്തെയും അതിജീവിച്ചാണ് അഞ്ജു ജോസഫ് ഇന്ന് കാണുന്ന അഞ്ജുവിലേക്ക് എത്തിനിൽക്കുന്നത്. ഇപ്പോഴിതാ ജോഷ് ടോക്‌സിൽ അതേക്കുറിച്ച് മനസുതുറന്നിരിക്കുകയാണ് താരം. ഒരു പാട്ടുകാരിക്ക് കിട്ടാവുന്ന ഏറ്റവും മോശം കമന്റാണ് ശബ്ദം നല്ലതല്ലെന്ന് പറഞ്ഞ് ഒഴിവാക്കുന്നത്. അത് ഒരുപാട് കേട്ടിട്ടുള്ള ആളാണ് താനെന്ന് അഞ്ജു പറയുന്നു.

വിനോദ മേഖല മുഴുവൻ അടിച്ചു പൊളിയാണെന്നും യാതൊരുവിധ സമ്മർദ്ദങ്ങളും ഇല്ലെന്നുമൊക്കെയാണ് പൊതുവെ എല്ലാവരുടെയും ധാരണ. എന്നാൽ അങ്ങനെയല്ല, ഒരുപാട് സ്ട്രഗിൾസ് ഉണ്ടാവുന്ന, സമ്മർദ്ദങ്ങൾ ഉള്ള മേഖലയാണ്. എല്ലാ കലാകാരന്മാരെയും പോലെ യുവജനോത്സവങ്ങളിൽ നിന്നാണ് താനും വളർന്നു വന്നത്. പിന്നീട് റിയാലിറ്റി ഷോയിൽ ഫൈനലിസ്റ്റായതാണ് കരിയറിൽ വഴിത്തിരിവായതെന്ന് അഞ്ജു പറഞ്ഞു.

സിനിമ തന്നെയായിരുന്നു സ്വപ്നം. റിയാലിറ്റി ഷോയിൽ പങ്കെടുത്തപ്പോൾ പ്രതീക്ഷിക്കാത്ത ഒരു ഫെയിം ലഭിച്ചു. ഒരുപാട് ഷോകൾ ചെയ്യാൻ തുടങ്ങി. ലോകത്തിന്റെ പലഭാഗങ്ങളിലേക്കും യാത്ര ചെയ്യാൻ കഴിഞ്ഞു. എന്നാൽ സിനിമയിലേക്ക് ആരും വിളിച്ചില്ല. അവസാനം അവസരം ചോദിച്ചു നടക്കാൻ തുടങ്ങി. അപ്പോഴാണ് ശബ്ദം കൊള്ളില്ല എന്ന കമന്റുകൾ വന്ന് തുടങ്ങുന്നത്. അതോടെ ആത്മവിശ്വാസം നഷ്ടമായി. പാടാൻ പോലും ധൈര്യമില്ലാതെയായി.

എന്നാൽ ഇതാണ് തന്റെ ജോലിയെന്ന് മനസിലാക്കി ഇതുമായി മുന്നോട്ട് പോവുകയായിരുന്നു. അതിനിടെ വിവാഹം നടന്നു. അധികം വൈകാതെ തന്നെ ഡിവോഴ്‌സും നടന്നു. അത് മെന്റൽ ഹെൽത്തിനെ ആകെ തകർത്തു കളഞ്ഞുവെന്ന് അഞ്ജു പറയുന്നു.

ജീവിതത്തിലും കരിയാറിലുമെല്ലാം തോറ്റുപോയി എന്ന ചിന്തയായി. ഡിപ്രഷൻ അടക്കം പല പ്രശ്നങ്ങളും അനുഭവിച്ചു. അതിനിടയിലും ഷോ ചെയ്യുന്നുണ്ടായിരുന്നു. ഷോയ്ക്ക് പോകുന്ന ദിവസം രാവിലെ ഇരുന്ന് കരയും. അല്ലെങ്കിൽ സ്റ്റേജിൽ കയറുന്നതിന് മുന്നേ ഇരുന്ന് കരയും. പ്രശ്നങ്ങൾ പുറത്തു കാണിക്കാതെയാണ് പെർഫോം ചെയ്തുകൊണ്ടിരുന്നത്. ആ സമയത്ത് ആത്മഹത്യ ചെയ്യുന്നതിനെ കുറിച്ച് പോലും ചിന്തിച്ചിരുന്നുവെന്ന് താരം പറയുന്നു.

ഒന്ന് രണ്ടുമാസം ഉറക്കമില്ലാതെ ഇരുന്ന് കരഞ്ഞിട്ടുണ്ട്. എങ്ങനെ അതിൽ നിന്ന് കയറി വരണമെന്ന് പോലും അറിയില്ലായിരുന്നു. സുഹൃത്തുക്കളും എന്റെ തെറാപ്പിസ്റ്റും കാരണം മാത്രമാണ് ഇപ്പോൾ താൻ ഇവിടെ നിൽക്കുന്നതെന്നും അഞ്ജു വ്യക്തമാക്കി.

ആ വേദനകളെയെല്ലാം മറികടന്ന ശേഷമാണ് താൻ സ്വന്തമായൊരു ബാൻഡ് ആരംഭിച്ച് ഇന്ഡിപെൻഡന്റ് മ്യുസിഷ്യനായി മാറിയത്. അതിനെല്ലാത്തിനും സഹായിച്ചത് തെറാപ്പിയാണ്. അതുപോലെ പലയിടങ്ങളിൽ നിന്നും റിജെക്റ്റ് ചെയ്യപ്പെട്ടതാണ് ഓരോന്ന് ചെയ്യാൻ പ്രേരിപ്പിച്ചത്. ഇന്ന് തന്റെ സന്തോഷത്തിന് വേണ്ടിയാണ് താൻ ജീവിക്കുന്നത്. ജീവിതത്തിൽ സെൽഫ് ലവ് ഉണ്ടായിരിക്കേണ്ടത് പ്രധാനമാണെന്നും അഞ്ജു ജോസഫ് പറഞ്ഞു.