കയ്യിൽ പേര് പച്ച കുത്തിയിരിക്കുന്നു, വീടിനും എന്റെ പേര്; ഇങ്ങനേയും ഒരാളോ!, അന്തിച്ചുപോയെന്ന് ചിത്ര

തന്റെ സ്വരമാധുരി കൊണ്ട് മലയാളത്തിന് പുറമെ എല്ലാ ഭാഷകളിലും ആരാധകരെ സ്വന്തമാക്കാൻ ചിത്രക്ക് കഴിഞ്ഞിട്ടുണ്ട്. ഇപ്പോഴിതാ, തനിക്ക് ഇപ്പോഴും അടുപ്പമുള്ള തന്റെ ഒരു കടുത്ത ആരാധികയെ പറ്റി പറയുകയാണ് ചിത്ര. വളർമതി എന്ന് പേരുള്ള പെൺകുട്ടി കയ്യിൽ തന്റെ പേര് പച്ച കുത്തുകയും തന്റെ ചിത്രമുള്ള മാല ധരിച്ചാണ് നടക്കുന്നതെന്നും ചിത്ര പറയുന്നു. എം.ഇ. സ്റ്റുഡിയോക്ക് നൽകിയ അഭിമുഖത്തിലാണ് തന്റെ ആരാധികയെ പറ്റി ചിത്ര സംസാരിച്ചത്.

'എനിക്ക് എന്റെ ആരാധകരെ പറ്റി അങ്ങനെ അറിയില്ല. ലണ്ടനിൽ ഒരു ഷോയ്ക്ക് പോയ സമയത്ത് വളർമതി എന്നൊരു പെൺകുട്ടി എന്നെ തപ്പി കണ്ടുപിടിച്ച് വന്നിരുന്നു. എന്റെ അമ്മയെ ആണ് അവൾ ആദ്യം കണ്ടുപിടിച്ചത്. അമ്മയെ കണ്ടുപിടിക്കാൻ എളുപ്പമാണ്. മുണ്ടും നേര്യതും ഉടുത്താണ് അമ്മ നിന്നിരുന്നത്.

അമ്മയാണ് വളർമതിയെ എന്റെ അടുത്തേക്ക് കൂട്ടി കൊണ്ടുവരുന്നത്. നോക്കുമ്പോൾ എന്റെ പേര് കയ്യിൽ പച്ച കുത്തിയിരിക്കുന്നു. മാലയുടെ ലോക്കറ്റിൽ എന്റെ ചിത്രവും പതിപ്പിച്ചിട്ടുണ്ട്. ഇതൊക്കെ കണ്ടപ്പോൾ ഞാൻ തന്നെ അന്തിച്ചുപോയി. ഇങ്ങനെയും ഒരാളുണ്ടോ? എന്ന്.

എനിക്ക് പലരോടും ആരാധന ഉണ്ടെങ്കിലും ഇങ്ങനെയൊന്നും ചെയ്യാറില്ല. അതുകൊണ്ട് എന്നോട് ഇത്രയും സ്നേഹമുള്ള ഒരാളോ എന്നാണ് ഞാൻ ചിന്തിച്ചത്. വളർമതിയുമായി ഇപ്പോഴും അടുപ്പമുണ്ട്. എന്റെ വീടിനടുത്ത് വളർമതിയും ഒരു അപ്പാർട്ട്മെന്റ് മേടിച്ചിട്ടുണ്ട്. ഞാൻ അവിടെ വരുന്നതിന് മുമ്പ് വളർമതി ആ അപ്പാർട്ട്മെന്റ് ബുക്ക് ചെയ്തതാണ്. എന്റെ പേരാണ് അവൾ അപ്പാർട്ട്മെന്റിന് ഇട്ടത്, ചിത്ര ഗാർഡൻസ്,' ചിത്ര ഓർത്തു.

ഇപ്പോഴും സ്വര മാധുര്യം നിലനിർത്തുന്നത് എങ്ങനെയാണെന്നും അഭിമുഖത്തിൽ ചിത്ര പറയുന്നുണ്ട്. എനിക്ക് ഒരുപാട് റെസ്ട്രിക്ഷൻസ് ഉണ്ട്. എനിക്ക് വയസ് 60 ആകാറായി. ഹോളിഡേ എന്ന് പറഞ്ഞ് ഞാൻ ഇതുവരെ പോയിട്ടില്ല. ജോലിയുടെ ഭാഗമായി ട്രാവൽ ചെയ്തിട്ടുള്ളതല്ലാതെ പോയിട്ടുള്ളത് രണ്ടുമൂന്ന് സ്ഥലങ്ങളിൽ മാത്രമാണ്.

Also Read: സംഭവം നടന്ന ദിവസം ദിലീപിനെ മുകേഷ് 60 തവണ വിളിച്ചു; വാര്‍ത്ത വന്നതിന് പിന്നിലെ കഥ പറഞ്ഞ് നടന്‍ മുകേഷ്

എവിടെയെങ്കിലും പോകണമെന്ന് പറഞ്ഞാൽ തന്നെ കാറ്റടിച്ചാൽ ശബ്ദത്തിന് പ്രശ്നം വരുമോ എന്ന പേടി കൊണ്ട് ഞാൻ എവിടെയും പോകാറില്ല. പരിപാടിക്ക് കാറിൽ പോകുമ്പോൾ കാണുന്ന വഴിയല്ലാതെ വേറെ ഒന്നും ഞാൻ കാണാൻ പോയിട്ടില്ലെന്നും ചിത്ര പറഞ്ഞു.