Click it and Unblock the Notifications
അപ്പനെ കൊന്നയാളുടെ കഥ മാസ് ബിജിഎം ഇട്ട് ആഘോഷിക്കപ്പെടുന്ന അവസ്ഥ; കുറുപ്പിനെതിരെ സോഷ്യല് മീഡിയ
ആരാധകര് കാത്തിരിക്കുന്ന ദുല്ഖര് സല്മാന് ചിത്രമാണ് കുറുപ്പ്. കേരളത്തിലെ ഏറ്റവും വലിയ പിടികിട്ടാപ്പുള്ളിയായ സുകുമാര കുറുപ്പിന്റെ കഥയാണ് ചിത്രം പറയുന്നത്. സുകുമാര കുറുപ്പായാണ് ചിത്രത്തതില് ദുല്ഖര് അഭിനയിക്കുന്നത്. ചിത്രത്തിന്റെ റിലീസ് കൊവിഡ് പ്രതിസന്ധിയെ തുടര്ന്ന് നീണ്ടു പോവുകയായിരുന്നു. തീയേറ്ററുകള് വീണ്ടും തുറന്ന സാഹചര്യത്തില് കുറുപ്പ് റിലീസിന് തയ്യാറെടുക്കുകയാണ്.
എന്നാല് ഇപ്പോഴിതാ ചിത്രത്തിനെതിരെ വിമര്ശനവുമായി ചിലര് രംഗത്ത് എത്തിയിരിക്കുകയാണ്. കുറുപ്പ് സിനിമയുടെ പ്രൊമോഷന്റെ ഭാഗമായി പുതിയ മര്ച്ചന്റൈസുകള് പുറത്തിറക്കിയിരുന്നു. നടി സാനിയ ഇയപ്പനാണ് മോഡലായത്. ഈ ചിത്രങ്ങള് ദുല്ഖര് തന്റെ സോഷ്യല് മീഡിയ പേജുകളിലൂടെ പങ്കുവച്ചിരുന്നു. പിന്നാലെയാണ് സോഷ്യല് മീഡിയയിലൂടെ ചിലര് വിമര്ശനവുമായി രംഗത്ത് എത്തിയത്. കുറുപ്പ് സിനിമ പിടികിട്ടാപ്പുള്ളിയായ സുകുമാര കുറുപ്പിനെ ഗ്ലോറിഫൈ ചെയ്യുന്നുവെന്ന ആരോപണമാണ് സോഷ്യല് മീഡിയ ഉയര്ത്തിയിരിക്കുന്നത്.
നിരവധി പേര് സോഷ്യല് മീഡിയയിലൂടെ വിമര്ശനം ഉന്നയിച്ചിട്ടുണ്ട്. മൂവി സ്ട്രീറ്റ് ഫെയ്സ്ബുക്ക് ഗ്രൂപ്പില് മുഥുന് മുരളീധരന് എന്ന യുവാവ് പങ്കുവച്ച പോസ്റ്റ് സോഷ്യല് മീഡിയയുടെ ശ്രദ്ധ നേടുകയാണ്. കുറുപ്പ് സിനിമയെക്കുറിച്ച് സുകുമാര കുറുപ്പ് കൊലപ്പെടുത്തിയ ചാക്കോയുടെ മകന് ജിതിന് പറഞ്ഞ വാക്കുകള് പങ്കുവച്ചായിരുന്നു മിഥുന്റെ കുറിപ്പ്. ആ വാക്കുകള് വായിക്കാം.
ഒരു ഉദാഹരണത്തിന് നിങ്ങള് അടുത്ത ഒരു 15 മിനുട്ടിലേക്ക് നിങ്ങളുടെ പേര് ജിതിന് എന്നാണ് എന്നൊന്ന് കരുതിക്കെ...??
നിങ്ങളുടെ അപ്പന്റെ പേര് കെ.ജെ ചാക്കോ എന്നും കരുതുക..നിങ്ങളുടെ ഈ അപ്പനെ സുകുമാരകുറുപ്പ് എന്നൊരാള് യാതൊരു സ്വന്തം അഭിവൃദ്ധിക്ക് വേണ്ടി കത്തിച്ചു കൊന്നു എന്നും കരുതുക.
കുറെ നാളുകള്ക്ക് ശേഷം മലയാളത്തിലെ ഏതെങ്കിലും ഒരു നടന് നിങ്ങളുടെ അപ്പന്റെ ഈ കൊലപാതകിയുടെ വേഷം ചെയ്യുന്നു എന്ന് കരുതുക. അതിനെ മാസ് ബിജിഎംന്റെയും ആഘോഷങ്ങളുടെയും രീതിയില് സ്ക്രീനില് കൊണ്ടുവരുന്നത് കാണേണ്ടി വരുന്നു എന്നും ഓര്ക്കുക.
ഒപ്പം അതിന്റെ പ്രൊമോഷനുകള്ക്കായി നിങ്ങളുടെ അച്ഛന്റെ കൊലപാതകിയുടെ പേര് എഴുതിയ ടീഷര്ട്ടുകളും മറ്റും ധരിച്ച് നിങ്ങള്ക്ക് മുന്നിലൂടെ ആഘോഷിച്ചു നടക്കുന്നു എന്നും സ്റ്റോറുകളില് വില്പ്പനക്ക് വെക്കുന്നു എന്നും അതിന്റെ വീഡിയോകളും ബിജിഎംകളും മറ്റും സ്റ്റാറ്റസ് ആയും പ്രൊഫൈല് ആയും ഉപയോഗിക്കുന്നത് കാണേണ്ടി വരുന്നു എന്നും കരുതുക...ഇനി, മേല്പ്പറഞ്ഞ ഇത്രയും കാര്യങ്ങള് ' ഒരു ഉദാഹരണം ആയതുകൊണ്ട് ' പ്രശ്നം ഇല്ല എന്നാണെങ്കില് യഥാര്ത്ഥത്തില് സ്വന്തം അച്ഛനെ ജീവിതത്തില് കണ്ടിട്ടുപോലുമില്ലാത്ത ഒരു ജിതിന് ഇവിടെ ജീവിക്കുന്നുണ്ട്. അയാള്ക്ക് തീര്ച്ചയായും മേല്പ്പറഞ്ഞ ഈ വികാരങ്ങള് തോന്നുന്നുണ്ട്. അയാള് ഇതിനെപ്പറ്റി പറഞ്ഞവ ഒരിക്കല് എങ്കിലും ഒന്ന് കേള്ക്കാന് നിങ്ങള് ശ്രമിക്കുക.?
'ഒരിക്കല്പ്പോലും ഞാനെന്റെ അപ്പന്റെ മുഖം കണ്ടിട്ടില്ല. അപ്പന് കൊല്ലപ്പെടുമ്പോള് എന്റെ അമ്മ ആറ് മാസം ഗര്ഭിണിയായിരുന്നു. അവരുടെ വിവാഹം കഴിഞ്ഞ് ഒരു വര്ഷം പോലും തികഞ്ഞിരുന്നില്ല. ആര്ത്തുങ്കല് പള്ളിയിലേക്ക് കൊണ്ടുപോകാം എന്ന് അമ്മയ്ക്ക് വാക്ക് നല്കിയാണ് അപ്പന് അന്ന് വീട്ടില് നിന്ന് ഇറങ്ങിപ്പോയത്. പിന്നെ തിരിച്ചു വന്നില്ല. ജീവിതത്തില് നമുക്കെല്ലാവര്ക്കും ഒരുപാട് പ്രശ്നങ്ങളും പ്രാരാബ്ധങ്ങളുമുണ്ട്. അതിനിടയില് സിനിമയെക്കുറിച്ചുള്ള വാര്ത്തകളൊന്നും പിന്നെ ശ്രദ്ധിച്ചില്ല. എന്നാല് ചിത്രത്തിന്റെ ടീസര് കണ്ടപ്പോള് മനസ്സിലെനിക്ക് വല്ലാത്ത വേദന തോന്നി. ഞാനത് അമ്മയെയും കാണിച്ചു. അമ്മയും തകര്ന്നുപോയി. കഥാപാത്രമായ സുകുമാരക്കുറുപ്പിന്റെ 'ഇനി ഞാന് വിചാരിക്കണം എന്നെ പിടിക്കാന്'-എന്ന സംഭാഷണം കൂടി കേട്ടപ്പോള് ആകെ തകര്ന്നു. എന്റെ അപ്പനെ കൊന്നയാളെ മഹത്വവല്ക്കരിക്കുകയാണെന്ന് എനിക്ക് തോന്നി.
Recommended Video
അപ്പന്റെ മരണവാര്ത്തയറിഞ്ഞതിന്റെ അന്ന് അമ്മയുടെ അപ്പന് ഹൃദയാഘാതം വന്ന് മരിച്ചു. അപ്പന്റെ അമ്മ കിടപ്പിലായി. ?പിന്നീട് അമ്മ എന്നെ പ്രസവിച്ചതും ഒറ്റയ്ക്ക് വളര്ത്തിയതും ഒരുപാട് യാതനകള് അനുഭവിച്ചായിരുന്നു. അമ്മയ്ക്ക് ഇപ്പോള് അതൊന്നും ഓര്ക്കാനോ അതെക്കുറിച്ച് സംസാരിക്കാനോ ഇഷ്ടമല്ല. പക്ഷേ മാധ്യമങ്ങളിലൂടെയും സിനിമകളിലൂടെയും അപ്പനെ കൊന്നയാളുടെ പേര് കേള്ക്കുമ്പോള് മനസ്സ് വല്ലാതെ അസ്വസ്ഥമാകും. ഈ സിനിമ കണ്ടിറങ്ങുമ്പോള് എന്റെ അപ്പനെ കൊന്നവന് പൊതുജനത്തിന് മുന്നില് ഹീറോ ആയി തീരുമോ എന്ന ഭയം എനിക്കുണ്ട്. അയാളുടെ ക്രൂരതയുടെ പരിണിതഫലം അനുഭവിച്ച ഞങ്ങള്ക്ക് അതൊരിക്കലും താങ്ങാനാകില്ല. ' ????
കുറുപ്പ് സിനിമ ഇറങ്ങുന്നതിനോടല്ല, ഇത്തരം ആഘോഷങ്ങളോട് ആണ് എതിര്പ്പ്. ആത് ദുല്ഖര് പ്രൊമോട്ട് ചെയ്യുന്ന രീതികളോടും ??
നബി : ' അതിനെന്താ പ്രശ്നം, എസ്കോബാര് ഉണ്ടല്ലോ എന്ന വിധം കുറെ കമന്റുകള് കണ്ടതുകൊണ്ട് ഇടുന്നു.
അതേസമയം, കുറുപ്പിലെ പകലിരവുകള് എന്ന ഗാനം പുറത്തിറങ്ങി. പാന് ഇന്ത്യന് സൂപ്പര്സ്റ്റാര് ദുല്ഖര് സല്മാന് നായകനാകുന്ന ചിത്രത്തിലെ ഗാനം അഞ്ച് ഭാഷകളിലായിട്ടാണ് പുറത്തിറങ്ങിയത്. അന്വര് അലിയുടെ വരികള്ക്ക് സുഷിന് ശ്യാം സംഗീതം നല്കിയിരിക്കുന്ന ഗാനം ആലപിച്ചിരിക്കുന്നത് നേഹ നായരാണ്. ശ്രീനാഥ് രാജേന്ദ്രന് സംവിധാനം നിര്വഹിക്കുന്ന കുറുപ്പ് നവംബര് 12ന് ലോകമെമ്പാടുമുള്ള തീയറ്ററുകളില് പ്രദര്ശനത്തിനെത്തുന്നു. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലാണ് കുറുപ്പ് പ്രേക്ഷകരിലേക്കെത്തുക. ശോഭിത ധുലിപാലയാണ് ചിത്രത്തിലെ നായിക. ഇവരെ കൂടാതെ ഇന്ദ്രജിത് സുകുമാരന്, സണ്ണി വെയ്ന്, ഷൈന് ടോം ചാക്കോ, വിജയരാഘവന്, പി ബാലചന്ദ്രന്, സുരഭി ലക്ഷ്മി, ശിവജിത് പദ്മനാഭന് തുടങ്ങിയവരും ചിത്രത്തില് അഭിനയിക്കുന്നുണ്ട്.
ഇതിനിടെയാണ് ചിത്രത്തിനെതിരെ സോഷ്യല് മീഡിയയില് വിമര്ശനം ഉയര്ന്നിരിക്കുന്നത്. അതേസമയം ചിത്രത്തതില് കുറുപ്പിനെ ഗ്ലോറിഫൈ ചെയ്യുന്നില്ലെന്നാണ് അണിയറ പ്രവര്ത്തകര് നേരത്തെ അറിയിച്ചത്. എന്തായാലും കാത്തിരുന്ന് കാണാം എന്നാണ് ആരാധകര് പറയുന്നത്.
Continue with Google