കല്യാണിക്കൊപ്പമുള്ള സിനിമ?; മകളുടെ സിനിമാ പ്രവേശത്തിനെ കുറിച്ച് ബിന്ദു പണിക്കർ പറഞ്ഞത്!

സിനിമയിൽ അഭിനയിച്ചിട്ടില്ലെങ്കിലും ബിന്ദു പണിക്കരുടെ മകൾ കല്യാണിയും പ്രേക്ഷകർക്ക് പ്രിയങ്കരിയാണ്. ബിന്ദു പണിക്കരുടെ ആദ്യ ഭർത്താവിലുള്ള മകളാണ് കല്യാണി. അദ്ദേഹത്തിന്റെ മരണ ശേഷം 2009 ലാണ് ബിന്ദു പണിക്കർ സായികുമാറിനെ വിവാഹം കഴിച്ചത്.

സോഷ്യൽ മീഡിയയിലൂടെയാണ്‌ മകൾ കല്യാണി ശ്രദ്ധനേടിയത്. അമ്മയ്‌ക്കൊപ്പമുള്ള കല്യാണിയുടെ ഡബ്‌സ്മാഷ് വീഡിയോ വൈറലായി മാറിയിരുന്നു. നല്ല നർത്തകി കൂടിയായ കല്യാണിയുടെ റീലുകളും ഇപ്പോൾ ഏറെ ശ്രദ്ധനേടാറുണ്ട്. ഒരിക്കല്‍ നടി മഞ്ജു വാര്യര്‍ക്കൊപ്പം കോളേജില്‍ കല്യാണി ഡാന്‍സ് കളിക്കുന്ന വീഡിയോ വലിയ തരംഗമായിരുന്നു.

ഡാൻസിലും അഭിനയത്തിലും ഒക്കെ തിളങ്ങുന്ന കല്യാണി എന്നാണ് സിനിമയിലേക്ക് എന്നാണ് ആരാധകരും ചോദിക്കുന്നത്. ഇപ്പോഴിതാ, മകളുടെ സിനിമാ പ്രവേശത്തെ കുറിച്ച് ബിന്ദു പണിക്കർ പറഞ്ഞ വാക്കുകളാണ് ശ്രദ്ധനേടുന്നത്. മമ്മൂട്ടി നായകനാകുന്ന റോഷാക്ക് എന്ന ബിന്ദു പണിക്കരുടെ ഏറ്റവും പുതിയ ചിത്രത്തിന്റെ പ്രമോഷന്റെ ഭാഗമായി ബിഹൈൻഡ് വുഡ്‌സ് എന്ന ചാനലിന് നൽകിയ അഭിമുഖത്തിൽ മകളോടൊപ്പമുള്ള സിനിമ എപ്പോഴാണെന്ന ചോദ്യത്തിന് മറുപടി നൽകുകയായിരുന്നു ബിന്ദു പണിക്കർ.

മകളുമായി സിനിമ ചെയ്യുന്നതിനെ കുറിച്ചൊന്നും ആലോചിച്ചിട്ടില്ല എന്നാണ് ബിന്ദു പണിക്കർ പറഞ്ഞത്. 'അതേക്കുറിച്ചൊന്നും ആലോചിച്ചിട്ടേയില്ല. അവള്‍ പഠിക്കാന്‍ പോയിരിക്കുകയാണ്. ഇതേ ചോദ്യം പലരും ചോദിച്ചിട്ടുണ്ട്. പഠനമാണല്ലോ ആദ്യം വേണ്ടത്. അത് നടക്കട്ടെ,' എന്നായിരുന്നു ബിന്ദു പണിക്കരുടെ മറുപടി. പഠനത്തിനായി കഴിഞ്ഞ മാസമാണ് കല്യാണി യുകെയിലേക്ക് പോയത്.

കല്യാണി സുഹൃത്തുകൾക്ക് ഒപ്പം ചെയ്യുന്ന ഡാൻസ് വീഡിയോകൾ അതിവേഗം വൈറലാകാറുണ്ട്. മകളുടെ വീഡിയോകൾ കാണാനായി മാത്രം താൻ ഒരു ഇൻസ്റ്റാഗ്രാം അക്കൗണ്ട് തുടങ്ങിയിട്ടുണ്ടെന്നും അല്ലാതെ മറ്റു സോഷ്യൽ മീഡിയ അക്കൗണ്ടുകൾ ഒന്നും തനിക്ക് ഇല്ലെന്നും ബിന്ദു പണിക്കർ അഭിമുഖത്തിൽ പറയുന്നുണ്ട്.

തന്നെ കാണുമ്പോൾ പലരും കല്യാണിയുടെ അമ്മയല്ലേ എന്നാണ് ചോദിക്കുന്നത്. അതും ഞാന്‍ എന്‍ജോയ് ചെയ്യുന്നുണ്ട്. ഇപ്പോഴത്തെ കുട്ടികളൊക്കെ അങ്ങനെയാണ് ചോദിക്കുന്നതെന്നും ബിന്ദു പണിക്കർ പറഞ്ഞു.
അതേസമയം, ഒരു രസകരമായ സംഭവം പങ്കുവച്ചു കൊണ്ടാണ് താൻ ഫെയ്‌സ്‌ബുക്കിൽ ഇല്ലെന്ന് ബിന്ദു പണിക്കർ പറഞ്ഞത്.

'മുന്‍പൊരിക്കല്‍ ക്യാമറാമാൻ ആനന്ദക്കുട്ടേട്ടന്‍ എന്നോട് ബിന്ദു ഫേസ്ബുക്കിലില്ലേയെന്ന് ചോദിച്ചിരുന്നു. ഇന്ത്യാടുഡേയൊക്കെ പോലെ എന്തെങ്കിലും ബുക്കായിരിക്കും അതെന്നായിരുന്നു ഞാന്‍ കരുതിയത്. അതേത് ബുക്കാണെന്നായിരുന്നു ഞാന്‍ ചോദിച്ചത്. ചോദിച്ചതേ ഓര്‍മ്മയുള്ളൂ, അവിടെ ഭയങ്കര ചിരിയായിരുന്നു. ബിന്ദു കമലദളത്തില്‍ തന്നെ നില്‍ക്കുകയാണ് എന്നറിഞ്ഞില്ല എന്നാണ് അദ്ദേഹം പറഞ്ഞത്. പിന്നെയാണ് ഞാന്‍ ഒരു ഫ്രണ്ടിനോട് ചോദിച്ചത്. നോക്കുമ്പോള്‍ എന്റെ പേരില്‍ അക്കൗണ്ടുണ്ട്. സത്യത്തില്‍ ഞാന്‍ അതിലില്ല, വേറെ ആരോ ആണ്,' ബിന്ദു പണിക്കർ പറഞ്ഞു.