മറിയം എന്റെ സിനിമകളെ കുറിച്ച് സംശയങ്ങൾ ചോദിച്ചു തുടങ്ങി, ഗൂഗിൾ നോക്കിയാണ് പലതും പറഞ്ഞു കൊടുക്കുക: ദുൽഖർ

ചിത്രത്തിന്റെ പ്രമോഷന്റെ ഭാഗമായി ദേശീയ മാധ്യമങ്ങൾക്ക് ഉൾപ്പെടെ ദുൽഖർ അഭിമുഖങ്ങൾ നൽകിയിരുന്നു. സിനിമാ വിശേഷങ്ങൾക്ക് ഒപ്പം കുടുംബവുമായി ബന്ധപ്പെട്ട ചോദ്യങ്ങളും ദുൽഖറിനോട് ചോദിക്കുകയുണ്ടായി. മമ്മൂട്ടിയെ കുറിച്ചും മകൾ മറിയത്തെ കുറിച്ചുമുള്ള ചോദ്യങ്ങളാണ് കൂടുതലും. ഗുഡ് ടൈംസ് എന്ന മാധ്യമത്തിന് നല്‍കിയ അഭിമുഖത്തിലും ദുൽഖറിനോട് മറിയത്തെക്കുറിച്ചുള്ള ചോദ്യങ്ങളുണ്ടായിരുന്നു. അതിന് ദുൽഖർ നൽകിയ മറുപടിയാണ് ഇപ്പോൾ ശ്രദ്ധനേടുന്നത്.

ഭാര്യ അമാലിനെയും മകൾ മറിയത്തെയും കുറിച്ചുള്ള ചോദ്യത്തിനോടായിരുന്നു ദുൽഖറിന്റെ പ്രതികരണം. തന്റെ സിനിമകളെക്കുറിച്ചും പാട്ടുകളെക്കുറിച്ചുമൊക്കെ മറിയം ഇപ്പോൾ സംശയം ചോദിക്കാറുണ്ടെന്നും അതിന് ഉത്തരം കൊടുക്കാൻ താൻ തന്റെ ഫില്‍മോഗ്രഫി ഗൂഗിള്‍ ചെയ്യാറുണ്ടെന്നുമാണ് ദുൽഖർ പറയുന്നത്. ദുൽഖറിന്റെ വാക്കുകൾ ഇങ്ങനെ.

'മകളോടൊപ്പം കുറച്ച് സമയം മാത്രമാണ് ചെലവഴിക്കാൻ പറ്റുന്നത്. അമാലാണ് അവളുടെ കാര്യങ്ങളെല്ലാം നോക്കുന്നത്. അവൾ വളരെ സ്ട്രിക്ടാണ്. മകളെ അച്ചടക്കം ഒക്കെ പഠിപ്പിച്ചു വച്ചിട്ടുണ്ട്. എന്നാൽ ഞാന്‍ തിരിച്ചുവന്നാല്‍ അതെല്ലാം കളയാറുണ്ട്. മറിയത്തിനൊപ്പം ചേച്ചിയുടെ മക്കളുമുണ്ട്. അവരെല്ലാം ഒന്നിച്ച് കളിക്കുന്നത് കണ്ടിരിക്കാൻ നല്ല രസമാണ്,'

'വളരെ ആകർഷകമായ വ്യക്തിത്വമാണ് മാറിയത്തിന്റേത്. രണ്ടാമത്തെ സിനിമ ഏതാണ്, ആ പാട്ട് ഏത് ചിത്രത്തിലേതാണ് എന്നൊക്കെ മറിയം ഇടയ്ക്ക് സംശയങ്ങൾ ചോദിക്കും. ഇതൊന്നും ഞാനോര്‍ത്തിരിക്കുന്ന കാര്യങ്ങളല്ല. അതുകൊണ്ട് ഞാന്‍ എന്റെ സിനിമകളിലെ കാര്യങ്ങൾ വരെ ഗൂഗിളില്‍ നോക്കിയാണ് പറഞ്ഞു കൊടുക്കുന്നത്. എന്റെ സിനിമകളിലെ പാട്ടുകളെല്ലാം അവള്‍ കേള്‍ക്കാറുണ്ട്. ഇപ്പോള്‍ സീതാരാമത്തിലെ പാട്ടാണ് ഏറ്റവും ഇഷ്ടം,' ദുൽഖർ പറഞ്ഞു.

വീട്ടിൽ തന്നെ വലിയൊരു ഫാൻ ഗേളായി മകൾ ഉണ്ടല്ലേയെന്ന് അവതാരക ചോദിക്കുമ്പോൾ അതെയെന്ന് പറഞ്ഞ് ദുൽഖർ അത് ശരിവെയ്ക്കുന്നുണ്ട്. നേരത്തെ മകള്‍ ജനിച്ചതോടെ ജീവിതത്തില്‍ ഒരുപാട് മാറ്റങ്ങള്‍ വന്നിരുന്നുവെന്ന് ദുല്‍ഖര്‍ പറഞ്ഞിരുന്നു. എവിടെപ്പോയാലും വീട്ടിലേക്ക് തന്നെ തിരിച്ചെത്താനായി ആഗ്രഹിക്കാറുണ്ടെന്നും വൈകുന്നേരങ്ങൾ അവളുടെ ഒപ്പം ചെലവഴിക്കാനായാണ് രാവിലെ ജിമ്മിൽ പോകുന്നതെന്നൊക്കെ ദുൽഖർ പറഞ്ഞിട്ടുണ്ട്.