ഇനി വിവാഹം കഴിക്കുമോ ഇല്ലയോ എന്ന് അറിയില്ല; ആത്മാവിന്റെ പുറത്തു സംഭവിക്കുന്ന സർജറി പോലെയാണത്: ലെന

മലയാളികളുടെ ഇഷ്ട നടിമാരിൽ ഒരാളാണ് ലെന. കഴിഞ്ഞ 25 വർഷത്തിലേറെയായി മലയാള സിനിമയുടെ ഭാഗമാണ് താരം. എന്നാൽ അടുത്ത കാലത്തായി ലെനയെ അധികം സിനിമകളിൽ കാണാറില്ല. ആത്മീയ പാതയിലേക്ക് തിരിഞ്ഞ താരം എഴുത്തിനും മറ്റുമാണ് ഇപ്പോൾ ശ്രദ്ധ നൽകിയിരിക്കുന്നത്. അടുത്തിടെ 'ഓട്ടോബയോ​ഗ്രഫി ഓഫ് ​ഗോഡ്' എന്ന പേരിൽ ഒരു പുസ്തകം ലെന പുറത്തിറക്കിയിരുന്നു. ആത്മാവിനെക്കുറിച്ചും സ്വയം തിരിച്ചറിയലിനെക്കുറിച്ചുമൊക്കെയാണ് ലെന പുസ്തകത്തിൽ സംസാരിക്കുന്നത്.

വർഷങ്ങൾ നീണ്ട പ‌ഠനങ്ങൾക്കും നിരീക്ഷണങ്ങൾക്കുമൊടുവിലാണ് ലെന തന്റെ പുസ്തകം ഒരുക്കിയിരിക്കുന്നത്. ഇപ്പോഴിതാ 24 ന്യൂസിന് നൽകിയ അഭിമുഖത്തിൽ, തന്റെ പുസ്തകത്തെക്കുറിച്ച് സംസാരിക്കുന്നതിനിടെ ലെന പറഞ്ഞ വാക്കുകളും ശ്രദ്ധനേടുകയാണ്. വീണ്ടുമൊരു വിവാഹം കഴിക്കുന്നതിനെ കുറിച്ചടക്കം ലെന സംസാരിക്കുന്നുണ്ട്.

ഞാൻ എന്ന വാക്കിന്റെ അർഥം ജീവൻ എന്നാണെന്ന് ലെന പറയുന്നു. 'നമ്മുടെ ശരീരം മരിച്ചാലും, ജീവൻ മരിക്കുന്നില്ല. എനിക്ക് ദൈവം എന്നാൽ ജീവിതമാണ്. ജാതിയും മതവും ഒക്കെ ഈ അറിവിലൂടെ ഞാൻ മറികടന്നു. ഇവിടെയുള്ള അദൃശ്യരൂപം ശ്വസിച്ചുകൊണ്ടാണ് നമ്മുടെയൊക്കെ ജീവൻ നിലനിൽക്കുന്നത്. എനിക്ക് ഇത്രയും സിംപിൾ ആണ് ദൈവം എന്ന കൺസെപ്റ്റ്',

'ഞാൻ പറയുന്നത് ഒന്നും മതപരമോ പൊളിറ്റിക്കലോ ആയ കാര്യങ്ങൾ അല്ല. ഞാൻ ഒരു മതവും ഫോളോ ചെയ്യാത്ത ആളാണ്. എന്നാൽ എല്ലാ മതത്തിൽ പെട്ടവരും എന്റെ കുടുംബത്തിൽ തന്നെ ഉണ്ട്. ഞാൻ എല്ലാ മതങ്ങളുടെയും ചിട്ടകൾ കണ്ടുവളർന്നതാണ്. പക്ഷേ അപ്പോഴാണ് പല മതങ്ങൾ എന്തിനാണ് എല്ലാം ഒന്നിലേക്ക് അല്ലെ എത്തുന്നത് എന്ന ചിന്തയാണ് എനിക്ക്',

'മുൻജന്മത്തിൽ വിശ്വസിക്കുന്ന ആളാണ്. കഴിഞ്ഞ ജന്മത്തിൽ ഞാനൊരു ബുദ്ധ സന്യാസി ആയിരുന്നു. എനിക്ക് ഈ ജീവിതത്തിൽ വലിയ ടെൻഷനുകൾ ഒന്നുമില്ല. വലിയ പ്രാരാബ്ധങ്ങൾ ഇല്ലാത്ത ആളാണ് ഞാൻ ഇവിടെ. മെഡിറ്റേഷൻ ആണ് ഞാൻ ഇപ്പോൾ ഏറ്റവും കൂടുതൽ ആസ്വദിക്കുന്നത്. 23 വയസ്സുകാരി ലെനയ്ക്ക് മഷ്‌റൂം ട്രൈ ചെയ്യേണ്ട ആവശ്യമുണ്ടായിരുന്നില്ല എന്ന് പറയാനാകില്ല. കാരണം അത് എന്റെ ജീവിതത്തിൽ സംഭവിക്കേണ്ടത് ആയിരുന്നു, സംഭവിച്ചു',

'ഞാൻ ഇത് 20 വർഷങ്ങൾക്ക് ശേഷം പറയാൻ കാരണം ഇന്നത്തെ തലമുറ പല കാര്യങ്ങളും പരീക്ഷിക്കുന്നവരാണ്. മഷ്‌റൂം ശരിക്കും നാച്ചുറൽ ആണ്. എങ്കിലും ഇത് ഡേഞ്ചർ ആണെന്ന് ബോധിപ്പിക്കാൻ വേണ്ടിയാണു ഞാൻ പറഞ്ഞത്. ഞാൻ ക്ലിനിക്കൽ സൈക്കോളജിയിൽ അഞ്ചുവർഷം പഠിച്ചു പ്രാക്ടീസ് ചെയ്ത ആളാണ്. എല്ലാ വശങ്ങളും ഞാൻ പഠിച്ച ശേഷമാണ് അത് ചെയ്തത്. അല്ലാതെ എന്ത് ഏത് എന്ന് നോക്കാതെ ഇന്നത്തെ ചെറുപ്പക്കാർ ചെയ്ത പോലെ അല്ല ഞാൻ ചെയ്‌തത്. അത് ചെയ്യാൻ പാടില്ലാത്തതാണ്, പക്ഷെ വിധിയെന്ന പോലെ ഞാൻ ചെയ്തു',

'ഒരു എൻജോയ്മെന്റ് എന്നതിനേക്കാൾ ഉപരി മഷ്‌റൂം കഴിച്ചുകഴിഞ്ഞപ്പോൾ മെഡിറ്റേറ്റ് ചെയ്യാൻ ആണ് തോന്നിയത്. ദൈവം എന്താണ് എന്ന് അറിയണം എന്നുപറഞ്ഞുകൊണ്ടാണ് ഞാൻ മെഡിറ്റേറ്റ് ചെയ്യാൻ ഇരുന്നത്. അതിനുശേഷം ലഹരി ഉപയോഗിച്ചിട്ടില്ല', ലെന പറഞ്ഞു. ഏകാന്തതയിലേക്ക് വരാൻ വേണ്ടിയാണോ കുടുംബം വേണ്ട എന്ന് വച്ചതെന്ന ചോദ്യത്തിനോടും ലെന പ്രതികരിച്ചു.

'അങ്ങനെ അല്ല. മനസ്സിൽ അങ്ങനെ ഒരു തീരുമാനം വന്നു, എടുത്തു. എന്റെ ബുക്ക് എഴുതുന്നവരെ എനിക്ക് ഒന്നും ചെയ്യാനാകില്ലായിരുന്നു. പന്ത്രണ്ടുവർഷം ഒരു തപസ്സുകാലം ആയിരുന്നു. ഇപ്പോൾ ഇത് എഴുതിക്കഴിഞ്ഞപ്പോൾ ഞാൻ ഫ്രീ ആയി. ഇനി വിവാഹം കഴിക്കുമോ ഇല്ലയോ എന്ന് എനിക്ക് അറിയില്ല. ആത്മാവിന്റെ പുറത്തു സംഭവിക്കുന്ന ഒരു സർജറി പോലെയാണ് റിലേഷൻഷിപ്പ്. അങ്ങനെ ഒരു സർജറി വേണമെങ്കിൽ വിവാഹം കഴിച്ചേക്കാം', ലെന അഭിമുഖത്തിൽ പറഞ്ഞു.