ഇപ്പോൾ സന്തോഷിക്കാൻ പറ്റിയ സാഹചര്യമല്ല; എങ്കിലും ചിലരോടൊക്കെ എനിക്ക് നന്ദി പറയാനുണ്ട്: ശ്വേത മോഹൻ

തമിഴ് പാട്ടുകളിലൂടെ സിനിമാ പിന്നണി രം​ഗത്ത് എത്തിയ മലയാളി ​ഗായികയാണ് ശ്വേത മോഹൻ. 9 വയസിലാണ് ആദ്യമായി പാട്ടു പാടുന്നത്. എ. ആർ റഹ്മാന്റെ മ്യൂസിക്കിൽ ബോംബെ എന്ന ചിത്രത്തിൽ 'കുച്ചി കുച്ചി റാക്കമ്മ' എന്ന പാട്ടിൽ കോറസ് പാടാൻ ശ്വേതയും ഉണ്ടായിരുന്നു. അമ്മയുടെ സം​ഗീത പാരമ്പര്യം ശ്വേതക്ക് വളരെ ചെറുപ്പത്തിൽ തന്നെ കിട്ടിയിട്ടുണ്ട്. എല്ലാ വിശേഷങ്ങളും സോഷ്യൽ മീഡിയയിലൂടെ പങ്കുവെക്കുന്ന ശ്വേത പുതിയ സന്തോഷവുമായി എത്തിയിട്ടുണ്ട്.

69ാമത് സൗത്ത് ഫിലിം ഫെയർ പുരസ്കാരങ്ങൾ കഴിഞ്ഞ ദിവസം പ്രഖ്യാപിച്ചിരുന്നു. മികച്ച തെലു​ഗു പിന്നണി ​ഗായികക്കുള്ള അവാർഡ് നേടിയത് ശ്വേത മോഹൻ ആണ്. സാർ എന്ന തെലു​ഗു സിനിമയിലെ മാസ്റ്ററു മാസ്റ്ററു എന്ന പാട്ടിനാണ് അവാർഡ് നേടിയത്. തമിഴിൽ വാത്തി എന്ന ചിത്രത്തിന്റെ തെലു​ഗു വേർഷനാണ് സാർ എന്ന ചിത്രം. ഇതിലെ പാട്ട് ഏറെ ശ്രദ്ധ നേടിയിരുന്നു. ആ പാട്ടിനു തന്നെയാണ് ശ്വേതക്ക് പുരസ്കാരവും ലഭിച്ചത്.

വയനാടിന്റെ ദുഖ വാർത്ത മൂലം എല്ലാ താരങ്ങളും തങ്ങളുടെ സന്തോഷത്തേക്കാൾ കൂടുതൽ കേരളത്തിന്റെ ദുഖത്തിൽ പങ്കുചേരുകയാണ്. ശ്വേതയുടെ ഇൻസ്റ്റ​ഗ്രാം പോസ്റ്റും അത്തരത്തിലാണ്. എങ്കിലും തനിക്ക് ചിലരോടൊക്കെ നന്ദി പറയണം എന്നു പറഞ്ഞാണ് ശ്വേത ഈ കുറിപ്പ് എഴുതുന്നത്. ഇത് 11ാമത്തെ തവണയാണ് സൗത്ത് ഫിലിം ഫെയർ പുരസ്കാരം ശ്വേതയെ തേടി എത്തുന്നത്.

"ആഘോഷിക്കാന്‍ പറ്റിയ നല്ല സമയമല്ല ഇത്, പക്ഷേ എനിക്ക് ഈ ഫിലിം ഫെയര്‍ പുരസ്‌കാരം നേടിത്തന്ന ചിലരോട് നന്ദി പറയാന്‍ വേണ്ടിയാണ് ഈ പോസ്റ്റ് ഇടുന്നത്. മാസ്റ്ററു മാസ്റ്ററു എന്ന പാട്ട് ഇത്ര വലിയ ഹിറ്റാക്കി തീര്‍ത്ത എന്റെ തെലുങ്ക് ഓഡിയന്‍സിന് ആദ്യം നന്ദി. ഫിലിം ഫെയറിനും ജൂറിയ്ക്കും നന്ദി. ഈ പാട്ട് ഞാന്‍ ധനുഷ് സാറിന് സമര്‍പ്പിയ്ക്കുന്നു. എനിക്ക് ഈ പാട്ട് തന്നതിന് ധനുഷ് ജിയ്ക്ക് നന്ദി."

ശ്വേത മോഹൻ പുരസ്കാരം പിടിച്ച് നിൽക്കുന്ന ചിത്രത്തിനു താഴെ കുറിച്ച വാക്കുകളാണ് ഇത്. മ്യൂസിക് ഡയറക്ടർ ജി.വി പ്രകാശിനും, മറ്റ് ടെക്നീഷ്യൻമാർക്കുമെല്ലാം ശ്വേത നന്ദി പറയുന്നുണ്ട്. കുടുംബത്തിനും കൂടെ നിന്നവർക്കുമെല്ലാം നന്ദി പറഞ്ഞു. മാത്രമല്ല ഈ പാട്ട് എന്നും എനിക്ക് പ്രിയപ്പെട്ടതായിരിക്കും. നിരവധി പേരാണ് ഈ പോസ്റ്റിന് താഴെ കമന്റ് ചെയ്തിരിക്കുന്നത്.

ഈ അവാർഡിന് മറ്റൊരു പ്രത്യേക കൂടിയുണ്ട്. പാട്ടുകാരിയും അമ്മയുമായ സുജാത മോഹനാണ് ശ്വേതക്ക് ഈ പുരസ്കാരം സമ്മാനിച്ചത്. ശരിക്കും മനോഹരമായ ഒരു നിമിഷമായിരുന്നു അത്. നിരവധി പേർ പോസ്റ്റിനു താഴെ ആശംസകൾ അയക്കുന്നുണ്ട്. കഴിഞ്ഞ വർഷം ധനുഷിനെ നായകനാക്കി വെങ്കി അട്ലൂരി സംവിധാനം ചെയ്ത ബൈലിങ്ക്വൽ ചിത്രമാണ് വാത്തി. തെലു​ഗിൽ സാർ എന്ന പേരിലാണ് റിലീസ് ചെയ്തത്. മിക്സഡ് റിവ്യൂസ് നേടിയ ചിത്രം ബോക്സ് ഓഫീസിൽ നല്ല കളക്ഷൻ നേടി.

പോസ്റ്റ് കാണാം.