റോളക്‌സ് നിരസിക്കാൻ ഒരുങ്ങിയ കഥാപാത്രം; ചെയ്യാൻ തീരുമാനിച്ചതിന് ഒറ്റ കാരണം; വെളിപ്പെടുത്തി സൂര്യ

ഇന്നലെ നടന്ന ഫിലിംഫെയർ അവാർ‌ഡ്‌സ് 2022 സൗത്ത് അവാർഡ് നിശയിലാണ് സൂര്യ ഇക്കാര്യം പറഞ്ഞത്. അവാർഡ് ധാന ചടങ്ങിൽ സൂരറൈ പോട്ര് എന്ന ചിത്രത്തിലെ പ്രകടനത്തിന് മികച്ച നടനുള്ള പുരസ്‌കാരം സൂര്യ നേടിയിരുന്നു. പുരസ്‌കാരം ഏറ്റുവാങ്ങുന്നതിനിടെ ആരാധകർ റോളക്‌സ് എന്ന് ഉച്ചത്തിൽ വിളിക്കാൻ ആരംഭിച്ചു. ഇതിനിടെ പരിപാടിയുടെ അവതാരകൻ റോളക്‌സിന്റെ തിരിച്ചുവരവുണ്ടാകുമോ എന്ന് ചോദിച്ചപ്പോഴാണ് താരം മനസുതുറന്നത്. സംവിധായകൻ ലോകേഷ് കനകരാജ് ഈ ഓഫറുമായി എത്തിയപ്പോൾ തനിക്ക് താത്പര്യം ഇല്ലായിരുന്നു എന്നും താൻ ആദ്യം നോ പറയാൻ ഒരുങ്ങിയതാണ് എന്നുമാണ് സൂര്യ പറഞ്ഞത്.

കമൽ ഹാസന് വേണ്ടി മാത്രമാണ് താൻ റോളക്‌സിനെ അവതരിപ്പിക്കാൻ തയ്യാറായതെന്ന് സൂര്യ പറഞ്ഞു. താനിന്ന് എന്തുതന്നെയായാലും, ജീവിതത്തിൽ എന്തു ചെയ്താലും, കമൽ സാർ എപ്പോഴും തന്റെ പ്രചോദനം തന്നെയായിരിക്കുമെന്ന് സൂര്യ പറഞ്ഞു. അദ്ദേഹം വിളിച്ച് കഥാപാത്രത്തിന്റെ കാര്യം പറഞ്ഞപ്പോൾ വേണ്ടെന്നുവയ്ക്കാൻ ആകുമായിരുന്നില്ല.

അവസാന നിമിഷമെടുത്തൊരു തീരുമാനമായിരുന്നു അത്. ആ കഥാപാത്രം ചെയ്യാനാകില്ലെന്ന് ലോകേഷിനോട് വിളിച്ചുപറയാൻ ഒരുങ്ങുകയായിരുന്നു. എന്നാൽ അദ്ദേഹത്തിന് വേണ്ടി മാത്രം ആ കഥാപാത്രം ചെയ്യാൻ തീരുമാനിച്ചു, അങ്ങനെ ചെയ്യുകയായിരുന്നു എന്ന് സൂര്യ പറഞ്ഞു.

റോളെക്‌സിന്റെ വേഷത്തിൽ ഇനിയും എത്തുമോ എന്ന ചോദ്യത്തിന് കാലം ഉത്തരം നൽകുമെന്നായിരുന്നു സൂര്യയുടെ മറുപടി. കഥാപാത്രം തന്നെ തേടിയെത്തിയാൽ സ്വീകരിക്കുമെന്നും സൂര്യ പറഞ്ഞു. ലോകേഷ് കനകരാജ് തന്നെ സംവിധാനം ചെയ്യാൻ ഒരുങ്ങുന്ന വിക്രം 2 വിൽ സൂര്യ ഉണ്ടാകുമെന്ന റിപ്പോർട്ടുകൾക്ക് ഇടയിലാണ് നടനും ഇക്കാര്യം പറഞ്ഞിരിക്കുന്നത്.

വിജയ് സേതുപതി, ഫഹദ് ഫാസിൽ, നരേൻ, കാളിദാസ് തുടങ്ങിയവർ അഭിനയിച്ച വിക്രം, ഈ വർഷത്തെ ഏറ്റവും കൂടുതൽ കളക്ഷൻ നേടിയ തമിഴ് ചിത്രമാണ്, ബോക്‌സ് ഓഫീസിൽ നിന്ന് മാത്രം ചിത്രം 440 കോടിയിലധികം കളക്ഷൻ നേടിയെന്നാണ് റിപ്പോർട്ടുകൾ. ലോകേഷിന്റെ തന്നെ കൈതിയെന്ന ചിത്രവുമായി ബന്ധപ്പെടുത്തിയാണ് ചിത്രം ഒരുക്കിയത്.

അടുത്ത വർഷം പുറത്തിറങ്ങുന്ന വിജയ് ചിത്രത്തിന് ശേഷം ലോകേഷ് കനകരാജ് കൈതി 2, വിക്രം 2 എന്നി ചിത്രങ്ങൾ സംവിധാനം ചെയ്യും എന്നാണ് വിവരം. കൈതി 2 2024 ൽ ഉണ്ടാകുമെന്ന് നേരത്തെ തന്നെ പ്രഖ്യാപിച്ചിരുന്നു. വിക്രം 2 അതിന് ശേഷം ഉണ്ടാകുമെന്നാണ് വിവരം.