ദിലീപിന് വണ്ണം വയ്ക്കണമെന്ന് ആഗ്രഹം, ഹരിശ്രീ അശോകൻ നൽകിയ ഉപദേശം!; പഴയ വീഡിയോ വൈറൽ

സ്വന്തം കഠിനാധ്വാനം കൊണ്ട് മലയാള സിനിമാ വ്യവസായത്തിൽ തന്റെതായ ഒരു സാമ്രാജ്യം കെട്ടിപ്പടുക്കാനും ദിലീപിനായി. ​ഇന്ന് മലയാളത്തിലെ മുൻനിര നടനും, നിർമാതാവും, ഡിസ്ട്രിബൂട്ടറും ഒക്കെയാണ് ദിലീപ്.

ദിലീപ് എന്ന നടന്റെ വളർച്ചയിൽ വലിയ പങ്കുവഹിച്ചത് നടൻ അവതരിപ്പിച്ച വേഷങ്ങൾ തന്നെയാണ്. കുഞ്ഞിക്കൂഞ്ഞനായും ചാന്തുപൊട്ടായും മായാമോഹിനിയായും പ്രേക്ഷകരെ വിസ്മയിപ്പിച്ചിട്ടുണ്ട് നടൻ. കോമഡിയും വില്ലത്തരവും ഹീറോയിസവും എല്ലാം തനിക്ക് വഴങ്ങുമെന്നും ദിലീപ് തെളിയിച്ചിട്ടുണ്ട്. എന്നാൽ നടന്റെ കരിയറിലെ കൂടുതൽ ഹിറ്റുകളും പിറന്നത് ഹാസ്യം കൈകാര്യം കഥാപാത്രങ്ങളിലൂടെയാണ്.

ദിലീപ് കോമഡി വേഷങ്ങളിൽ തിളങ്ങിയ മിക്ക ചിത്രങ്ങളിലും എത്തിയിട്ടുള്ള നടനാണ് ഹരിശ്രീ അശോകൻ. മോഹൻലാൽ - ജഗതി കോംബോ പോലെ പ്രേക്ഷകർക്ക് ഇഷ്ടപ്പെട്ട കോംബോയാണ് ഇവരുടേത്. പഞ്ചാബി ഹൗസ്, സിഐഡി മൂസ, ഈ പറക്കും തളിക, കൊച്ചി രാജാവ്, പാണ്ടിപ്പട, റൺവേ തുടങ്ങി നിരവധി ചിത്രങ്ങളിൽ ചിരിപ്പൂരം തീർത്തിട്ടുണ്ട് ഹരിശ്രീ അശോകൻ - ദിലീപ് ജോഡികൾ.

സിനിമയ്ക്ക് പുറത്തും അടുത്ത സുഹൃത്തുക്കളാണ് ഇരുവരും. മിമിക്രി വേദികൾ മുതൽ തുടങ്ങിയതാണ് ഇവർക്കിടയിലെ സൗഹൃദം. ഒരിക്കൽ കൈരളി ടിവിയിലെ ജെബി ജംഗ്ഷൻ എന്ന പരിപാടിയിൽ അതിഥി ആയി എത്തിയപ്പോൾ ദിലീപുമായുള്ള സൗഹൃദത്തെ കുറിച്ച് ഹരിശ്രീ അശോകൻ വാചാലനായിരുന്നു. അതിനിടെ വണ്ണം വയ്ക്കാൻ ഉപദേശം ചോദിച്ച ദിലീപിന് പറഞ്ഞു കൊടുത്ത രസകരമായ ടിപ്പും നടൻ പങ്കുവച്ചിരുന്നു. അതാണ് ഇപ്പോൾ വീണ്ടും പ്രേക്ഷകരുടെ ശ്രദ്ധനേടുന്നത്. ഹരിശ്രീ അശോകന്റെ വാക്കുകൾ ഇങ്ങനെ.

'ദിലീപിന് വലിയ ആഗ്രഹമായിരുന്നു, കുറച്ച് ശരീരം വേണമെന്നൊക്കെ. സിനിമ ആയിരുന്നു അന്നും അവന്റെ ലക്ഷ്യം. ഒരു ദിവസം എന്നോട് വന്നിട്ട് ചോദിച്ചു, 'ചേട്ടാ എനിക്ക് ഒന്ന് തടി വയ്ക്കണം, എന്തെങ്കിലും മാർഗമുണ്ടോ' എന്ന്. ഞാൻ പറഞ്ഞു, 'നിസാര പണിയല്ലേ. എടപ്പാളിൽ ഒരു തങ്ങളുണ്ട്. ആ തങ്ങളെ വിളിച്ചിട്ട് വീടിന്റെ അടുത്ത് ഒരു ചായ്പ്പ് ഉണ്ടാക്കി കൊടുത്താൽ തങ്ങള് വരും. 41 ദിവസം അയാൾക്ക് അവിടെ താമസിക്കണം,'

'ഈ തങ്ങൾ വരുമ്പോൾ ഒരു ആടിനെയും കൊണ്ടുവരും. ഈ ആടിന് 41 ദിവസം 21 പച്ചമരുന്നുകൾ ഇടിച്ച് നെല്ലിൽ കൊടുത്ത് തീറ്റിക്കും. ആ സമയത്തൊക്കെ നീ നിന്റേതായ രീതിയിൽ വൃതത്തിലായിരിക്കണം. 41 -മത്തെ ദിവസം തങ്ങൾ ബിസ്‌മി ചൊല്ലി ആടിനെ അറുക്കും. പുറത്താരും അറിയരുത്. വളരെ രഹസ്യമായിരിക്കണം,'

'എന്നിട്ട് അതിന്റെ തോൽ ഉരിഞ്ഞ് ആടിന്റെ തുടയിലെ ഇറച്ചി സ്ലൈസ് ചെയ്ത് എടുക്കണം. എന്നിട്ട് അത് ഉണക്കണം. എന്നിട്ട് നിനക്ക് എപ്പോൾ തടി വേണമെന്ന് തോന്നുന്നുവോ അപ്പോൾ അത് വെച്ച് കെട്ടിയിട്ട് ഒരു ബനിയൻ ഇട്ടാൽ മതി. ഒക്കെ ആയിരിക്കുമെന്ന് പറഞ്ഞു,' വേദിയെ പൊട്ടിച്ചിരിപ്പിച്ചു കൊണ്ട് ഹരിശ്രീ അശോകൻ പറഞ്ഞു.