മോഹന്‍ലാലിനെ 'ഛോട്ടാ ഭീം' എന്ന് കളിയാക്കി; പിന്നെ മാപ്പ് പറഞ്ഞ് കണ്ടം വഴി ഓടിയ കെആര്‍കെ

എന്നാല്‍ ബോളിവുഡ് താരങ്ങളെ മാത്രമല്ല കെആര്‍കെ ഇത്തരത്തില്‍ അധിക്ഷേപിച്ചിട്ടുള്‌ളത്. മലയാളത്തിന്റെ സൂപ്പര്‍ താരങ്ങളായ മമ്മൂട്ടിയേയും മോഹന്‍ലാലിനേയും പോലും കെആര്‍കെ കടന്നാക്രമിച്ചിട്ടുണ്ട്. ഇതിന്റെ പേരിലും പുലിവാല് പിടിച്ചിരുന്നു കെആര്‍കെ. ആ സംഭവത്തെക്കുറിച്ച് വിശദമായി വായിക്കാം തുടര്‍ന്ന്.

മോഹന്‍ലാല്‍ നായകനായി എത്തുന്ന സ്വപ്‌ന പ്രൊജക്ടായിരുന്നു രണ്ടാംമൂഴം. ചിത്രത്തില്‍ മോഹന്‍ലാല്‍ ഭീമന്‍ ആയി എത്തുമെന്നായിരുന്നു റിപ്പോര്‍ട്ടുകള്‍. ഈ സിനിമ പിന്നീട് ഉപേക്ഷിച്ചുവെങ്കിലും ഒരു സമയത്ത് വലിയ ചര്‍ച്ചാ വിഷയമായിരുന്നു ചിത്രം. അക്കാലത്തായിരുന്നു കെആര്‍കെയുടെ വിവാദ പരാമര്‍ശം. മോഹന്‍ലാല്‍ ഭീം അല്ല, ഛോട്ടാ ഭീം ആണെന്നായിരുന്നു കെആര്‍കെ അന്ന് പറഞ്ഞത്. ഇത് മോഹന്‍ലാലിന്റെ ആരാധകരെ മാത്രമല്ല സിനിമാ ലോകത്തെ ഒന്നടങ്കം ചൊടിപ്പിക്കുന്നതായിരുന്നു.

പിന്നാലെ നിരവധി പേരാണ് കെആര്‍കെയ്‌ക്കെതിരെ രംഗത്തെത്തിയത്. കെആര്‍കെയുടെ ഫെയ്‌സ്ബുക്ക് പേജ് ഹാക്ക് ചെയ്യപ്പെടുക വരെയുണ്ടായി. ഒടുവില്‍ കെആര്‍കെ പതിവു പോലെ മാപ്പ് ചോദിച്ചെത്തുകയായിരുന്നു. മോഹന്‍ലാല്‍ സാര്‍ നിങ്ങളെ ഛോട്ടാ ഭീം എന്ന് വിളിച്ചതിന് മാപ്പ്. നിങ്ങള്‍ എത്ര വലിയ ആളാണെന്ന് എനിക്ക് അറിയില്ലായിരുന്നുവെന്നും ഇപ്പോള്‍ ഞാന്‍ താങ്കളുടെ താരമൂല്യം മനസിലാക്കുന്നു. താങ്കള്‍ മലയാള സിനിമയിലെ സൂപ്പര്‍ താരമാണെന്നായിരുന്നു കെആര്‍കെയുടെ മറുപടി.

അതേസമയം മലയാളത്തിന്റെ മെഗാ സ്റ്റാര്‍ മമ്മൂട്ടിയെ കെആര്‍കെ വിളിച്ചത് സി ക്ലാസ് നടന്‍ എന്നായിരുന്നു. പതിവ് പോലെ ഇതും പ്രതിഷേധത്തിന് കാരണമായി മാറുകയും ചെയ്തിരുന്നു. ഷാരൂഖ് ഖാനെതിരെയുള്ള കെആര്‍കെയുടെ ട്വീറ്റും വലിയ വിവാദമായി മാറിയ ഒന്നായിരുന്നു. ആമിര്‍ ഖാന്റെ ചിത്രമായ സീക്രട്ട് സൂപ്പര്‍സ്റ്റാറിന്റെ സസ്‌പെന്‍സ് പുറത്ത് വിട്ട് ആമിര്‍ ഖാന്റെ ആരാധകരേയും ചൊടിപ്പിച്ചിരുന്നു കെആര്‍കെ. ആമിര്‍ ഖാനെതിരെ ഉന്നയിച്ച ആരോപണങ്ങള്‍ മൂലം സ്വന്തം ചാനലിലെ വീഡിയോകളെല്ലാം തന്നെ കെആര്‍കെയ്ക്ക് നഷ്ടപ്പെട്ടിട്ടുണ്ട്.

കഴിഞ്ഞ ദിവസം ഇന്ത്യന്‍ ക്രിക്കറ്റ് താരം വിരാട് കോഹ്ലിയെക്കുറിച്ചും ഭാര്യയായ നടി അനുഷ്‌ക ശര്‍മയെക്കുറിച്ചുമുള്ള കെആര്‍കയുടെ ട്വീറ്റും വിവാദമായിരുന്നു. ''ഡിപ്രഷന്റെ പ്രശ്നം നേരിടുന്ന ആദ്യത്തെ ഇന്ത്യന്‍ ക്രിക്കറ്റ് താരമാണ് വിരാട് കോഹ്ലി. ഹീറോയിനെ കല്യാണം കഴിക്കുന്നതിന്റെ അന്തരഫലമാണ്. തനിക്ക് ഡിപ്രഷന്‍ ആണെന്ന ചിന്ത അദ്ദേഹത്തിന്റെ തലയില്‍ ഇട്ടത് അവളായിരിക്കണം'' എന്നായിരുന്നു കെആര്‍കയുടെ പരാമര്‍ശം. ഇതിനെതിരേയും വിമര്‍ശനങ്ങള്‍ ഉയര്‍ന്നിരുന്നു.

സല്‍മാന്‍ ഖാനെതിരെയുള്ള പരാമര്‍ശത്തെ തുടര്‍ന്ന് താരം കെആര്‍കെയ്‌ക്കെതിരെ മാന നഷ്ടകേസ് നല്‍കിയിരുന്നു. അന്നും കെആര്‍കെ പരസ്യമായി മാപ്പ് ചോദിക്കുകയായിരുന്നു. തമിഴ് സൂപ്പര്‍ താരം അജിത്തിനെതിരെയും കെആര്‍കെ എത്തിയിരുന്നു. നടിമാരായ വിദ്യ ബാലന്‍, പരിനീതി ചോപ്ര, പ്രിയങ്ക ചോപ്ര, ദീപിക പദുക്കോണ്‍, സൊനാക്ഷി സിന്‍ഹ, സണ്ണി ലിയോണ്‍, ആലിയ ഭട്ട് തുടങ്ങിയവരും ഇയാളുടെ ഇത്തരം ക്രൂര തമാശകള്‍ക്ക് ഇരകളായിട്ടുണ്ട്. വിവാദത്തിലൂടെ വാര്‍ത്തകളില്‍ നിറഞ്ഞു നില്‍ക്കുകയാണ് കെആര്‍കെയുടെ ലക്ഷ്യം.