ഞായറാഴ്ച പുറത്തുവിടാനിരുന്നതാണ്, മകള്‍ക്കൊരു ചീത്തപേരുണ്ടാകരുത്; വിവാഹത്തെക്കുറിച്ച് അഞ്ജലി

ഞായറാഴ്ചയായിരുന്നു താന്‍ വിവാഹിതയായ വിവരം ആരാധകരോട് പങ്കുവെക്കാനായി അഞ്ജലി തിരഞ്ഞെടുത്തിരുന്നത്. എന്നാല്‍ അജിത് രാജു ഇന്ന് രാവിലെ തന്നെ ഈ വിവരം സോഷ്യല്‍ മീഡിയയിലൂടെ പങ്കുവെക്കുകയായിരുന്നു. പിന്നാലെ തന്നെ തേടി മാധ്യമങ്ങളില്‍ നിന്നുമുള്ള അന്വേഷണങ്ങളും ആരാധകരുടെ ആശംസകളും എത്തുകയാണെന്നാണ് അഞ്ജലി പറയുന്നത്. തിരുവിലാമല സ്വദേശിയാണ് അജിത്. രണ്ടു പേരുടേയും രണ്ടാം വിവാഹമാണിത്. 2016 ലാണ് അഞ്ജലിയുടെ ആദ്യ വിവാഹ ബന്ധം പിരിയുന്നത്.

അജിത്തിനെ കുറച്ച് നാളുകളായി പരിചയമുണ്ടായിരുന്നു. നല്ല സുഹൃത്തുക്കളാണ്. പിന്നാലെ വീട്ടുകാരുമായി ആലോചിച്ച് വിവാഹം എന്ന തീരുമാനത്തിലേക്ക് എത്തുകയായിരുന്നുവെന്നാണ് അഞ്ജലി പറയുന്നത്. വിവാഹിതയായ വിവരം പുറം ലോകവുമായി പങ്കുവെക്കാനുള്ള തീരുമാനത്തിന് പിന്നിലെ കാരണവും അഞ്ജലി പറയുന്നുണ്ട്. വിവാഹ വിവരം മറച്ചു വെക്കുന്നത് കൊണ്ട് മകള്‍ക്കൊരു ബുദ്ധിമുട്ടുണ്ടാകരുതെന്നാണ് അഞ്ജലി പറയുന്നത്. പുറത്ത് പോകുമ്പോള്‍ എല്ലാവരും തിരിച്ചറിയണമെന്നില്ല. അതിനാല്‍ അവള്‍ക്കൊരു ചീത്തപ്പേരുണ്ടാകരുതെന്ന് കരുതിയാണ് അറിയിക്കാന്‍ തീരുമാനിച്ചതെന്നാണ് അഞ്ജലി പറയുന്നത്.

അതേസമയം, താരത്തിന് ആശംസകളുമായി എത്തുകയാണ് സോഷ്യല്‍ മീഡിയയും ആരാധകരും. നിരവധി ആരാധകരാണ് അജിത്തിന്റെ പോസ്റ്റിന്് കമന്റുകളുമായി എത്തിയിരിക്കുന്നത്. ബാല താരമായാണ് അഞ്ജലി സിനിമയിലെത്തുന്നത്. പിന്നീട് മോഡലായും അവതാരകയായും മികവ് തെളിയിച്ച അഞ്ജലി നിരവധി സിനിമകളില്‍ അഭിനയിച്ചിട്ടുണ്ട്. തമിഴിലൂടെയായിരുന്നു അഞ്ജലി നായികയായി മാറുന്നത്. നെല്ല് എന്ന ചിത്രത്തിലൂടെയായിരുന്നു നായികയായി അരങ്ങേറുന്നത്. പിന്നീട് സീനിയേഴ്‌സിലൂടെ അഞ്ജലി മലയാളത്തിലേക്കും എത്തുകയായിരുന്നു. നിരവധി സിനിമകളില്‍ അഭിനയിച്ചിട്ടുള്ള അഞ്ജലിയെ തേടി മികച്ച സ്വഭാവ നടിക്കുള്ള സംസ്ഥാന ചലച്ചിത്ര പുരസ്‌കാരവും എത്തിയിരുന്നു. ബെന്‍ എന്ന ചിത്രത്തിലെ പ്രകടനത്തിനായിരുന്നു പുരസ്‌കാരം ലഭിച്ചത്.

Recommended Video

ലാലേട്ടനെ ചതിച്ച് കിട്ടിയത് ഓസ്ക്കാർ | Anjali Nair Exclusive Interview | Filmibeat Malayalam

ഇന്ന് റിലീസ് ചെയ്ത് ആറാട്ട് ആണ് അഞ്ജലിയുടെ ഏറ്റവും പുതിയ സിനിമ. മോഹന്‍ലാല്‍ നായകനായ ചിത്രം സംവിധാനം ചെയ്തിരിക്കുന്നത് ബി ഉണ്ണികൃഷ്ണന്‍ ആണ്. നിരവധി സിനിമകളാണ് അഞ്ജലിയുടേതായി പുറത്തിറങ്ങാനുള്ളത്. റാം, അവിയല്‍, കൊച്ചാള്‍, തുടങ്ങി നിരവധി സിനിമകള്‍ അഞ്ജലിയുടേതായി അണിയറയിലുണ്ട്. മലയാളത്തിന് പുറമെ തമിഴിലും സാന്നിധ്യം അറിയിച്ചിട്ടുള്ള അഞ്ജലി വികൃതി എന്ന സിനിമയുടെ എക്സിക്യൂട്ടീവ് പ്രൊഡ്യൂസറും കൂടിയായിരുന്നു. രണ്ട് തമിഴ് സിനിമകളും അണിയറയില്‍ തയ്യാറെടുക്കുന്നുണ്ട്. നേരത്തെ തന്റെ വിവാഹത്തെക്കുറിച്ചും വിവാഹ മോചനത്തെക്കുറിച്ചുമൊക്കെയുള്ള വ്യാജ വാര്‍ത്തകള്‍ക്കെതിരെ അഞ്ജലി രംഗത്ത് എത്തിയിരുന്നു.