സൗബിനെ എടുത്തിട്ട് പെരുമാറുന്നത് കണ്ടപ്പോള്‍ സഹിക്കാന്‍ കഴിഞ്ഞില്ല.. വല്ലാതെ സങ്കടമായി!

പറവയ്ക്ക് അഭിനന്ദനവുമായി ബാലചന്ദ്രമേനോന്‍

ആരാധകരും സിനിമാപ്രവര്‍ത്തകരും ഉള്‍പ്പടെ പറവ കാണുന്നവരെല്ലാം സൗബിനെ അഭിനന്ദിക്കുകയാണ്. കഴിഞ്ഞ ദിവസം ചിത്രം കണ്ട ബാലചന്ദ്രമേനോന്‍ ചിത്രത്തെക്കുറിച്ച് ഫേസ്ബുക്കിലൂടെയാണ് പ്രതികരിച്ചിട്ടുള്ളത്. മട്ടാഞ്ചേരിയെക്കുറിച്ചും അവിടത്തെ ജനങ്ങളെക്കുറിച്ചും കൃത്യമായി മനസ്സിലാക്കാന്‍ കഴിഞ്ഞുവെന്നും അദ്ദേഹം പറയുന്നു.

ആരോഗ്യപരമായ മാറ്റം

ന്യൂജനറേഷന്‍ ചിത്രമെന്ന നിലയില്‍ ഈ ചിത്രത്തില്‍ ചില മാറ്റങ്ങള്‍ സംഭവിച്ചിട്ടുണ്ട്. കഥാപാത്രങ്ങളുടെ അച്ഛനും അമ്മയും മറനീക്കി പുറത്തുവന്നിട്ടുണ്ട്. കഥാപാത്രത്തിന്‍രെ ഉമ്മയും വാപ്പയുമൊന്നും കതകിന് അപ്പുറത്തല്ലെന്നും അദ്ദേഹം പറയുന്നു.

വാപ്പയുടെ മനസ്സ് നോവിച്ചാല്‍

വാപ്പയുടെ മനസ്സ് നോവിച്ചാല്‍ പ്രാക്കുണ്ടാകുമെന്ന് പറയുന്ന ദുല്‍ഖര്‍ കഥാപാത്രവുംവാപ്പയോട് അപമര്യാദയായി പെരുമാറുന്ന മകനോട് തട്ടിക്കയറുന്ന ഉമ്മയും ന്യൂ ജനറേഷന്‍ സിനിമയ്ക്ക് പുതിയ മാനം നല്‍കിയിരിക്കുകയാണ്.

കുഞ്ഞു മിടുക്കന്‍മാര്‍ക്ക് അഭിനന്ദനങ്ങള്‍

ഇത്തരത്തിലുള്ള വിഷയം പ്രതിപാദിച്ച് മുന്‍പ് പുറത്തിറങ്ങിയ ചിത്രങ്ങളേക്കാള്‍ കൂടുതല്‍ സത്യസന്ധത ഈ ചിത്രത്തിലൂടെ അനുഭവപ്പെടുന്നു. പ്രാവ് പയ്യന്‍മാരുടെ സൗഹൃദം ഏറം രസകരമാണ്. കുഞ്ഞു മിടുക്കന്‍മാരുടെ പ്രകടനം ഏറെ മികച്ചു നില്‍ക്കുന്നു.

സൗബിനെ എടുത്തിട്ട് പെരുമാറി

മുന്‍പ് കണ്ട ചിത്രങ്ങളിലൂടെയെല്ലാമായി സൗബിനെ ഇഷ്ടപ്പെട്ടതുകൊണ്ടാണെന്നു തോന്നു അവസാനം എടുത്തിട്ട് പെരുമാറുന്നത് കണ്ടപ്പോള്‍ സങ്കടമായി. സംവിധായകനെ ബഹുമാനിക്കണം എന്ന മനസ്സിലിരിപ്പാണോ ഇതിന് കാരണമെന്ന് അറിയില്ല.

ഇനിയും പറന്നുയരട്ടെ

ഇത്തരത്തില്‍ ന്യൂജന്‍ അഭിനേതാക്കളില്‍ നിന്നായി ഇനിയും പറവകള്‍ പറന്നുയരട്ടെയെന്നും ബാലചന്ദ്രമേനോന്‍ കുറിച്ചിട്ടുണ്ട്. മികച്ച പ്രതികരണവുമായി തിയേറ്ററുകളില്‍ പ്രദര്‍ശനം തുടരുകയാണ് പറവ.