'മോഹൻലാലിനെ വെച്ച് റീച്ച് കൂട്ടാതെ... കഴിവ് തെളിയിച്ച് കാണിക്കഡാ..'; ചുട്ടമറുപടിയുമായി അനീഷ് ഉപാസന

കഴിഞ്ഞ ദിവസമാണ് മോഹൻലാൽ ചിത്രം മരക്കാർ അറബിക്കടലിന്റെ സിം​ഹം തിയേറ്ററുകളിലെത്തിയത്. ആദ്യ ഷോ കഴിഞ്ഞപ്പോൾ മുതൽ സിനിമയെ ഡീ​ഗ്രേഡ് ചെയ്തുള്ള വിമർശനങ്ങളും അണിയറപ്രവർത്തകർക്ക് നേരെയുള്ള ചീത്തവിളിയും സോഷ്യൽമീഡിയയിൽ വ്യാപകമായി നടക്കുന്നുണ്ട്. പ്രിയദർശൻ അടക്കമുള്ളവരുടെ സോഷ്യൽമീഡിയ പേജുകളിൽ വലിയ രീതിയിലുള്ള സൈബർ ആക്രമണമാണ് നടക്കുന്നത്. അനീഷ് ഉപാസനയ്ക്ക് നേരെയും വിമർശനമുയർന്നു. നടൻ മോഹൻലാലിന്റെ ഫോട്ടോകൾ മാത്രം പകർത്തുന്നുവെന്ന് കാണിച്ചായിരുന്നു വിമർശനം. തന്റെ സോഷ്യൽമീഡിയ പേജിൽ വന്ന അശ്ലീല കമന്റ് സ്ക്രീൻ ഷോട്ട് സഹിതം പങ്കുവെച്ച് വിമർശകന് അനീഷ് ഉടൻ മറുപടി നൽകുകയും ചെയ്തു.

'മോഹന്‍ലാലിനെ മാത്രം വെച്ച്‌ ഫോട്ടോകളെടുത്ത് റീച്ച്‌ കൂട്ടാതെ മറ്റ് താരങ്ങളെ വെച്ച്‌ ഫോട്ടോകളെടുത്ത് സ്‌കില്‍ തെളിയിക്ക്' എന്നാണ് സജിത്ത് പ്രസാദ് എന്നയാള്‍ അനീഷിന്‍റെ ഫേസ്ബുക്ക് പേജിൽ കമന്‍റ് ചെയ്തത്. കമന്റ് ശ്രദ്ധയിപ്പെട്ട അനീഷ് ഉടൻ തന്നെ കുറിക്കുകൊള്ളുന്ന മറുപടിയും നൽകി. 'ഞാനൊരു മികച്ച ഫോട്ടോഗ്രാഫറൊന്നുമല്ല... പക്ഷേ ഞാനൊരു മികച്ച ലാൽ സാർ ഫാനാണ്. എന്‍റെ ഫോട്ടോഗ്രാഫി സ്കിൽ തെളിയിച്ചത് ലാൽ സാറിന്‍റെ മാത്രം ഫോട്ടോ എടുത്തിട്ടല്ല ബ്രോ.. പിന്നെ റീച്ച്... അതുണ്ടാവും.. കാരണം ഫ്രെയ്മിൽ ലാൽ സാർ ആണ്.... അല്ലാതെ പ്രസാദേട്ടൻ അല്ല' എന്നാണ് അനീഷ് ഫേസ്ബുക്കിൽ മറുപടി കുറിച്ചത്. അനീഷിന്റെ മറുപടി ‌വന്നതോടെ നിരവധി പേർ അനീഷിനെ അനുകൂലിച്ച് രം​ഗത്തെത്തി. 'അപൂര്‍വ്വമായ സ്വപ്ന തുല്യമായ ഒരു സൗഭാഗ്യമാണ് താങ്കള്‍ക്ക് ലഭിച്ചിരിക്കുന്നത്. അതില്‍ അസൂയ ഉള്ളവര്‍ നിരവധി ഉണ്ടാവും. ചിലര്‍ അത് അടക്കി നിര്‍ത്തും. ചിലര്‍ക്ക് അതിന് കഴിയില്ല. അതിങ്ങനെ കമന്റ് കോളങ്ങളില്‍ നുരഞ്ഞ് പൊന്തും. ചൊറിഞ്ഞ് തീര്‍ക്കട്ടെ എന്നേ അവരോട് പറയാനുള്ളൂ. താങ്കള്‍ താങ്കളുടെ ജോലി ചെയ്യുക. ആശംസകള്‍' എന്നാണ് അനീഷിനെ പിന്തുണച്ച ഒരാൾ മകന്റ് ചെയ്തത്.

Recommended Video

കുഞ്ഞാലി മരക്കാറായി മമ്മൂട്ടി,സംവിധാനം സന്തോഷ് ശിവൻ,കിടിലൻ തിരക്കഥ | FilmiBeat Malayalam

പ്രിയദർശൻ സംവിധാനം ചെയ്ത ബി​ഗ് ബജറ്റ് സിനിമയായിരുന്നു മരക്കാർ അറബിക്കടലിന്റെ സിംഹം. മോഹൻലാൽ അടക്കമുള്ള വമ്പൻതാര നിര അണിനിരന്ന ചിത്രത്തിന് സമ്മിശ്ര പ്രതികരണമാണ് പ്രേക്ഷകരിൽ നിന്നും ലഭിച്ചത്. രണ്ട് വർഷത്തോളം നീണ്ട കാത്തിരിപ്പിന് ശേഷമാണ് മരക്കാർ അറബിക്കടലിന്റെ സിംഹം തിയേറ്ററുകളിലെത്തിയത്. എല്ലാത്തരം കാഴ്ചക്കാരെയും സിനിമയ്ക്ക് സംതൃപ്തി പെടുത്താൻ കഴിയാത്തതിനാൽ സിനിമയെ മനപൂർവം ഡീ​ഗ്രേഡ് ചെയ്യുന്ന രീതി ഇപ്പോൾ മരക്കാർ സിനിമയ്ക്ക് നേരെ നടക്കുന്നുണ്ടെന്ന വിമർശനവും സോഷ്യൽമീഡിയയിൽ നിന്നും ഉയരുന്നുണ്ട്.