സി യു സൂണിന് രണ്ടാം ഭാഗം വരുന്നു; ആവേശവാര്‍ത്ത പുറത്ത് വിട്ട് ഫഹദും മഹേഷ് നാരായണനും

ഇപ്പോഴിതാ സി യു സൂണിന് ഒരു രണ്ടാം ഭാഗം ഒരുങ്ങുന്നതായാണ് ഏറ്റവും പുതിയ വാര്‍ത്ത. ചിത്രത്തിന്റെ സംവിധായകനായ മഹേഷ് നാരായണനും ഫഹദ് ഫാസിലുമാണ് ഈ വാര്‍ത്ത് പുറത്ത് വിട്ടിരിക്കുന്നത്. കഴിഞ്ഞ ദിവസം ബോളിവുഡ് ലൈഫിന് നല്‍കിയ അഭിമുഖത്തിലാണ് മഹേഷും ഫഹദും രണ്ടാം ഭാഗത്തെക്കുറിച്ച് വെളിപ്പെടുത്തിയത്. തീര്‍ച്ചയായും, ഞങ്ങള്‍ അതിനായി ശ്രമിച്ചു കൊണ്ടിരിക്കുകയാണ്. എന്നായിരുന്നു സി യു സൂണിന്റെ രണ്ടാം ഭാഗത്തെക്കുറിച്ച് ചോദിച്ചപ്പോള്‍ മഹേഷ് നല്‍കിയ മറുപടി.

അതേസമയം തീയേറ്റര്‍ റിലീസായിരിക്കും ഉദ്ദേശിക്കുന്നതെന്നും മഹേഷ് വ്യക്തമാക്കി. ആദ്യഭാഗം ഒടിടി റിലീസായിരുന്നു. തീയേറ്ററുകള്‍ തുറക്കണം, അതിന് ലോകം പഴയത് പോലെയാകണമെന്നും മഹേഷ് പറഞ്ഞു. എന്നാല്‍ രണ്ടാം ഭാഗം ആദ്യ ഭാഗത്തിന്റെ തുടര്‍ച്ചയായിരിക്കില്ലെന്നും ആദ്യ ഭാഗത്തില്‍ കാണാതെ പോയ കാര്യങ്ങളായിരിക്കും രണ്ടാം ഭാഗത്തിലെന്നും എന്നാല്‍ ആദ്യ ഭാഗത്തില്‍ കണ്ടതൊന്നും രണ്ടാം ഭാഗത്തില്‍ ഉണ്ടാകില്ലെന്നും ഫഹദ് വ്യക്തമാക്കുന്നുണ്ട്.

അതേസമയം ഫഹദ് ഫാസിലും മഹേഷ് നാരായണനും ഒരുമിക്കുന്ന മാലിക് റിലീസിന് തയ്യാറെടുക്കുകയാണ്. ജൂലൈ 15ന് ആമസോണ്‍ പ്രെെമിലൂടെയാണ് ചിത്രത്തിന്റെ റിലീസ്. തീയേറ്റര്‍ റിലീസിനായി കാത്തിരിക്കുകയായിരുന്നു. എന്നാല്‍ ലോക്ക്ഡൗണ്‍ നീണ്ടു പോകുന്ന സാഹചര്യത്തില്‍ ഒടിടി റിലീസ് എന്ന തീരുമാനത്തില്‍ എത്തുകയായിരുന്നു. ഫഹദ് ഫാസിലിന്റെ കരിയറില്‍ തന്നെ ഏറ്റവും കൂടുതല്‍ മുതല്‍മുടക്കുള്ള ചിത്രമാണ് മാലിക്. വന്‍ താരനിര തന്നെയാണ് ചിത്രത്തിലുളളത്. നിമിഷ സജയന്‍, ജോജു ജോര്‍ജ്, ദിലീഷ് പോത്തന്‍, വിനയ് ഫോര്‍ട്ട് തുടങ്ങിയവര്‍ ചിത്രത്തിലുണ്ട്. ആരാധകര്‍ ഏറെ പ്രതീക്ഷയോടെയാണ് കാത്തിരിക്കുന്നത്. ചിത്രത്തിന്റെ ട്രെയിലര്‍ വന്‍ ഹിറ്റായി മാറിയിരുന്നു.