'ജനിക്കും മുമ്പേ നിങ്ങളെന്നെ സ്‌നേഹിച്ചു'; 'ജൂനിയര്‍ സി'യെ ആരാധകര്‍ക്ക് പരിചയപ്പെടുത്തി മേഘ്‌ന രാജ്

മേഘ്നയ്ക്കും കുഞ്ഞിനും ആശംസകള്‍ നേര്‍ന്നു കൊണ്ട് മലയാള സിനിമാലോകവും എത്തിയിരുന്നു. അന്നു മുതല്‍ ജൂനിയര്‍ ചീരുവിനെ കാണാനായി കാത്തിരിക്കുകയായിരുന്നു ആരാധകര്‍. ആ കാത്തിരിപ്പിന് ഈ പ്രണയ ദിനത്തില്‍ അവസാനമായിരിക്കുകയാണ്. തന്റെ മകന്റെ വീഡിയോ സോഷ്യല്‍ മീഡിയയിലൂടെ ആരാധകര്‍ക്കായി പങ്കുവച്ചിരിക്കുകയാണ് മേഘ്ന. പ്രണയദിനത്തില്‍ പുലര്‍ച്ചെ പന്ത്രണ്ട് മണിയ്ക്കാണ് മേഘ്ന വീഡിയോ പുറത്ത് വിട്ടിരിക്കുന്നത്.

ജൂനിയര്‍ സി എന്നാണ് മകനെ പരിചയപ്പെടുത്തി കൊണ്ട് മേഘ്ന വിളിച്ചിരിക്കുന്നത്. എല്ലാവരുടേയും സ്നേഹത്തിനും പിന്തുണയ്ക്കും നന്ദി പറയുന്നതായും മേഘ്ന കുറിക്കുന്നുണ്ട്. പി്ന്നാലെ ആരാധകരും സിനിമാലോകവും താരത്തിനും മകനും ആശംസകളുമായെത്തിയിട്ടുണ്ട്. നടി നസ്രിയയും കുഞ്ഞിന്റെ ചിത്രം പങ്കുവച്ചു കൊണ്ട് ആശംസകള്‍ നേരുന്നുണ്ട്. മേഘ്നയും നസ്രിയയും വളരെ അടുത്ത സുഹൃത്തുക്കളാണ്. ചീരുവിന്റെ മരണത്തെ കുറിച്ച് നസ്രിയ കുറിച്ച വാക്കുകള്‍ സോഷ്യല്‍ മീഡിയയില്‍ വൈറലായിരുന്നു.

2018 ഏപ്രില്‍ 30നായിരുന്നു മേഘ്നയും ചിരഞ്ജീവിയും വിവാഹിതരാകുന്നത്. പക്ഷെ വിധി വെറും രണ്ട് വര്‍ഷത്തേക്കാണ് ഈ ദാമ്പത്യത്തിന് ആയുസ് നല്‍കിയത്. 2020 ജൂണ്‍ ഏഴിന് ചീരുവിനെ മരണം കൂടെക്കൂട്ടുകയായിരുന്നു. ആ സമയത്ത് നാല് മാസം ഗര്‍ഭിണിയായിരുന്നു മേഘ്ന. 2020 ഒക്ടോബര്‍ 22നാണ് മേഘ്ന ആണ്‍കുഞ്ഞിന് ജന്മം നല്‍കുന്നത്.

ഞങ്ങളുടെ കുഞ്ഞ് രാജകുമാരനെ പരിചയപ്പെടുത്തുന്നു എന്നാണ് വീഡിയോ പങ്കുവച്ചുകൊണ്ട് മേഘ്ന കുറിച്ചിരിക്കുന്നത്. ''ഞാന്‍ ജനിക്കും മുമ്പ് തന്നെ നിങ്ങളെന്നെ സ്നേഹിച്ചു തുടങ്ങിയിരുന്നു. നമ്മള്‍ ആദ്യമായി കാണുമ്പോള്‍ ഒന്നു മാത്രമാണ് എനിക്ക് ചെയ്യാനുള്ളത്. അമ്മയ്ക്കും അപ്പയ്ക്കും നല്‍കുന്ന ഈ സ്നേഹത്തിനും പിന്തുണയ്ക്കും ഊഷ്മളതയ്ക്കും എന്റെ കുഞ്ഞ് ഹൃദയത്തിന്റെ അടിത്തട്ടില്‍ നിന്നും നന്ദി പറയുകയാണത്. നിങ്ങള്‍ കുടുംബമാണ്. ഉപാധികളില്ലാതെ സ്നേഹിക്കുന്നവരാണ് കുടുംബം. എല്ലാവരോടും സ്നേഹം'' എന്നാണ് വീഡിയോയുടെ കൂടെ മേഘ്ന എഴുതിയിരിക്കുന്നത്.

നടി നസ്രിയയും വീഡിയോയ്ക്ക് കമന്റ് ചെയ്തിട്ടുണ്ട്. പിന്നാലെ വീഡിയോ പങ്കുവയ്ക്കുകയും ചെയ്തിട്ടുണ്ട് നസ്രിയ. മേഘ്നയുടെ കുഞ്ഞിന്റെ വീഡിയോ സോഷ്യല്‍ മീഡിയയില്‍ ആരാധകര്‍ ഏറ്റെടുത്തിരിക്കുകയാണ്. നിരവധി പേരാണ് കമന്റുകളിലൂടെ തങ്ങളുടെ സ്നേഹവും പിന്തുണയും അറിയിച്ചു കൊണ്ട് രംഗത്ത് എത്തിയിരിക്കുന്നത്. ചീരുവിന്റെ സ്നേഹം എന്നും നിങ്ങളെ മുന്നോട്ട് നയിക്കുകയും കരുതലോടെ കാക്കുകയും ചെയ്യുമെന്ന് ആരാധകര്‍ പറയുന്നു.

ചിന്തുവെന്നാണ് മകന് മേഘ്ന നല്‍കിയിരിക്കുന്ന പേര്. നേരത്തെ കുഞ്ഞിന്റെ തൊട്ടില്‍ ചടങ്ങില്‍ നിന്നുള്ള ചിത്രങ്ങളും വാക്സിനേഷന്‍ ചിത്രങ്ങളുമെല്ലാം സോഷ്യല്‍ മീഡിയയില്‍ വൈറലായി മാറിയിരുന്നു. എന്നാല്‍ കുഞ്ഞിന്റെ മുഖം ഇതുവരേയും പുറത്ത് വിട്ടിരുന്നില്ല. ഇതിനായി കാത്തിരിക്കുകയായിരുന്നു ആരാധകര്‍. ആ കാത്തിരിപ്പിനാണ് പ്രണയദിനത്തില്‍ മേഘ്ന അവസാനമാക്കിയിരിക്കുന്നത്.