'ചേച്ചിയേക്കാൾ ഉപരി നല്ലൊരു സുഹൃത്ത്', അനുശ്രീക്ക് പിറന്നാൾ ആശംസകൾ നേർന്ന് സ​ഹോദരി ശ്രീക്കുട്ടി

കഴിഞ്ഞ ദിവസം അനുശ്രീ മുപ്പത്തിയൊന്നാം പിറന്നാൾ ആഘോഷിച്ചിരുന്നു. സിനിമാ സുഹൃത്തുക്കളും ബന്ധുക്കളും സഹോദരങ്ങളുമെല്ലാം അനുശ്രീക്ക് പിറന്നാൾ ആശംസകൾ നേർന്നിരുന്നു. നമിതാ പ്രമോദ്, റിമി ടോമി എന്നിവരെല്ലാം പ്രിയ കൂട്ടുകാരിക്ക് ആശംസകൾ നേർന്നിരുന്നു. അനുശ്രീയുടെ പിറന്നാൾ ദിനത്തിൽ സഹോദരി ശ്രീകുട്ടി സോഷ്യൽമീഡിയയിൽ എഴുതിയ വാക്കുകളാണ് ഇപ്പോൾ ശ്രദ്ധനേടുന്നത്. അനുശ്രീയും ശ്രീക്കുട്ടിയും ചേച്ചി അനിയത്തി എന്ന ബന്ധത്തിനപ്പുറം നല്ല സുഹൃത്തുക്കൾ കൂടിയാണ്. അത് വീണ്ടും ഊന്നിപറയുന്ന കുറിപ്പാണ് ശ്രീക്കുട്ടി എഴുതിയിരിക്കുന്നത്.

ഒരു സഹോദരിക്കും ഉപരി എല്ലാ കാര്യങ്ങളും തുറന്ന് പറയാൻ പറ്റുന്ന സുഹൃത്താണ് അനുശ്രീയെന്നാണ് ശ്രീക്കുട്ടി പറഞ്ഞിരിക്കുന്നത്. വഴക്ക് പറയേണ്ടിടത്ത് വഴക്ക് പറയാനും സ്നേഹിക്കേണ്ടിടത്ത് സ്നേഹിക്കാനും ഇനിയും കൂടെ വേണമെന്നും ശ്രീക്കുട്ടി പോസ്റ്റിലൂടെ പറയുന്നുണ്ട്. 'ഒപ്പം ഉണ്ടായിരുന്ന ഓരോ നിമിഷങ്ങളും എന്നും മധുരമുള്ള ഓർമ്മകൾ ആയിരുന്നു... ജീവിതത്തിലെ പ്രധാനപ്പെട്ട ഓരോ ടേണിങ് പോയിന്റിലും ആ സ്നേഹവും ചേർത്ത് നിർത്തലും ഒക്കെ ഒരുപാട് ധൈര്യം തന്നിട്ടുണ്ട്. ഒരു സഹോദരിക്കും ഉപരി എല്ലാ കാര്യങ്ങളും തുറന്നുപറയാൻ പറ്റുന്ന സുഹൃത്ത്.... വഴക്ക് പറയേണ്ടിടത്ത് വഴക്ക് പറയാനും സ്നേഹിക്കേണ്ടിടത്ത് സ്നേഹിക്കാനും ഇനിയും കൂടെ വേണം എന്നും... എന്റെ ചേച്ചിക്ക് പിറന്നാൾ ഉമ്മകൾ' എന്നായിരുന്നു ശ്രീക്കുട്ടി അനുശ്രീക്ക് പിറന്നാൾ ആശംസിച്ച് കുറിച്ചത്.

Recommended Video

ശബരിമല വിഷയത്തിൽ അനുശ്രീയ്ക്ക് മറുപടിയുമായി മാധ്യമപ്രവർത്തക | FilmiBeat Malayalam

നാളുകൾക്ക് മുമ്പ് ശ്രീക്കുട്ടിയുടെ വിവാഹത്തിനോട് അനുബന്ധിച്ച് നടന്ന ഹൽദി ആഘോഷങ്ങളുടെ വീഡിയോയും ഫോട്ടോകളും അനുശ്രീ സോഷ്യൽമീഡിയയിൽ പങ്കുവെച്ചിരുന്നു. ഹൽദി ചടങ്ങുകളിൽ മാസ് ലുക്കിലാണ് അനുശ്രീ എത്തിയത്. കളർ മുണ്ടും ഷര്‍ട്ടും കൂളിങ് ഗ്ലാസും ധരിച്ച് തകർപ്പൻ സ്റ്റൈലിലാണ് താരം ചടങ്ങിൽ പങ്കാളിയായത്. ജീവിതത്തിൽ ആദ്യമായാണ് ഒരു ഹൽദി ചടങ്ങിൽ പങ്കെടുക്കുന്നതെന്നും ഒരുപാട് ആസ്വദിച്ചെന്നും ശ്രീക്കുട്ടിക്ക് ആശംസകൾ നേർന്ന് ചിത്രങ്ങൾക്കൊപ്പം അനുശ്രീ കുറിച്ചു. മൈ സാന്റയാണ് അവസാനമായി അനുശ്രീയുടേതായി റിലീസിനെത്തി സിനിമ. മോഹൻലാൽ ചിത്രം 12ത്ത് മാനിൽ അനുശ്രീ ശ്രദ്ധേയമായ ഒരു വേഷം ചെയ്തിട്ടുണ്ട്. അടുത്തിടെ സെറ്റിൽ നിന്നും മോഹൻലാലിനൊപ്പം നിൽക്കുന്ന ഫോട്ടോ അനുശ്രീ പങ്കുവെച്ചിരുന്നു. താരയാണ് ഇപ്പോൾ ചിത്രീകരണം നടന്നുകൊണ്ടിരിക്കുന്ന അനുശ്രീയുടെ മറ്റൊരു സിനിമ.