45 മിനുറ്റ് അടിയും ഇടിയും കാണാം, 2 മിനുറ്റ് ലവ് സീന്‍ പറ്റില്ല; വിമര്‍ശകരോട് ടൊവിനോ

ടൊവിനോയ്‌ക്കെതിരെ വ്യക്തിപരമായി തന്നെ ചിലര്‍ അധിക്ഷേപം നടത്തിയിരുന്നു. അഭിനയിക്കാന്‍ അറിയാത്തത് കൊണ്ടാണ് ചുംബന രംഗങ്ങള്‍ ചെയ്ത് സിനിമയില്‍ പിടിച്ചു നില്‍ക്കുന്നതെന്ന് പോലും ചിലര്‍ അധിക്ഷേപിക്കുകയുണ്ടായി. എന്നാല്‍ ഇപ്പോഴിതാ തനിക്കെതിരേയും കളയിലെ ചുംബന രംഗത്തിനെതിരേയും ഉയരുന്ന വിമര്‍ശനങ്ങള്‍ക്ക് മറുപടിയുമായി ടൊവിനോ എത്തിയിരിക്കുകയാണ്. സിനിമ എക്‌സ്പ്രസിന് നല്‍കിയ അഭിമുഖത്തിലാണ് ടൊവിനോയുടെ പ്രതികരണം.

' ഞാന്‍ ഇത്തരത്തിലുള്ള ചില പോസ്റ്റുകള്‍ കണ്ടിരുന്നു. സിനിമ സിനിമ ഗംഭീരമാണ്, പക്ഷേ അവര്‍ക്ക് പ്രണയ രംഗങ്ങള്‍ ഒഴിവാക്കാമായിരുന്നു അത്തരം രംഗങ്ങള്‍ ഒരു കുടുംബത്തോടൊപ്പം കാണാന്‍ പ്രയാസമാണ് എന്നൊക്കെയുള്ള തരത്തില്‍. പക്ഷേ ഒരു 'എ' സര്‍ട്ടിഫൈഡ് സിനിമയില്‍, 45 മിനുറ്റ് അടിയും ഇടിയും കാണാം, അത കുഴപ്പമില്ല, പക്ഷേ രണ്ട് മിനുറ്റ് പ്രണയ രംഗം കാണാന്‍ സാധിക്കില്ല, ഇതിലെ യുക്തി എവിടെ? എന്നായിരുന്നു ടൊവിനോ പ്രതികരിച്ചത്. കളയിലെ യഥാര്‍ത്ഥ വില്ലന്‍ താന്‍ അവതരിപ്പിച്ച ഷാജിയാണെന്നും ടൊവിനോ പറഞ്ഞു.

തന്റെ താരപരിവേഷം ഉപയോഗിച്ച് കളയിലെ ഹീറോ ഷാജിയാണെന്ന് ആളുകളെ തെറ്റിദ്ധരിപ്പിക്കുകയായിരുന്നു. അയാളാണ് ശരിക്കും വില്ലന്‍. ഷാജിയെന്ന വ്യക്തിയെ തകര്‍ക്കാനല്ല മൂറിന്റെ കഥാപാത്രം എത്തുന്നതെന്നും ഷാജിയിലെ ഈഗോയെ ഇല്ലാതാക്കാന്‍ ആണെന്നും ടൊവിനോ പറഞ്ഞു. മറ്റൊരു ആക്ഷന്‍ പടമാണെന്നായിരുന്നു കളയെ കുറിച്ച് പലരും കരുതിയിരുന്നത്. എന്ത് തിരക്കഥയാണിതെന്നും ഇതില്‍ കഥ എന്താണെന്നും ചിലര്‍ ചോദിക്കുന്നത് കേട്ടിരുന്നുവെന്നും ഷാജി മാസ് ഹീറോയായി മാറുന്നത് കാണാന്‍ ആയിരുന്നു അവര്‍ ആഗ്രഹിച്ചിരുന്നതെന്നും അത് കേള്‍ക്കുമ്പോള്‍ ചിരിയാണ് വരുന്നതെന്നും ടൊവിനോ പറഞ്ഞു.

Recommended Video

Kala Movie Theatre Response | FilmiBeat Malayalam

രോഹിത് വിഎസ് ആണ് കളയുടെ സംവിധായകന്‍. ലാല്‍, ദിവ്യ പിള്ള എന്നിവരും പ്രധാന വേഷങ്ങളിലെത്തുന്നു. യദു പുഷ്‌കരനും രോഹിത്തും ചേര്‍ന്നാണ് തിരക്കഥയൊരുക്കിയിരിക്കുന്നത്. അഖില്‍ ജോര്‍ജ് ആണ് ഛായാഗ്രഹണം. ചിത്രത്തിന്റെ സഹനിര്‍മ്മാതാവുമാണ് ടൊവിനോ. ചിത്രം മികച്ച പ്രതികരണങ്ങളാണ് നേടുന്നത്. സോഷ്യല്‍ മീഡിയയിലൂടെ ചിത്രത്തെ അഭിനന്ദിച്ചു കൊണ്ട് നിരവധി പേര്‍ രംഗത്ത് എത്തിയിരുന്നു. മൂറിന്റെ പ്രകടനവും ഏറെ കൈയ്യടി നേടിയതായിരുന്നു.