കാത്തിരിപ്പ് വെറുതെയായില്ല; ആവേശവും വേദനയും നല്‍കി മണി ഹീസ്റ്റ്‌

മണി ഹീസ്റ്റ് എന്ന സീരീസിനെ ജനപ്രീയമാക്കുന്നത് അതിന്റെ അഡ്രിനാലിന്‍ റഷ് തരുന്ന ആക്ഷന്‍ രംഗങ്ങളും അത്ര മേല്‍ ഹൃദയസ്പര്‍ശിയായ വൈകാരിക രംഗങ്ങളുമാണ്. മുന്‍ സീസണുകളെ പോലെ തന്നെ ആക്ഷനും വൈകാരികതയും നിറഞ്ഞതാണ് സീസണ്‍ 5 ന്റെ ആദ്യ ഭാഗവും. പ്രൊഫസര്‍ പറഞ്ഞത് പോലെ യുദ്ധമായി മാറിയിരിക്കുകയാണ് ബാങ്ക് കൊള്ള. തോക്കുകള്‍ മാത്രമല്ല ബോംബും ഗ്രനേഡുമെല്ലാം പ്രയോഗിച്ചു കൊണ്ടുള്ള യുദ്ധം. പതിവ് പോലെ ആക്ഷന്‍ രംഗങ്ങള്‍ അഡ്രിനാലിന്‍ റഷ് തരുന്നുണ്ട്. ശ്വാസം വിടാതെ കാണേണ്ടി വരുന്നതാണ് ആക്ഷന്‍ രംഗങ്ങള്‍. തോക്കും ബോംബുമൊന്നുമില്ലാത്ത ഹാന്‍ഡ് ടു ഹാന്‍ഡ് ആക്ഷനും അഞ്ചാം സീസണിലെ ആവേശം പകരുന്ന രംഗമാണ്.

ആക്ഷനോടൊപ്പം തന്നെ വൈകാരികമായും പുതിയ തലത്തിലേക്ക് എത്തുന്നുണ്ട് അഞ്ചാം സീസണിന്റെ ആദ്യ ഭാഗം. നൈറോബിയുടെ മരണം ആരാധകരില്‍ സൃഷ്ടിച്ച വേദന വളരെ വലുതായിരുന്നുവെങ്കില്‍ ഇത്തവണയും സമാനമായൊരു രംഗം സൃഷ്ടിച്ച് കണ്ണ് നിറയ്ക്കുന്നുണ്ട് അലക്‌സ് പിന. ക്രിയേറ്റര്‍ കഥ മുന്നോട്ട് കൊണ്ടു പോകാന്‍ വേണ്ടി ബലിയാടായി ആ കഥാപാത്രത്തെ തന്നെ തിരഞ്ഞെടുത്തുവെന്നത് കൈയ്യടി അര്‍ഹിക്കുന്ന ധീരതയും അത്ര തന്നെ അപകടം പിടിച്ചൊരു നീക്കവുമാണ്.

ബാങ്കിനുള്ളിലുള്ള ഓരോ കഥാപാത്രത്തിനും സ്വന്തമായൊരു ക്യാരക്ടര്‍ ആര്‍ക്ക് നല്‍കിയ അലക്‌സ് പിന അവസാന സീസണിലേക്ക് എത്തുമ്പോഴേക്കും ആ ആര്‍ക്കുകള്‍ക്ക് ഒരു പൂര്‍ണത കൊണ്ടു വരാനുള്ള ശ്രമങ്ങള്‍ നടത്തുന്നതായി കാണാം. വരുന്ന ഭാഗത്തിലൂടെ അവ പൂര്‍ണതയിലേക്ക് എത്തും. ഒറിജിനല്‍ സംഘത്തിലെ അംഗങ്ങളെ പോലെ തന്നെ പുതുതായി ചേര്‍ന്നവര്‍ക്കും വ്യക്തമായ ക്യാരക്ടറും ട്രാക്കും നല്‍കി അവരേയും കാഴ്ചക്കാരുമായി കണക്ട് ചെയ്യിപ്പിക്കാന്‍ സാധിച്ചിട്ടുണ്ട്.

മുന്‍ സീസണുകളില്‍ നിന്നും ഒരുപാട് മുന്നോട്ട് വന്നിട്ടുള്ള കഥാപാത്രമാണ് സ്‌റ്റോക്ക് ഹോമിന്റേത്. മറ്റുള്ളവരെ പോലെ കൊള്ളയും കൊലയുമൊന്നും ശീലമില്ലാത്ത, സാധാരണക്കാരിയായിരുന്ന മോണിക്കയില്‍ നിന്നും സ്‌റ്റോക്ക് ഹോമിലേക്കുള്ള വളര്‍ച്ചയ്ക്കിടെ അവള്‍ കടന്നു പോകുന്ന മാനസികമായ സംഘര്‍ഷം അവതരിപ്പിക്കുന്നതില്‍ മണി ഹീസ്റ്റ് വിജയിക്കുന്നുണ്ട്. ജൂലിയ (മനില) എന്ന ട്രാന്‍സ് വുമണ്‍ കഥാപാത്രമാണ് സീസണ്‍ 5ല്‍ ഹൃദയത്തില്‍ ഇടം നേടുന്നൊരു കഥാപാത്രങ്ങളിലൊന്ന്. പുരുഷനായി ജനിച്ച് സമൂഹത്തോടും ആദ്യം എതിര്‍ത്ത അച്ഛനോടും ജൂലിയ നടത്തിയ പോരാട്ടം ചുരുങ്ങിയ സമയത്തിനുള്ളില്‍ തന്നെ വരച്ചിടാന്‍ സാധിച്ചിട്ടുണ്ട്. ടോക്കിയോ ആരേയും കൂസാത്ത അഗ്രഷന്റെ പ്രതീകമായി നില്‍ക്കുമ്പോള്‍ സംഘത്തിലെ സ്‌നേഹത്തിന്റെ പ്രതീകമായി മാറുകയാണ്.

ഒന്നിലധികം ട്രാക്കുകളിലൂടെ കഥ പറയുന്ന ശീലവും പുതിയ സീസണും പിന്തുടരുന്നുണ്ട്. ബാങ്കിനകത്ത് ലിസ്ബണും സംഘവും നടത്തുന്ന യുദ്ധ സമാനമായ ചെറുത്തു നില്‍പ്പിന്റെ ട്രാക്കാണ് ഒന്ന്. പുറത്ത് അലിസീയയുടെ പിടിയിലകപ്പെട്ട പ്രൊഫസറുടെ ട്രാക്ക് രണ്ടാമത്തേത്. തന്റെ മകനെ മോഷണ ലോകത്തേക്ക് കൊണ്ടു വരുന്ന ബെര്‍ലിന്റെ ട്രാക്കാണ് മൂന്നാമത്തേത്. ഇതോടൊപ്പം നരേറ്റര്‍ ആയ ടോക്കിയോയുടെ ഫ്‌ളാഷ് ബാക്കുകളും സീരീസിനെ മുന്നോട്ട് നയിക്കുന്നു.

ബെര്‍ലിന്റേയും മകന്റേയും ഫ്‌ളാഷ് ബാക്കിന് എന്താണ് ഇപ്പോഴത്തെ സംഭവങ്ങളുമായുള്ള ബന്ധം എന്നത് കാണാനിരിക്കുന്നതാണ്. അതുകൊണ്ട് അതിലേക്ക് കടക്കുന്നില്ല. അതേസമയം ടോക്കിയോയുടെ ഫ്‌ളാഷ് ബാക്ക് ഇത്രമാത്രം വിശദമായി കാണിക്കേണ്ടത് ഉണ്ടായിരുന്നില്ലെന്നാണ് വ്യക്തിപരമായ അഭിപ്രായം. നേരത്തെ തന്നെ ടോക്കിയോ എന്ന കഥാപാത്രത്തിന്റെ സ്വാഭാവവും അതിന്റെ കാരണവുമെല്ലാം എസ്റ്റാബ്ലിഷ് ചെയ്തിരിക്കെ, പുതുതായി കാര്യമായി ഒന്നും നല്‍ക്കാത്ത ഈ ഫ്‌ളാഷ് ബാക്ക് രംഗങ്ങള്‍ ഒരു വശത്ത് നല്‍കുന്ന അഡ്രിനാലിന്‍ റഷിനെ തണുപ്പിക്കുകയാണ് ചെയ്യുന്നത്.

Recommended Video

Money Heist: Part 5 | Date Announcement | Netflix | FilmiBeat Malayalam

അഞ്ചാം സീസണിന്റെ ആദ്യ ഭാഗത്തിനായി ആകാംഷയോടെ കാത്തു നിന്ന ആരാധകരുടെ മനസില്‍ ഒരുപാട് ചോദ്യങ്ങളുണ്ടായിരുന്നു. നൈറോബിയുടെ മരണത്തിന് പ്രതികാരം ചെയ്യാന്‍ ടോക്കിയോയ്ക്കും കൂട്ടുകാര്‍ക്കും സാധിക്കുമോ? പ്രൊഫസര്‍ അലീസിയയുടെ പിടിയില്‍ നിന്നും രക്ഷപ്പെടുമോ? ലിസ്ബണ്‍ എങ്ങനെ പ്രൊഫസറുടെ സഹായമില്ലാതെ സംഘത്തെ നയിക്കും? തമായോ എങ്ങനെയായിരിക്കും സംഘത്തെ അടിച്ചമര്‍ത്താന്‍ ശ്രമിക്കുക? എന്നിങ്ങനെ ഒരുപാട് ചോദ്യങ്ങള്‍ ആരാധകരുടെ മനസിലുണ്ട്. ഈ ചോദ്യങ്ങളില്‍ ചിലതിന് ആദ്യ ഭാഗത്തില്‍ ഉത്തരം ലഭിക്കുന്നുണ്ട്. ബാക്കി ചോദ്യങ്ങളുടേയേും പുതുതായി ഉടലെടുത്ത ചോദ്യങ്ങളുടേയും ഉത്തരങ്ങള്‍ ലഭിക്കാന്‍ ഡിസംബര്‍ മൂന്ന് വരെ കാത്തിരിക്കാം. Untill then, Bella Ciao, Bella Ciao!!