ഹോളിവുഡില്‍ പോയാല്‍ വലിയ ആളാകില്ല! ധനുഷിനെ കൊട്ടി ചിമ്പു; ഇയാളിതുവരെ വിട്ടില്ലേ?

തന്റെ പുതിയ സിനിമയുടെ റിലീസിന് മുന്നോടിയായി ചിമ്പു നല്‍കിയൊരു അഭിമുഖത്തിലെ ഭാഗമാണ് വൈറലായി മാറിയിരിക്കുന്നത്. ഗലാട്ട പ്ലസിന് ചിമ്പു നല്‍കിയ അഭിമുഖത്തിലെ ഭാഗമാണ് ചര്‍ച്ചയാകുന്നത്. ഇതില്‍ ചിമ്പു നടത്തുന്ന പരാമര്‍ശങ്ങള്‍ തമിഴകത്തിന്റെ സൂപ്പര്‍ താരമായ ധനുഷിനുള്ള ഒളിയമ്പാണെന്നാണ് സോഷ്യല്‍ മീഡിയ പറയുന്നത്. വലിയ താരമാകുന്നതിനെക്കുറിച്ചുള്ള ചിമ്പുവിന്റെ പ്രതികരണമാണ് ചര്‍ച്ചയുടെ കാരണം.

''ഞാന്‍ എത്ര വലുതായാലും എന്നെക്കാള്‍ വലിയ ഒരാള്‍ വരും. ഞാനിപ്പോള്‍ ഹോളിവുഡില്‍ പോയി അഭിനയിച്ചെന്നിരിക്കട്ടെ, എന്താണ് അടുത്തത്. എവിടെ പോയാലും അതിലും വലിയ ആളു വരും. ഇപ്പോള്‍ ആളുകള്‍ വലിയ ആളാകാനുള്ള ഓട്ടത്തിലാണ്. എന്താണ് വലിയ ആള്‍ എന്ന് എനിക്ക് മനസിലാകുന്നില്ല. ഞാന്‍ എന്റെ ജോലി നന്നായി ചെയ്യുന്നത് എന്നെ വലിയ ആളാക്കും എന്നാണ് ഞാന്‍ വിശ്വസിക്കുന്നത്'' എന്നായിരുന്നു ചിമ്പു പറഞ്ഞത്.

ഹോളിവുഡില്‍ പോയി അഭിനയിക്കുന്നതിനെക്കുറിച്ചുള്ള ചിമ്പുവിന്റെ പരാമര്‍ശം ധനുഷിനെ ലക്ഷ്യം വച്ചുള്ളതാണെന്നാണ് സോഷ്യല്‍ മീഡിയ പറയുന്നത്. ഈയ്യടുത്തായിരുന്നു ധനുഷിന്റെ ഹോളിവ ുഡ് അരങ്ങേറ്റം. ദ ഗ്രേ മാന്‍ എന്ന ചിത്രത്തില്‍ ക്രിസ് ഇവാന്‍സും അന ഡേ അര്‍മാസിനും റയാല്‍ ഗോസ്ലിംഗിനുമൊപ്പമായിരുന്നു ധനുഷിന്റെ അരങ്ങേറ്റം. റൂസോ ബ്രദേഴ്‌സ് ഒരുക്കിയ സിനിമയായിരുന്നു ദ ഗ്രേ മാന്‍. ചിത്രത്തിലെ ധനുഷിന്റെ പ്രകടനം കയ്യടി നേടുകയും ചെയ്തിരുന്നു.

ധനുഷും ചിമ്പുവും തമ്മിലുള്ള മത്സരം വര്‍ഷങ്ങളായി തമിഴകത്തെ ചര്‍ച്ചാ വിഷയമാണ്. ഇരുവരും ഏതാണ്ട് ഒരേ സമയത്ത് സിനിമയിലെത്തിയവരാണ്. രണ്ടു പേര്‍ക്കും സിനിമാ പാരമ്പര്യവുമുണ്ട്. ഭാവിയില്‍ വിജയ്-അജിത്ത് പോലെയായി മാറും ധനുഷ്-ചിമ്പു എന്നായിരുന്നു വിലയിരുത്തലുകള്‍. എന്നാല്‍ കാലം പിന്നിട്ടപ്പോള്‍ ധനുഷ് ദേശീയ അവാര്‍ഡ് അടക്കം നേടുകയും പാന്‍ ഇന്ത്യന്‍ സ്വീകാര്യതയുള്ള സൂപ്പര്‍ താരവുമായി മാറി. എന്നാല്‍ ധനുഷിന്റെ കരിയര്‍ താഴോട്ട് പോവുകയായിരുന്നു ചെയ്ത്. ഇപ്പോള്‍ താരം തിരിച്ചു വരവ് നടത്തുകയാണ്.

അതേസമയം ധനുഷുമായുള്ള പോരിനെക്കുറിച്ച് ഒരിക്കല്‍ ചോദിച്ചപ്പോള്‍ ചിമ്പു പറഞ്ഞത് തങ്ങള്‍ക്കിടയില്‍ വ്യക്തിപരമായ ശത്രുതയില്ലെന്നായിരുന്നു. ''ഒരുപാട് ആളുകള്‍ കരുതുന്നത് ഞാനും ധനുഷും തമ്മിലെന്തോ പ്രശ്‌നമുണ്ടെന്നാണ്. സത്യത്തില്‍ അത് സത്യമല്ല. ഞാന്‍ ഒരു ജോളി മനുഷ്യനാണഅ. ധനുഷ് നല്ല സുഹൃത്താണ്. ഞങ്ങള്‍ സംസാരിക്കാറുണ്ട്. ഞങ്ങള്‍ക്കിടയില്‍ പ്രശ്‌നങ്ങളൊന്നുമില്ല'' എന്നായിരുന്നു നേരത്തെ ചിമ്പു പറഞ്ഞത്.

തിരുച്ചിദ്രമ്പലം ആണ് ധനുഷിന്റെ ഒടുവില്‍ പുറത്തിറങ്ങിയ സിനിമ. ചിത്രം സൂപ്പര്‍ ഹിറ്റായി മാറുകയും ചെയ്തിരുന്നു. നിത്യ മേനോന്‍ ആയിരുന്നു ചിത്രത്തിലെ നായിക. നാനേ വരുവേന്‍ ആണ് ധനുഷിന്റെ പുതിയ സിനിമ. ചിത്രത്തിന്റെ ടീസര്‍ കഴിഞ്ഞ ദിവസമാണ് റിലീസാകുന്നത്. വാത്തിയാണ് ധനുഷിന്റെ അണിയറയിലെ മറ്റൊരു സിനിമ.