എന്റെ സ്വപ്‌നം സാക്ഷാത്കരിക്കാന്‍ ഒപ്പം നിന്നത് അവളാണ്! ഭാര്യ ജെസിയെക്കുറിച്ച് വിജയ് സേതുപതി

വിജയ് സേതുപതി പറഞ്ഞത്

സിനിമയില്‍ കഷ്ടപ്പെടുന്ന കാലത്ത് എറ്റവും കൂടുതല്‍ പിന്തുണ നല്‍കിയ ഭാര്യ ജെസിയെക്കുറിച്ചായിരുന്നു വിജയ് സേതുപതി സംസാരിച്ചിരുന്നത്. കാര്‍ത്തിക്ക് സുബ്ബരാജ് സംവിധാനം ചെയ്ത പിസ എന്ന ചിത്രത്തിലൂടെയായിരുന്നു വിജയ് സേതുപതി തമിഴില്‍ നായകനടനായി അരങ്ങേറ്റം കുറിച്ചിരുന്നത്. പിസയ്ക്കു മുന്‍പ് ജൂനിയര്‍ ആര്‍ട്ടിസ്റ്റ് വേഷങ്ങളിലൂടെയായിരുന്നു നടന്‍ തുടങ്ങിയിരുന്നത്. ജയംരവിയുടെ എം കുമരന്‍ സണ്‍ ഓഫ് മഹാലക്ഷ്മി, ധനുഷിന്റെ പുതുപേട്ടൈ, ലീ, വെണ്ണിലാ കബഡി കുഴു തുടങ്ങി നിരവധി സിനിമകളില്‍ ചെറിയ വേഷങ്ങളില്‍ നടന്‍ അഭിനയിച്ചിരുന്നു. കാര്‍ത്തിക്ക് സുബ്ബരാജ് സംവിധാനം ചെയ്ത പിസയുടെ വിജയമാണ് നടന്റെ കരിയറില്‍ വഴിത്തിരിവായി മാറിയിരുന്നത്.

പിസയ്ക്കു ശേഷം

പിസയ്ക്കു ശേഷം തമിഴകത്തെ തിരക്കേറിയ നായകന്‍മാരില്‍ ഒരാളായി സേതുപതി മാറിയിരുന്നു. അനായാസ അഭിനയംകൊണ്ടും കഥാപാത്രങ്ങളുടെ തിരഞ്ഞെടുപ്പുകൊണ്ടുമാണ് വിജയ് സേതുപതി തമിഴില്‍ താരമായി മാറിയിരുന്നത്. പിസയ്ക്ക് ശേഷമിറങ്ങിയ സേതുപതിയുടെ സൂതു കവും എന്ന ചിത്രവും ഏറെ ശ്രദ്ധിക്കപ്പെട്ടിരുന്നു. തുടര്‍ന്ന് അവസരങ്ങള്‍ കൂടുതലായി താരത്തെ തേടിയെത്തുകയായിരുന്നു. സിനിമയിലെ തുടക്കക്കാരായ പലരും വിജയ് സേതുപതിയെ നായകനാക്കികൊണ്ടായിരുന്നു സിനിമകള്‍ ചെയ്തിരുന്നത്.

ഭാര്യയെക്കുറിച്ച് സേതുപതി

അടുത്തിടെ നടന്നൊരു അഭിമുഖത്തിലായിരുന്നു തനിക്ക് ഭാര്യ നല്‍കിയ പിന്തുണയെക്കുറിച്ച് വിജയ് സേതുപതി തുറന്നു സംസാരിച്ചിരുന്നത്. ചെന്നൈയില്‍ സ്ഥിരതാമസമാക്കിയ മലയാളിയായ കൊല്ലംകാരി ജെസിയെ ആയിരുന്നു വിജയ് സേതുപതി വിവാഹം കഴിച്ചിരുന്നത്. ഇരുപത്തിമൂന്നാമത്തെ വയസിലായിരുന്നു സേതുപതി ജെസിയെ ജീവിതസഖിയാക്കിയിരുന്നത്. താന്‍ സിനിമയില്‍ കഷ്ടപ്പെടുന്ന കാലത്ത് എറ്റവു കൂടുതല്‍ പിന്തുണ നല്‍കിയിരുന്നത് ഭാര്യ ജെസിയാണെന്ന് മക്കള്‍സെല്‍വന്‍ പറയുന്നു.

സ്വപ്‌നം സാക്ഷാത്കരിക്കാനായി ഒപ്പംനിന്നു

സിനിമയില്‍ കഷ്ടപ്പെടുന്ന കാലത്ത് ജെസി ഒരു പരാതിയും പറഞ്ഞില്ല, എന്റെ സ്വപ്‌നം സാക്ഷാത്കരിക്കാനായി ഒപ്പംനിന്നു. അതൊരു വലിയ ഭാഗ്യമായി കരുതുന്നു. കുടുംബത്തിന്റെ പിന്തുണയില്ലാതെ എനിക്ക് ഇതൊന്നും സാധിക്കില്ലായിരുന്നു വിജയ് സേതുപതി പറയുന്നു. ഒരു സുഹൃത്ത് വഴിയാണ് ജെസിയെക്കുറിച്ച് അറിഞ്ഞതെന്നും അങ്ങനെയാണ് പരിചയപ്പെടുതെന്നും സേതുപതി പറയുന്നു. നേരിട്ട് കണ്ടില്ലാത്ത ഞങ്ങള്‍ ഓണ്‍ലൈന്‍ ചാറ്റിങ്ങിലൂടെയായിരുന്നു അടുത്തത്.

ആദ്യമായി കണ്ടത്

ജെസിയെ ആദ്യമായി നേരില്‍ക്കണ്ട കാര്യവും അഭിമുഖത്തില്‍ വിജയ് സേതുപതി പറഞ്ഞിരുന്നു. ദീര്‍ഘകാലം ഞങ്ങള്‍ പ്രണയിച്ചെങ്കിലും വിവാഹ നിശ്ചയത്തിന്റെ അന്നാണ് ആദ്യമായി കണ്ടതെന്നു സേതുപതി പറയുന്നു. പ്രണയം വീട്ടില്‍ തുറന്നു പറഞ്ഞപ്പോള്‍ കുറച്ച് പ്രശ്‌നങ്ങളൊക്കെ ഉണ്ടായി. എന്നാല്‍ അവസാനം വീട്ടുകാര്‍ ഞങ്ങളെ അംഗീകരിച്ചു. അഭിമുഖത്തില്‍ വിജയ് സേതുപതി പറഞ്ഞു.