വസ്ത്രത്തിന്റെ ഇറക്കം കുറഞ്ഞത് വിനയായി, നാടിളക്കി വിവാദം; ഒടുവില്‍ മാപ്പ് പറഞ്ഞ് ശ്രീയ

ശ്രീയ നായികയായി എത്തിയ ചിത്രമായിരുന്നു ശിവാജി. രജനീകാന്ത് നായകനായി എത്തിയ ചിത്രത്തിന്റെ സംവിധാനം ശങ്കര്‍ ആയിരുന്നു. ഇന്ത്യന്‍ സിനിമ തന്നെ കണ്ട ഏറ്റഴും വലിയ വിജയങ്ങളിലൊന്നായിരുന്നു ശിവാജി. ചിത്രത്തിലെ നായികയായി എത്തി ധാരാളം ആരാധകരെ സ്വന്തമാക്കാന്‍ ശ്രീയയ്ക്കും സാധിച്ചിരുന്നു. വന്‍ വിജയത്തിന്റെ വെളിച്ചത്തില്‍ ചിത്രത്തിന്റെ അണിയറ പ്രവര്‍ത്തകര്‍ 2008 ജനുവരി 11 സില്‍വര്‍ ജൂബിലി ആഘോഷം നടത്തിയിരുന്നു.

പരിപാടിയില്‍ മാധ്യമങ്ങളുടേയും ആരാധകരുടേയും ശ്രദ്ധ കവര്‍ന്നത് ശ്രീയയായിരുന്നു. ശ്രീയയുടെ ബോള്‍ഡ് വസ്ത്രം പക്ഷെ വിവാദമായി മാറുകയായിരുന്നു. തമിഴ്‌നാട് മുഖ്യമന്ത്രിയടക്കം പങ്കെടുത്തതായിരുന്നു പരിപാടി. പക്ഷെ താരത്തിന്റെ വസ്ത്രധാരണം ചിലര്‍ക്ക് പിടിച്ചില്ല. താരത്തിനെതിരെ രാഷ്ട്രീയ പാര്‍ട്ടി രംഗത്തെത്തുകയായിരുന്നു. അപമാനകരവും സംസ്‌കാരത്തെ ഹനിക്കുന്നതുമാണ് ശ്രീയയുടെ വസ്ത്രം എന്നായിരുന്നു വിമര്‍ശനം.

വിവാദം കനത്തതോടെ ശ്രീയ പരസ്യമായി മാപ്പ് പറയുകയായിരുന്നു. പ്രസ്താവനയിലൂടെയായിരുന്നു ശ്രീയ മാപ്പ് പറഞ്ഞത്. തന്റെ വസ്ത്രം മൂലമുണ്ടാകാന്‍ സാധ്യതയുള്ള പ്രശ്‌നങ്ങളെക്കുറിച്ച് തനിക്ക് അറിവുണ്ടായിരുന്നില്ലെന്നാണ് ശ്രീയ പറഞ്ഞത്. താനൊരു ഹിന്ദി സിനിമയുടെ ചിത്രീകരണത്തില്‍ നിന്നുമാണ് പരിപാടിയിലേക്ക് വന്നതെന്നും ശ്രീയ കുറിപ്പില്‍ പറഞ്ഞിരുന്നു.

''വസ്ത്രത്തിന്റെ പേരിലുണ്ടാകാന്‍ സാധ്യതയുള്ള പ്രശ്‌നങ്ങളെക്കുറിച്ച് എനിക്ക് അറിവുണ്ടായിരുന്നില്ല. തഞ്ചാവൂരില്‍ വച്ച് നടക്കുന്ന ഹിന്ദി സിനിമയുടെ ചിത്രീകരണത്തില്‍ നിന്നുമാണ് ഞാന്‍ സില്‍വര്‍ ജൂബിലി ആഘോഷ വേദിയിലെത്തിയത്. ഷൂട്ടിംഗ് സെറ്റില്‍ നിന്നും നേരെ വരികയായിരുന്നു'' എന്നാണ് ശ്രീയ പറഞ്ഞത്.

എന്തായാലും അതൊക്കെ ഇന്ന് പഴയ കഥയാണ്. ആര്‍ആര്‍ആറിലൂടെ ശക്തമായ തിരിച്ചുവരവ് നടത്തിയിരിക്കുകയാണ് ശ്രീയ ശരണ്‍. അതേസമയം താരം ഇപ്പോള്‍ ബോളിവുഡിലും തിരിച്ചുവരാന്‍ ഒരുങ്ങുകയാണ്. ദൃശ്യത്തിന്റെ രണ്ടാം ഭാഗത്തിലൂടെയാണ് ശ്രീയ ഹിന്ദിയിലേക്ക് മടങ്ങിയെത്തുന്നത്.

തെലുങ്കിലൂടെയായിരുന്നു ശ്രീയയുടെ അരങ്ങേറ്റം. എനക്ക് 20, ഉനക്ക് 18 എന്ന ചിത്രത്തിലൂടെയാണ് ശ്രീയ തമിഴിലെത്തുന്നത്. പിന്നീട് തമിഴിലും തെലുങ്കിലുമെല്ലാം നിറ സാന്നിധ്യമായി മാറുകയായിരുന്നു. തുജേ മേരി കസം ആയിരുന്നു ആദ്യത്തെ ഹിന്ദി ചിത്രം. പിന്നീട് തെന്നിന്ത്യന്‍ സിനിമയില്‍ സജീവമായ ശ്രീയ ആവാരപന്‍ എന്ന ചിത്രത്തിലൂടെ വീണ്ടും ഹിന്ദിയിലെത്തി. പോക്കിരിരാജയിലൂടെയാണ് മലയാളത്തില്‍ അരങ്ങേറുന്നത്. ദൃശ്യത്തിന്റെ രണ്ടാം ഭാഗത്തിന് പിന്നാലെ മ്യൂസിക് സ്‌കൂള്‍, കബ്‌സ, തഡ്ക്ക, നരഗാസുരന്‍, സണ്ടക്കാരി തുടങ്ങിയ സിനിമകള്‍ ശ്രീയയുടേതായി പുറത്തിറങ്ങാനുണ്ട്.