ലാലേട്ടന്‍ മുന്നില്‍ കൊമ്പുകോര്‍ത്ത് ഫിറോസും അനൂപും; ഒടുവില്‍ നോബിയുടെ തോളില്‍ കിടന്ന് വിതുമ്പി അനൂപ്

ബിഗ് ബോസ് വീട്ടിലെ ഫിറോസുമാര്‍ തമ്മിലായിരുന്നു പ്രശ്‌നത്തിന്റെ തുടക്കം. ഫിറോസ് ഖാന്‍ ഡിംപലിനെ കുറിച്ച് പറഞ്ഞതിനെ കിടിലം ഫിറോസ് ചോദ്യം ചെയ്യുകയായിരുന്നു. ഇന്നലെ വരെ ഡിംപലിനെ നൈര്‍മല്യമുള്ള കുട്ടിയെന്ന് വിളിച്ചിട്ട് ഇന്നെന്താണ് ഇങ്ങനെ പറയുന്നതെന്നായിരുന്നു കിടിലം ചോദിച്ചത്. ഇതോടെ ഇരുവര്‍ക്കുമിടയില്‍ തര്‍ക്കമായി. കിടിലം മാസ്‌ക് അണിഞ്ഞിരിക്കുകയാണെന്നായി ഫിറോസ് ഖാന്‍.

ഫിറോസുമാര്‍ തമ്മില്‍ തര്‍ക്കം രൂഷമാവുകയായിരുന്നു. ഡിംപലിനെ കുറിച്ച് തനിക്ക് അറിയില്ലായിരുന്നുവെന്നും ഇപ്പോഴാണ് അവള്‍ കള്ളിയാണെന്ന് മനസിലായതെന്നുമായി ഫിറോസ് ഖാന്‍. ഇതോടെ അത്രയും നേരം നിശബ്ദനായിരുന്ന അനൂപ് കൃഷ്ണ ഇടപെടുകയാണ്. എന്ത് അടിസ്ഥാനത്തിലാണ് ഡിംപലിനെ ഫിറോസ് കള്ളിയെന്ന് വിളിച്ചതെന്നായി അനൂപ്.

ഇതോടെ അനൂപും ഫിറോസ് ഖാനും തമ്മില്‍ വലിയ വാക്ക് തര്‍ക്കമായി മാറുകയായിരുന്നു. ഒരു പെണ്‍കുട്ടിയെ എന്തിന്റെ അടിസ്ഥാനത്തിലാണ് നീ കള്ളിയെന്ന് വിളിച്ചതെന്ന് അനൂപ് ചോദിച്ചു. അവള്‍ നിന്റെ വല്ലതും കട്ടുവോ എന്നും അനൂപ് ചോദിച്ചു. നീ മാറി നില്‍ക്ക് എന്നായിരുന്നു ഫിറോസിന്റെ പ്രതികരണം. ഇരുവരും തമ്മില്‍ അടിയുടെ വക്കിലെത്തിയിരുന്നു. ഇതിനിടെ മറ്റുള്ളവര്‍ ഇരുവരേയും പിടിച്ചു വെക്കാന്‍ ശ്രമിച്ചുവെങ്കിലും തര്‍ക്കം അവസാനിച്ചില്ല.

അപ്പോഴേക്കും മോഹന്‍ലാല്‍ മടങ്ങിയെത്തിയിരുന്നു. അദ്ദേഹം നോക്കി നില്‍ക്കെയായിരുന്നു ഫിറോസും അനൂപും കോര്‍ത്തത്. ഒടുവില്‍ മോഹന്‍ലാല്‍ തന്നെ ഇടപെടുകയായിരുന്നു. വളരെ ക്ഷുഭിതനായിട്ടായിരുന്നു മോഹന്‍ലാലിന്റെ പ്രതികരണം. തരികിട അഭ്യാസം തന്റെയടുത്ത് വേണ്ടെന്നും അതൊക്കെ കഴിഞ്ഞിട്ടാണ് താന്‍ ഇതുവരെ എത്തിയതെന്നുമായിരുന്നു മോഹന്‍ലാല്‍ പറഞ്ഞത്. ഒരു ദാഷിണ്യവുമില്ലാതെ പണിതരുമെന്നും ലാലേട്ടന്‍ പറഞ്ഞു.

മോഹന്‍ലാലിന് മുന്നില്‍ വച്ച് ഫിറോസ് ഖാന്‍ വീണ്ടും കിടിലം ഫിറോസിനെതിരെ രംഗത്ത് എത്തി. കിടിലം മാസ്‌ക് ധരിച്ചിരിക്കുകയാണെന്നായിരുന്നു ഫിറോസ് ഖാന്‍ പറഞ്ഞത്. ഇതൊരു ഗെയിം ആണെന്ന് അറിഞ്ഞു കൊണ്ടല്ലേ ഇങ്ങോട്ട് വന്നതെന്നായിരുന്നു മോഹന്‍ലാലിന്റെ മറുപടി. പിന്നീട് അനൂപുമായുണ്ടായ തര്‍ക്കത്തെ കുറിച്ച് ഫിറോസും തമ്മില്‍ ചര്‍ച്ച ചെയ്യുന്നതിനും ഇന്നലെ സാക്ഷിയായി.

എന്നാല്‍ തീര്‍ത്തും വ്യത്യസ്തമായിരുന്നു അനൂപിന്റെ പ്രതികരണം. സ്‌മോക്കിങ് ഏരിയയില്‍ വച്ച് എന്തുകൊണ്ടാണ് താന്‍ പൊട്ടിത്തെറിച്ചത് എന്ന് അനൂപ് നോബിയോട് വെളിപ്പെടുത്തി. ആ വാക്കാണ് തന്നെ പ്രകോപിപ്പിച്ചതെന്നും തന്റെ ജീവിതത്തില്‍ ഒരാളെ മറ്റുള്ളവര്‍ കള്ളിയെന്ന് വിളിച്ച അനുഭവമുണ്ടായിട്ടുണ്ടെന്നും അതാണ് സഹിക്കാന്‍ പറ്റാതെ വന്നതെന്നും അനൂപ് പറഞ്ഞു. പിന്നാലെ നോബിയുടെ തോളില്‍ തല വച്ച് കരയുകയായിരുന്നു അനൂപ്.