ഇത്ര ആക്ടീവ് ആയിട്ടും എന്തുകൊണ്ട് പുറത്തായി? മോഹന്‍ലാലിന് ഭാനു നല്‍കിയ ഉത്തരം

വൈകാരികമായിരുന്നു ഭാനുവിന്റെ മടക്കയാത്ര. ആരാകും പുറത്താവുക എന്ന് പറയുന്നതിന് മുമ്പായി ഡിംപലിന്റേയും ഭാനുവിന്റേയും സൗഹൃദത്തിലെ നല്ല മുഹൂര്‍ത്തങ്ങള്‍ കാണിച്ചിരുന്നു. തുടര്‍ന്നാണ് ഭാനുവാണ് പുറത്താക്കപ്പെടുന്നത് എന്ന് അറിയിക്കുന്നത്. ഭാനുവിന്റെ പുറത്താകല്‍ ഉള്‍ക്കൊള്ളാനാകാതെ ഡിംപല്‍ പൊട്ടിക്കരഞ്ഞു. ബിഗ് ബോസ് വീട്ടിലുള്ള എല്ലാവരുമായി നല്ല ബന്ധമുണ്ടായിരുന്നു ഭാനുവിന്. അതുകൊണ്ട് തന്നെ വൈകാരികമായിട്ടായിരുന്നു ഭാനുവിനെ അവര്‍ യാത്രയാക്കിയത്.

തീര്‍ത്തും അപ്രതീക്ഷിതമായിരുന്നു ഭാനുവിന്റെ പുറത്താകല്‍. ടാസ്‌ക്കുകളിലെ മികച്ച പ്രകടനങ്ങളും ബിഗ് ബോസിലെ മറ്റ് മത്സരാര്‍ത്ഥികളുമായുള്ള അടുത്ത ബന്ധവുമാണ് ഭാനുവിനെ ജനപ്രീയയാക്കിയത്. പുറത്തു വന്ന ഭാനുവിനോട് പുറത്തായതിനെ കുറിച്ച് മോഹന്‍ലാല്‍ ചോദിച്ചു. എന്താണ് ഞാന്‍ പറയേണ്ടത് എന്നായിരുന്നു മോഹന്‍ലാല്‍ ചോദിച്ചത്. ഇന്‍ ആണെങ്കിലും ഔട്ട് ആണെങ്കിലും ഹാപ്പിയാണെന്നായിരുന്നു ഞാന്‍ പറഞ്ഞതും അത് ആവര്‍ത്തിക്കുകയാണെന്നും ഭാനു പറഞ്ഞു.

ഇത്രയും ദിവസം ഞാന്‍ ഞാനായിട്ടാണ് അവിടെ നിന്നത്. പച്ചയായ മനുഷ്യനായിരുന്നു. നല്ല രീതിയില്‍ കളിക്കാന്‍ പറ്റി. ബാക്കിയെല്ലാം പ്രേക്ഷകരുടെ തീരുമാനമാണ്. അതിനൊപ്പമാണ് ഞാനുമെന്ന് ഭാനു പറഞ്ഞു. എന്തുകൊണ്ടാണ് പുറത്താക്കപ്പെട്ടതെന്ന് തോന്നുന്നതെന്ന് മോഹന്‍ലാല്‍ ചോദിച്ചു. ഇത്രയും ആക്ടീവ് ആയിരുന്നില്ലേയെന്നും അദ്ദേഹം ചൂണ്ടിക്കാണിച്ചു. പ്രേക്ഷകരുടെ ഇഷ്ടമല്ലേയെന്നായിരുന്നു ഭാനുവിന്റെ മറുപടി. അതില്‍ നമുക്ക് ചോദ്യം ചെയ്യാനില്ലെന്നും തന്റെ ഭാഗം ചെയ്തുവെന്നതില്‍ ഹാപ്പിയെന്നും ഭാനു പറഞ്ഞു.

ഷോയില്‍ നിന്നുമുണ്ടായ വെളിപാടുകളെ കുറിച്ചും മോഹന്‍ലാല്‍ ചോദിച്ചു. പലകാര്യങ്ങളും വിലയിരുത്തി നോക്കാനും ചിന്തിക്കാനും പറ്റിയ നല്ലൊരു പ്ലാറ്റ്‌ഫോം ആയിരുന്നു ബിഗ് ബോസെന്നും ഷോയില്‍ നില്‍ക്കുമ്പോഴും പുറത്ത് വന്നപ്പോഴും താന്‍ പോസിറ്റീവ് ആണെന്നും വളരെ ഹാപ്പിയാണെന്നും ഭാനു പറഞ്ഞു. ഇത്രയും ദിവസം ഇവിടെ നില്‍ക്കാനാകുമെന്ന് കരുതിയിരുന്നില്ലെന്നും ഭാനു പറഞ്ഞു.

Recommended Video

ബിഗ്‌ബോസിനെ പറ്റി വീണക്ക് പറയാനുള്ളത് | Veena Nair Exclusive Interview | Oneindia Malayalam

പ്രേക്ഷകര്‍ പ്രതീക്ഷിക്കുന്ന എലമെന്റ് വേറെന്തെങ്കിലും ആയിരിക്കും. ആ എലമെന്റ് എന്നില്‍ ഉണ്ടാകില്ല. പക്ഷെ ഞാന്‍ ഇങ്ങനെ തന്നെയാണ്. വീട്ടിലാണെങ്കിലും സുഹൃത്തുക്കള്‍ക്കൊപ്പം ആണെങ്കിലും ഇവിടെയാണെങ്കിലും ഞാന്‍ അങ്ങനെ തന്നെയാണെന്നും ഇല്ലാത്ത എലമെന്റ് എന്നിലേക്ക് കൊണ്ടു വരിക എന്നത് സാധ്യമല്ലെന്നും ഭാനു പറഞ്ഞു. അതിനാല്‍ തനിക്ക് പോകാനുള്ള സമയമാണിതെന്നും ഭാനു പറഞ്ഞു.