ഇനിയെങ്കിലും ധൈര്യം കാണിക്കൂ, റംസാന്‍ ചെയ്തത് തെറ്റാണെന്ന് പറയാനെന്താ മടി; നോബിയോട് ലാലേട്ടന്‍

അയാള്‍ ചെയ്തത് ശരിയാണോ എന്ന് മോഹന്‍ലാല്‍ നോബിയോട് ചോദിച്ചു. എന്നാല്‍ നോബി സത്യത്തില്‍ എന്നു പറഞ്ഞു തുടങ്ങിയതും മോഹന്‍ലാല്‍ ഇടപട്ടു. മോനെ, ഇതില്‍ സത്യം കള്ളം എന്നൊന്നുമില്ല. ചെയ്തത് ശരിയോ തെറ്റോ എന്നാണ് ചോദിച്ചതെന്നായിരുന്നു മോഹന്‍ലാലിന്റെ പ്രതികരണം. ഇതോടെ ചെയ്തത് ശരിയല്ലെന്ന് നോബി പറഞ്ഞു. തെറ്റല്ലേ, നീയൊരു ഷോ നടത്തിക്കൊണ്ടിരിക്കുകയാണെന്ന് കരുതുക. ഒരാള്‍ ചെരുപ്പെടുത്ത് എറിഞ്ഞാല്‍ എന്തായിരിക്കും സംഭവിക്കുക എന്ന് ലാലേട്ടന്‍ നോബിയോട് ചോദിച്ചു. നോബിയെ കുഴക്കുന്ന ചോദ്യമായിരുന്നു അത്.

പ്രശ്‌നമാകും എന്നായിരുന്നു നോബിയുടെ മറുപടി. എന്നിട്ട് നീയത് അവന്റടുത്ത് പറഞ്ഞോ ചെയ്തത് തെറ്റായിപ്പോയെന്ന് മോഹന്‍ലാല്‍ നോബിയോട് ചോദിച്ചു. അല്ല ലാലേട്ടാ ഞാനീ ചെരുപ്പെറിഞ്ഞത് കണ്ടില്ലെന്നായിരുന്നു നോബിയുടെ വിശദീകരണം. ഇതോടെ മോഹന്‍ലാല്‍ ദേഷ്യപ്പെട്ടു. ശരി ചെരുപ്പെറിഞ്ഞത് കണ്ടില്ല, അത് കഴിഞ്ഞിട്ടെങ്കിലും പറഞ്ഞോ നീ ചെയ്തത് തെറ്റാണെന്ന് അദ്ദേഹം ചോദിച്ചു. ഞാന്‍ റംസാനോട് ചോദിച്ചു എറിഞ്ഞോ എന്ന് എന്നായിരുന്നു നോബിയുടെ മറുപടി. എറിയാതെ പോയി ഇങ്ങനെ ചെരുപ്പ് വീഴത്തില്ലല്ലോ എന്ന് മോഹന്‍ലാല്‍ ചൂണ്ടിക്കാണിച്ചു.

ഞാന്‍ റംസാനോട് ചോദിച്ചു, നീ എറിഞ്ഞോ എന്ന്. അപ്പോള്‍ ഇല്ലെന്നാണ് അവന്‍ പറഞ്ഞതെന്നായിരുന്നു നോബിയുടെ മറുപടി. നീ നില്‍ക്കുമ്പോള്‍ ഞാനൊരു ചെരുപ്പെടുത്ത് എറിയാം, കൊണ്ടില്ലെങ്കില്‍ കുഴപ്പമില്ലല്ലോ. അങ്ങനെയൊന്നുമല്ലല്ലോ പറയേണ്ടത്. നമ്മളുടെ കൂടെയുള്ളൊരാള്‍ തെറ്റ് ചെയ്താല്‍ അത് പറഞ്ഞു കൊടുക്കുകയല്ലേ വേണ്ടത്. അവിടെ എന്തിനാണ് ഡിപ്ലോമാറ്റിക് ആയിട്ട് സംസാരിക്കുന്നത്. തെറ്റ് ചെയ്താല്‍ അത് പറയുന്നതല്ലേ യഥാര്‍ത്ഥ സൗഹൃദം. നിനക്കെന്താ പറഞ്ഞുകൂടേ അവന്‍ ചെയ്തത് തെറ്റാണെന്ന്. പറയാന്‍ എന്താണ് മടിയെന്നും മോഹന്‍ലാല്‍ നോബിയോട് ചോദിച്ചു.

ഇനിയെങ്കിലും ധൈര്യമായി സംസാരിക്കൂ, ചെയ്തത് തെറ്റാണെന്ന് പറയൂ, കണ്ടില്ല കൊണ്ടില്ല എന്നൊക്കെ പറയാതിരിക്കൂ. നമ്മുടെ കൂടെ താമസിക്കുന്നൊരാള്‍ ചെരുപ്പെടുത്തെറിയുക എന്നൊക്കെ പറയുമ്പോള്‍ എങ്ങനെയാണ് പറയാതിരിക്കുക. കണ്ടില്ലെന്ന് പറഞ്ഞ നോബിയോട് ഇനി കാണിച്ച് തരണമോ കണ്ടാല്‍ മാത്രമേ വിശ്വസിക്കുകയള്ളുവോയെന്നും മോഹന്‍ലാല്‍ ചോദിച്ചു.