ഡോക്ടറെ വെട്ടി, ജാസ്മിന് റോസാപൂവ് നല്‍കി റിയാസ്; വന്ന വരവില്‍ തന്നെ നിലപാട് വ്യക്തമാക്കി താരം

താനൊരു ഫെമിനിസ്റ്റ് ആണെന്ന് വ്യക്തമാക്കി കൊണ്ടാണ് റിയാസ് ബിഗ് ബോസ് വീട്ടിലേക്ക് എത്തുന്നത്. കൊല്ലം അരിക്കോട് സ്വദേശിയാണ് റിയാസ്. എഞ്ചിനിയര്‍ ആയ റിയാസിന്റെ പ്രായം 24 വയസാണ്. ബിഗ് ബോസ് റിയാലിറ്റി ഷോയുടെ കട്ട ഫാനാണ് താനെന്നും വര്‍ഷങ്ങളായുള്ള സ്വപ്‌നമാണെന്നും റിയാസ് പറയുന്നു. തന്റെ നിലപാടുകള്‍ വ്യക്തമാക്കുന്നതില്‍ മടിക്കില്ലെന്നാണ് റിയാസ് പറയുന്നത്. ഫേക്ക് ഗെയിം കളിക്കാനും താനില്ലെന്നും താരം പറയുന്നു. റിയല്‍ സെല്‍ഫിനെ വീട്ടില്‍ വച്ച് മറ്റൊരാളായി വരുന്നതിനെ വിമര്‍ശിക്കുകയും ചെയ്തു. അങ്ങനെയുള്ളയാളുകള്‍ക്ക് വോട്ട് ചെയ്യുമ്പോള്‍ ശരിക്കും ആര്‍ക്കാണ് വോട്ട് ചെയ്യുന്നതെന്നാണ് റിയാസ് ചോദിക്കുന്നത്.

പിന്നാലെ മോഹന്‍ലാല്‍ റിയാസിനൊരു കിടിലന്‍ ടാസ്‌കും നല്‍കുകയും ചെയ്തു. അകത്തുള്ളവരെ മനസ്സിലാക്കിയതിന്റെ അടിസ്ഥാനത്തില്‍ ഇഷ്ടപ്പെട്ടവര്‍ക്ക് റോസ് പൂവ് കൊടുക്കാനും, ഇഷ്ടമല്ലാത്തവരെ ചുവന്ന മഷി കൊണ്ട് വെട്ടാനും ആയിരുന്നു ടാസ്‌ക്.. ഇത് പ്രകാരം റിയാസ് റോസാപുവ് നല്‍കിയത് ജാസ്മിനായിരുന്നു. രണ്ടാമതൊന്ന് ആലോചിക്കുക പോലും വേണ്ടി വന്നിരുന്നില്ല റിയാസിന്. പിന്നാലെ റോബിനെ വെട്ടുകയും ചെയ്തു. ഇതോടെ ബിഗ് ബോസ് വീട്ടിലെ റിയാസിന്റെ ഗെയിം പ്ലാന്‍ എന്താണെന്ന കാര്യം വ്യക്തമായിരിക്കുകയാണ്. പിന്നാലെ ബ്ലെസ്ലി, ദില്‍ഷ, സൂരജ്, ധന്യ, ലക്ഷ്മി പ്രിയ എന്നിവരേയും റിയാസ് വെട്ടി. ജാസ്മിന് മാത്രമാണ് റോസാപൂവ് നല്‍കിയത്.

റോബിന്‍ ഫേക്ക് ആണെന്നതാണ് വെട്ടാനുള്ള കാരണമായി റിയാസ് പറഞ്ഞത്. ബ്ലെസ്ലി സ്ത്രീകളെ അഭിസംബോധന ചെയ്യുന്നത് മോശമാണെന്നായിരുന്നു റിയാസ് പറഞ്ഞത്. ദില്‍ഷ തനിക്ക് വേണ്ടപ്പെട്ടവര്‍ക്ക് വേണ്ടി മാത്രമാണ് ശബ്ദമുയര്‍ത്തുന്നതെന്നാണ് റിയാസ് പറയുന്നത്. അതേസമയം സൂരജ് ഷുഗര്‍ കോട്ട് ചെയ്താണ് സംസാരിക്കുന്നതെന്നും ഒരുപാട് പേരുടെ സ്വപ്‌നം തകര്‍ത്ത് കിട്ടിയ അവസരം കുറേക്കൂടി നന്നായി ഉപയോഗിക്കണമെന്നും റിയാസ് പറഞ്ഞു. ധന്യ സേഫ് ഗെയിം കളിക്കുന്നു, ലക്ഷ്മിപ്രിയ പാട്രിയാര്‍ക്കല്‍ ചിന്താഗതിയുള്ള വ്യക്തിയാണെന്നാണ് റിയാസ് പറയുന്നത്. സ്ത്രീകള്‍ എങ്ങിനെയായിരിയ്ക്കണം എന്ന തന്റെ കാഴ്ചപ്പാട് മറ്റുള്ളവരില്‍ ഇന്‍ജക്ട് ചെയ്യുന്നു എന്നാണ് താരം പറഞ്ഞത്. നിമിഷ, അപര്‍ണ, അഖില്‍, റോണ്‍സണ്‍ എന്നിവര്‍ക്ക് ഒന്നും നല്‍കിയതും ഇല്ല.

അതേസമയം ഇത്തവണത്തെ മത്സരാര്‍ത്ഥികളില്‍ വിന്നിംഗ് മെറ്റീരിയല്‍ ഇല്ലെന്നും അതിനാല്‍ തനിക്ക് വിജയിയായി മാറാന്‍ സാധിക്കുമെന്നും റിയാസ് പറഞ്ഞു. ബിഗ് ബോസ് ചരിത്രത്തില്‍ ആദ്യമായി വിജയിക്കുന്ന വൈല്‍ഡ് കാര്‍ഡാകും താന്‍ എന്നാണ് റിയാസ് പറയുന്നത്. തന്റേതല്ലാത്ത പ്രശ്നമാണെങ്കിലും അഭിപ്രായം പറയേണ്ട ഇടത്ത് പറയും എന്നും റിയാസ് സലിം വ്യക്തമാക്കി. റിയാസിനെ ഇന്നലെ സീക്രട്ട് റൂമിലേക്ക് കടത്തി വിട്ടിരുന്നു. ഇന്ന് മറ്റൊരു വൈല്‍ഡ് കാര്‍ഡ് എന്‍ട്രി കൂടെയുണ്ടാകുമെന്നാണ് സൂചനകള്‍ വ്യക്തമാക്കുന്നത്. പിന്നാലെ രണ്ടു പേരെ ഒരുമിച്ച് പുറത്താക്കുമെന്നും റിപ്പോര്‍ട്ടുകളുണ്ട്. ഇതിന് ശേഷമായിരുന്നു ഇരട്ട വൈല്‍ഡ് കാര്‍ഡ് എന്‍ട്രിയുണ്ടാവുക എന്നാണ് വിലയിരുത്തപ്പെടുന്നത്.