'എന്നെ മുഴുവനായി നശിപ്പിച്ചു; ആവശ്യം കഴിയുമ്പോൾ വലിച്ചെറിയാനുള്ളതല്ലല്ലോ നമ്മുടെ ജീവിതം': സജി നായർ പറയുന്നു

ഇപ്പോഴിതാ, തനിക്കും പലതും പറയാനുണ്ട് എന്നാൽ സമയം ആകുമ്പോൾ എല്ലാം പറയാം എന്ന് പറയുകയാണ് സജി. ഇപ്പോൾ അഭിനയത്തിൽ ആണ് തന്റെ പൂർണ ശ്രദ്ധയെന്നും നടൻ പറയുന്നു. സമയം മലയാളത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യങ്ങൾ പറഞ്ഞത്. വിശദമായി വായിക്കാം.

ഞാനും തിരിച്ചു പറയാൻ തുടങ്ങിയാൽ മറ്റുള്ളവരുമായി ഒരു വ്യത്യാസവും ഇല്ലാതെയാകും. കുറച്ചധികം പറയാനുണ്ട്, പറയാനുള്ള സമയമാകുമ്പോൾ എല്ലാം പറയും. ആവശ്യം കഴിയുമ്പോൾ വലിച്ചെറിയാനുള്ളത് അല്ലല്ലോ നമ്മുടെയൊക്കെ ജീവിതം. എന്നെ മുഴുവനായും നശിപ്പിച്ചു എന്ന് മാത്രമേ എനിക്കിപ്പോൾ പറയാനുള്ളു. എന്റെ ശ്രദ്ധ ഇപ്പോൾ അഭിനയത്തിലാണ്. മറ്റൊന്നിനെ കുറിച്ചും ചിന്തിക്കാൻ സമയമില്ലെന്നും സജി പറയുന്നു.

താൻ എല്ലാ ഭാഷകളിലും പ്രോജക്ടുകൾ ചെയ്യാൻ തയ്യാറാണ്. സീരിയൽ ആണ് കൂടുതൽ ശ്രദ്ധിക്കാൻ താത്പര്യം, അതിന് ഭാഷകൾ ഒന്നും പ്രശ്നം ആയി തോന്നുന്നില്ല. നല്ല പ്രോജക്ടുകൾക്കായി കാത്തിരിക്കുകയാണ്. 32 വർഷമായി അഭിനയ മേഖലയിൽ ഉണ്ട്. നല്ല കഥാപാത്രങ്ങൾക്കായുള്ള കാത്തിരിപ്പിലാണ്. അത് മാത്രമാണ് ഇപ്പോഴത്തെ ആഗ്രഹമെന്നും നടൻ പറഞ്ഞു.

അതേസമയം, അടുത്തിടെ സോഷ്യൽ മീഡിയയിൽ സജി പങ്കുവച്ച കുറിപ്പ് ശ്രദ്ധനേടിയിരുന്നു. പുതുവർഷത്തെ വരവേറ്റ് കൊണ്ടായിരുന്നു കുറിപ്പ്. '2022 മരണത്തിനും ജീവിതത്തിനുമിടയിലൂടെ കടന്നുപോയ വർഷമാണെന്നും സജി പറഞ്ഞു. സ്വാർത്ഥ താൽപര്യങ്ങൾക്ക് വേണ്ടി എന്നോടൊപ്പം കൂടിയ പലരുടേയും മുഖംമൂടികൾ തിരിച്ചറിഞ്ഞ വർഷമാണ്, എന്നെ സ്നേഹിച്ചവരേയും ചതിച്ചവരെയും എന്റെ നന്മ ആഗ്രഹിക്കുന്നവരേയുമൊക്കെ തിരിച്ചറിഞ്ഞ വർഷം,'

ഭയന്നോടാൻമനസ്സില്ല. ചതിച്ചവർക്ക് നന്ദി, പുതിയ പാഠങ്ങൾ പഠിക്കാൻ സഹായിച്ചതിന്, കൂടെ നിന്നവർക്കും സഹായിച്ചവർക്കും നന്ദി, എന്നെ സ്നേഹിച്ചതിന്, 2023 മുന്നിലെത്തി എനിക്ക് എന്നും ഞാനാകാനേ കഴിയൂ. ആ പഴയ ഞാൻ,' എന്നാണ് അദ്ദേഹം കുറിച്ചത്.

ആലിലത്താലി എന്ന സീരിയലില്‍ അഭിനയിക്കുന്ന സമയത്താണ് ശാലു മേനോനും സജി നായരും അടുക്കുന്നത്. ആ ബന്ധം തുടര്‍ന്ന് വിവാഹത്തിലേക്കും എത്തുകയായിരുന്നു. 2016 ലായിരുന്നു ഇവരുടെ വിവാഹം.

ഏഴ് കൊല്ലത്തെ പ്രൊഫഷണല്‍ നാടകത്തിന് ശേഷമാണ് സജി സീരിയല്‍ ലോകത്തേക്ക് എത്തുന്നത്. കൃഷ്ണകൃപാസാഗരം മുതല്‍ സ്വാമി അയ്യപ്പന്‍ വരെയുള്ള നിരവധി പുരാണ സീരിയലുകളില്‍ നടൻ അഭിനയിച്ചു. നാരദനായി അഭിനയിച്ചാണ് സജി കയ്യടി നേടിയത്. 17 കൊല്ലം സ്ഥിരം നാരദനായി അഭിനയിച്ചിട്ടുണ്ട് സജി. യുഗപുരുഷന്‍ മുതല്‍ മഹാഗുരുവരെ കുമാരനാശാനായും അഭിനയിച്ചു.