അന്യ ദൈവങ്ങളെ ആരാധിച്ചതു കൊണ്ടല്ലേ പപ്പ മരിച്ചത്? ഇത്രയും ക്രൂരതയുള്ള മനുഷ്യരോയെന്ന് റിമി ടോമി

മലയാളികളുടെ പ്രിയ ഗായികയാണ് റിമി ടോമി. മലയാളികള്‍ നെഞ്ചേറ്റിയ ഒരുപാട് ഹിറ്റ് പാട്ടുകള്‍ റിമി ടോമി പാടിയിട്ടുണ്ട്. ഏത് സദസിനേയും തന്റെ പാട്ടു കൊണ്ടും സംസാരം കൊണ്ടുമൊക്കെ കയ്യിലെടുക്കാന്‍ സാധിക്കുന്ന അസാധ്യ പ്രതിഭ. പാട്ടിന് പുറമെ അവതാരകയായും അഭിനേത്രിയായുമൊക്കെ റിമി ടോമി കയ്യടി നേടിയിട്ടുണ്ട്. സംഗീത റിയാലിറ്റി ഷോ വിധികര്‍ത്താവായും നിറഞ്ഞു നില്‍ക്കുന്നു.

സോഷ്യല്‍ മീഡിയയില്‍ വളരെ സജീവമാണ് റിമി ടോമി. ഈയ്യടുത്ത് തന്റെ അച്ഛന്റെ മരണത്തെക്കുറിച്ച് റിമി ടോമി മനസ് തുറന്നിരുന്നു. ഒരു ടിവി പരിപാടിക്കിടെയായിരുന്നു റിമി വികാരഭരിതയായി പപ്പയെക്കുറിച്ച് സംസാരിച്ചത്. പൊതുവെ ചിരിക്കുകയും ചിരിപ്പിക്കുകയും ചെയ്യുന്ന റിമിയെ ആണ് കാണാറുള്ളത്. അതുകൊണ്ട് തന്നെ റിമിയുടെ കരച്ചില്‍ ആരാധകരേയും വേദനിപ്പിക്കുന്ന കാഴ്ചയായിരുന്നു.

ഇതിനിടെ ഇപ്പോഴിതാ മുമ്പൊരിക്കില്‍ ജെബി ജങ്ഷനില്‍ അതിഥിയായി എത്തിയപ്പോള്‍ റിമി ടോമി തന്റെ പപ്പയെക്കുറിച്ചും അദ്ദേഹത്തിന്റെ മരണ ശേഷം സോഷ്യല്‍ മീഡിയയില്‍ നിന്നുമുണ്ടായ പ്രതികരണങ്ങളെക്കുറിച്ചുമൊക്കെ മനസ് തുറക്കുന്ന വീഡിയോ ശ്രദ്ധ നേടുകയാണ്. അന്ന് കണ്ട കമന്റുകള്‍ കണ്ട് ഇങ്ങനൊക്കെ ചിന്തിക്കുന്ന മനുഷ്യര്‍ ഉണ്ടോയെന്ന് താന്‍ ചിന്തിച്ചു പോയെന്നാണ് റിമി ടോമി പറയുന്നത്.

പപ്പ അധികം സംസാരിക്കുന്ന ആളായിരുന്നില്ലെന്നാണ് റിമി ടോമി പറയുന്നത്. താന്‍ പുതിയ കാര്യങ്ങള്‍ ചെയ്യുന്നത് പപ്പയ്ക്ക് ഒരുപാട് ഇഷ്ടമായിരുന്നു. തന്നെ തേടി പുതിയ അവസരങ്ങള്‍ വരുമ്പോള്‍ നീയത് ചെയ്ത് നോക്ക്, നിന്നെ കൊണ്ട് പറ്റുമെന്ന് പറഞ്ഞ് തനിക്ക് ആത്മവിശ്വാസം തന്നിരുന്നത് പപ്പയായിരുന്നുവെന്നാണ് റിമി ടോമി പറയുന്നത്. താന്‍ നടിയാകണം എന്നൊന്നും പപ്പയ്ക്കുണ്ടായിരുന്നില്ല. എങ്കിലും ചെയ്ത് നോക്കിക്കൂടേ എന്ന് പറയുമായിരുന്നുവെന്നും റിമി ഓര്‍ക്കുന്നു.

തന്റെ ആഗ്രഹങ്ങളോടൊപ്പം പപ്പ എതിര്‍പ്പ് കാണിച്ചിരുന്നില്ലെന്നും താരം ഓര്‍ക്കുന്നു. അതേസമയം ഇന്ന് താന്‍ പപ്പ ഉണ്ടായിരുന്നുവെങ്കില്‍ എന്ന് ആലോചിക്കാറില്ല, കാരണം ഇപ്പോള്‍ ഇല്ലല്ലോ എന്നാണ് റിമി പറയുന്നത്. തന്റെ പപ്പയുടെ മരണത്തെക്കുറിച്ച് താന്‍ കണ്ടൊരു സോഷ്യല്‍ മീഡിയ കമന്റിനെക്കുറിച്ചും റിമി ടോമി പരിപാടിയില്‍ സംസാരിക്കുന്നുണ്ട്. അത് കണ്ടപ്പോള്‍ ഇങ്ങനൊക്കെ ചിന്തിക്കുന്ന ആള്‍ക്കാരുണ്ടോ എന്ന് ചിന്തിച്ചു പോയെന്നാണ് താരം പറയുന്നത്.

റിമി അന്യ ദൈവങ്ങളേ ആരാധിച്ചിട്ടില്ലേ അതുകൊണ്ടാണ് പപ്പ മരിച്ചത് എന്നായിരുന്നു കമന്റ്. ഇത്രയൊക്കെ ക്രൂരമായി ചിന്തിക്കുന്ന ആള്‍ക്കാര്‍ നമ്മുടെ ഇടയില്‍ ഉണ്ടല്ലോ എന്ന് ആലോചിച്ച് പോയെന്നാണ് താരം പറയുന്നത്. പൊതുവെ താന്‍ ഇന്റര്‍വ്യുകളിലും മറ്റും വന്നിരുന്ന് കരയാറില്ല. എങ്കിലും ജീവിതത്തില്‍ ഏറ്റവും പ്രിയപ്പെട്ടവരായ അപ്പന്‍, അമ്മ, സഹോദരങ്ങള്‍ ഇവരില്‍ ഒരാളെ നഷ്ടപ്പെടുമ്പോള്‍ വിഷമിച്ചു പോകുന്നതാണെന്നും റിമി പറയുന്നുണ്ട്.

തനിക്കുള്ള ഒരു കുറ്റബോധവും റിമി ടോമി പങ്കുവെക്കുന്നുണ്ട്. പീക്കു സിനിമയില്‍ പറയുന്ന, മാതാപിതാക്കളെ പരമാവധി കാലം ജീവിച്ചിരിപ്പിക്കേണ്ട കടമ മക്കള്‍ക്കാണ് എന്ന ഡയലോഗ് തന്നെ ഒരുപാട് സ്വാധീനിച്ചതാണെന്നാണ് റിമി പറയുന്നത്. എന്നാല്‍ മക്കള്‍ അക്കാര്യം പലപ്പോഴും വിട്ടു പോകും. തന്റെ പപ്പയ്ക്ക് എന്തെങ്കിലും അസുഖം ഉണ്ടായിരുന്നുവോ എന്ന് അറിയില്ലായിരുന്നു. മരിക്കുമ്പോള്‍ 57 വയസേയുള്ളൂ. ഓടി നടന്നിരുന്ന സമയത്ത് പെട്ടെന്നൊരു ദിവസം അറ്റാക്ക് വരികയായിരുന്നുവെന്നാണ് റിമി പറയുന്നത്.

മുമ്പേ അറിഞ്ഞിരുന്നുവെങ്കില്‍ ആശുപത്രിയില്‍ പോയി ബ്ലോക്ക് ഒക്കെ മാറ്റുവാന്‍ സാധിക്കുമായിരുന്നുവെന്നും അതൊരു കുറ്റബോധമായി മനസിലുണ്ടെന്നുമാണ് റിമി പറഞ്ഞത്. പപ്പയുടെ സ്ഥാനത്ത് പപ്പ തന്നെ വേണം അതിനി ഒരിക്കലും തിരിച്ചു കിട്ടില്ല. എല്ലാവരും മാതാപിതാക്കളോട് നന്നായി പെരുമാറണമെന്നും അവരെ വിഷമിപ്പിക്കരുതെന്നും റിമി ടോമി പറയുന്നുണ്ട്.