'അവൾ ഇപ്പോൾ തന്നെ ഒരു സ്റ്റാറാണ്...', അല്ലുവിന്റെ മകളെ കുറിച്ച് സാമന്ത

അല്ലു അർജുൻ മാത്രമല്ല സഹോദരൻ അല്ലു സിരീഷും മലയാളിക്ക് സുപരിചിതനാണ്. മോഹൻലാലിനൊപ്പം 1971 എന്ന സിനിമയൽ പട്ടാളക്കാരനായി സിരീഷ് അഭിനയിച്ചിരുന്നു. അച്ഛന്റെ പാത പിന്തുടർന്ന് അല്ലു അർജുന്റെ മകൾ നാല് വയസുകാരി അല്ലു അർഹയും അഭിനയം ആരംഭിച്ചിട്ടുണ്ട്. ആദ്യ ചിത്രം സാമന്തയുടെ ശാകുന്തളമാണ്. അടുത്തിടെയാണ് സിനിമയുടെ ചിത്രീകരണം പൂർത്തിയായത്. ഇപ്പോൾ അല്ലു അർഹയുടെ അഭിനയത്തെ കുറിച്ച് സാമന്ത പറഞ്ഞ വാക്കുകളാണ് ശ്രദ്ധ നേടുന്നത്. ശാകുന്തളത്തിൽ ഭരത രാജകുമാരിയുടെ കുട്ടിക്കാലമാണ് അല്ലു അർഹ അവതരിപ്പിക്കുക. സിനിമ പുറത്തിറങ്ങുമ്പോൾ അർ​ഹ സിനിമാപ്രേമികൾക്കിടയിൽ തരം​ഗമാകുമെന്നാണ് സാമന്ത പറഞ്ഞത്.

'അവൾ ജനിച്ചത് തന്നെ റോക്ക്സ്റ്റാറായിട്ടാണ്. പറയുന്നതെല്ലാം മനസിലാക്കി ചെയ്യും. സെറ്റിൽ മൂന്നിറിനടുത്ത് ആളുകൾ ഉണ്ടായിരുന്നിട്ടും അവൾ ആത്മവിശ്വാസത്തോടെ അവളെ ഏൽപ്പിച്ച ജോലികൾ ചെയ്തു. ആദ്യത്തെ ടെയ്ക്കിൽ തന്നെ അവൾ മനോഹരമായി അഭിനയിച്ചു. കൂടുതൽ ടെയ്ക്കുകൾ വേണ്ടി വന്നിട്ടില്ല. അർഹ എല്ലാവരേയും അതിശയിപ്പിക്കുന്ന തരത്തിലാണ് തെലുങ്ക് സംസാരിക്കുന്നത്. അവൾ ഒരു സൂപ്പർസ്റ്റാറാകാൻ ജനിച്ച കുട്ടിയാണ്. അവൾ എന്നോടൊപ്പം അരങ്ങേറ്റം കുറിച്ചതിൽ എനിക്ക് സന്തോഷമുണ്ട്. ശാകുന്തളം കണ്ടുകഴിയുമ്പോൾ ഞാൻ പറഞ്ഞത് സത്യമാണെന്ന് നിങ്ങൾ മനസിലാക്കുകയും എന്റെ നിരീക്ഷണം ശരിയാണ് എന്ന് പറയുകയും ചെയ്യും' സാമന്ത ഫിലിം ഫെയറിന് നൽകിയ അഭിമുഖത്തിൽ പറഞ്ഞു. അല്ലു ഫാമിലിയെ നാലാം തലമുറയുടെ സിനിമാ അരങ്ങേറ്റമാണ് അർഹയുടെ ശാകുന്തളത്തിലെ അഭിനയത്തിലൂടെ നടന്നത്.

Recommended Video

ചാനലുകൾക്കെതിരെ പരാതിയുമായി സാമന്ത | FilmiBeat Malayalam

സമാന്ത ശകുന്തളയായെത്തുന്ന ചിത്രത്തിൽ സൂഫിയും സുജാതയും സിനിമയിലൂടെ വെള്ളിത്തിരയിലെത്തിയ ദേവ് മോഹനാണ് ദുഷ്യന്തനായി എത്തുന്നത്. അദിതി ബാലൻ, മോഹൻ ബാബു, മൽഹോത്ര ശിവം എന്നിവരാണ് മറ്റ് താരങ്ങൾ. ഗുണശേഖരനാണ് ചിത്രം സംവിധാനം ചെയ്യുന്നത്. അല്ലു അര്‍ഹയുടെ നാലാം പിറന്നാള്‍ ദിനത്തില്‍ അല്ലു അർജുൻ അഞ്ജലി എന്ന പ്രശസ്തമായ ​ഗാനം റീക്രിയേറ്റ് ചെയ്‌ത് ആ വീഡിയോ യുട്യൂബിലൂടെ ആരാധകര്‍ക്കായി പങ്കുവെച്ചിരുന്നു. അഞ്ജലിയിലെ ബേബി ശ്യാമിലിയെ അനുസ്മരിപ്പിക്കും വിധമാണ് അല്ലു അര്‍ഹ വീഡിയോയില്‍ ഉടനീളം പ്രത്യക്ഷപ്പെട്ടത്. അല്ലു അർജുന്‍റേതായി ഏറ്റവും ഒടുവിൽ റിലീസിനെത്തിയ ചിത്രം പൂജാ ഹെഗ്‌ഡെ നായികയായ അങ്ങ് വൈകുണ്ഠപുരത്ത് ആണ്. ചിത്രം മികച്ച വിജയം നേടി. ഇനി റിലീസ് ചെയ്യാനുള്ളത് പുഷ്പ എന്ന സിനിമയാണ്. അല്ലു അർജുന്റെ ഇതുവരെ പ്രേക്ഷകർ കാണാത്ത രൂപവും ഭാവവുമായിരിക്കും പുഷ്പയിലൂടെ കാണാൻ സാധിക്കുക.