ചത്തിട്ടില്ലാ..! പൊരുതും ഞാന്‍! രോഗത്തെക്കുറിച്ച് ആദ്യമായി സമാന്ത, വികാരഭരിതയായി താരം

ഇതിനിടെ സോഷ്യല്‍ മീഡിയയില്‍ നിന്നും മാധ്യമങ്ങളില്‍ നിന്നുമെല്ലാം വിട്ടു നില്‍ക്കുകയായിരുന്നു സമാന്ത. ഇപ്പോഴിതാ താരം വീണ്ടും തിരിച്ചെത്തിയിരിക്കുകയാണ്. തന്റെ പുതിയ സിനിമയായ യശോദയിലൂടെയാണ് സമാന്ത ബോക്‌സ് ഓഫീസിലേക്ക് വീണ്ടുമെത്തുന്നത്. ഈ സിനിമയുടെ പ്രൊമോഷന്‍ പരിപാടികള്‍ക്കായി താരം സോഷ്യല്‍ മീഡിയയിലും മാധ്യമങ്ങള്‍ക്ക് മുന്നിലും വീണ്ടുമെത്തുകയാണ്.

കഴിഞ്ഞ ദിവസം യശോദയുടെ പ്രൊമോഷന്‍ പരിപാടികള്‍ ആരംഭിച്ചതായി സമാന്ത സോഷ്യല്‍ മീഡിയയിലൂടെ അറിയിച്ചിരുന്നു. ഇപ്പോഴിതാ ഒരു പ്രൊമോഷന്‍ പരിപാടിക്കിടെ തന്റെ ആരോഗ്യാവസ്ഥയെക്കുറിച്ച് മനസ് തുറക്കുന്ന സമാന്തയുടെ വീഡിയോ സോഷ്യല്‍ മീഡിയയുടെ ശ്രദ്ധ നേടുകയാണ്. വളരെ വൈകാരികമായിട്ടാണ് വീഡിയോയില്‍ സമാന്ത സംസാരിക്കുന്നത്.

''ഞാന്‍ എന്റെ ഇന്‍സ്റ്റഗ്രാം പോസ്റ്റില്‍ പറഞ്ഞിരിക്കുന്നത് പോലെ ചില ദിവസങ്ങള്‍ നല്ലതായിരിക്കും, ചിലത് മോശമായിരിക്കും. ചില ദിവസങ്ങളില്‍ ഇനിയൊരു അടി കൂടി വെക്കുക എന്നത് കഷ്ടമാണെന്ന് എനിക്ക് തോന്നിയിട്ടുണ്ട്. പക്ഷെ തിരിഞ്ഞു നോക്കുമ്പോള്‍, ഞാന്‍ ഒരുപാട് വേദനകള്‍ താണ്ടി ഒരുപാട് ദൂരം വന്നിരിക്കുന്നതായി മനസിലാകുന്നുണ്ട്. ഞാന്‍ ഇവിടെ നില്‍ക്കുന്നത് പൊരുതാനാണ്'' എന്നാണ് താരം പറയുന്നത്.

അതേസമയം തന്റെ ആരോഗ്യസ്ഥിതി പലരും റിപ്പോര്‍ട്ട് ചെയ്യുന്നത് പോലെ ജീവന് ആപത്തുണ്ടാകുന്ന ഘട്ടത്തിലെത്തിയിട്ടില്ലെന്നും സമാന്ത പറയുന്നു. ''ഒരു കാര്യം വ്യക്തമാക്കാന്‍ ആഗ്രഹിക്കുന്നു. എന്റെ ജീവന് ഭീഷണിയാകുന്ന അത്ര മോശമാണ് എന്റെ ആരോഗ്യമെന്ന് ചില റിപ്പോര്‍ട്ടുകള്‍ കണ്ടു. നിലവില്‍ ഞാനുള്ള ഘട്ടം ജീവന് ഭീഷണിയാകുന്നതല്ല. ഞാന്‍ ഇതുവരേയും മരിച്ചിട്ടില്ല. ആ തലക്കെട്ടുകള്‍ തീര്‍ത്തും അനവസരത്തിലുള്ളതാണ്'' എന്നാണ് സമാന്ത പറയുന്നത്.

ആക്ഷന്‍ ത്രില്ലറാണ് സമാന്തയുടെ യശോദ. ചിത്രത്തില്‍ തന്റെ കുഞ്ഞിനെ രക്ഷിക്കാനായി ഏതറ്റം വരേയും പോകാന്‍ തയ്യാറാകുന്ന അമ്മയുടെ വേഷമാണ് സമാന്ത അഭിനയിക്കുന്നത്. ചിത്രത്തിന്റെ ട്രെയിലര്‍ സോഷ്യല്‍ മീഡിയയില്‍ വലിയ ചര്‍ച്ചയായി മാറിയിരുന്നു. ഫാമിലി മാനിന് ശേഷം സമാന്തയെ വീണ്ടും ആക്ഷന്‍ റോളില്‍ കാണാമെന്നുറപ്പാണ്. വരലക്ഷ്മി ശരത്കുമാര്‍, ഉണ്ണി മുകുന്ദന്‍, തുടങ്ങിയവരും യശോദയില്‍ പ്രധാന വേഷങ്ങളിലെത്തുന്നുണ്ട്.

നിരവധി സിനിമകളാണ് സമാന്തയുടേതായി അണിയറയിലുള്ളത്. ഹിന്ദിയിലും തെലുങ്കിലും ചിത്രങ്ങള്‍ തയ്യാറാകുന്നുണ്ട്. ഖുഷി, ശാകുന്തളം തുടങ്ങിയ സിനിമകളാണ് തെലുങ്കിലുള്ളത്. ഹിന്ദിയില്‍ താപ്സി പന്നു നിർമ്മിക്കുന്ന ചിത്രവും പുരോഗമിക്കുന്നുണ്ട്.