'സാമന്ത പോയിട്ട് ഒരുമാസം', വേർപിരിയലിന് ശേഷമുള്ള ചായിയുടെ ആദ്യ കുറിപ്പ് ഇങ്ങനെ...!

സാമന്തയുമായി വേർപിരിഞ്ഞ ശേഷം ആദ്യമായി ഒരു കുറിപ്പ് സോഷ്യൽമീഡിയയിൽ പങ്കുവെച്ചിരിക്കുകയാണ് നാ​ഗചൈതന്യ. താൻ അടുത്തിടെ വായിച്ച ഒരു പുസ്തകത്തിന്റെ ഫോട്ടോ ഷെയർ ചെയ്തുകൊണ്ടായിരുന്നു നാ​ഗചൈതന്യയുടെ കുറിപ്പ്. മാത്യു ഡേവിഡ് മക്കോനാഗെ എന്ന അമേരിക്കൻ നടൻ എഴുതിയ ​ഗ്രീൻ ലൈറ്റ്സ് എന്ന പുസ്തകം വായിച്ച ശേഷമുള്ള തോന്നലുകളാണ് നാ​ഗചൈതന്യ കുറിച്ചിരിക്കുന്നത്. ​ഗ്രീൻ ലൈറ്റ്സ് എന്ന പുസ്തകം വായിച്ചപ്പോൾ അത് ജീവിതത്തിന് എഴുതുന്ന പ്രണയ ലേഖനമായി തോന്നി എന്നാണ് നാ​ഗ ചൈതന്യ കുറിച്ചത്. 'ജീവിതത്തിനൊരു പ്രണയലേഖനം... നിങ്ങളുടെ യാത്ര പങ്കിട്ടതിന് നന്ദി മാത്യു ഡേവിഡ് മക്കോനാഗെ... ഈ വായന എനിക്ക് ഒരു പച്ച വെളിച്ചം സമ്മാനിച്ചു..... ബഹുമാനമുണ്ട് സർ....' നാ​ഗചൈതന്യ കുറിച്ചു.

നാലാം വിവാഹ വാർഷികത്തിന് ദിവസങ്ങൾ മാത്രം ശേഷിക്കെയായിരുന്നു ഇരുവരും വിവാഹമോചനം പ്രഖ്യാപിച്ചത്. ഏറെ നാളത്തെ പ്രണയത്തിന് ശേഷം 2017ൽ ഇരുവരും ആർഭാടമായ വിവാഹം നടത്തിയത്. ​ഗോവയിലായിരുന്നു വിവാഹ ചടങ്ങുകൾ നടന്നത്. വിവാഹമോചന ശേഷം ഇരുവരേയും സംബന്ധിച്ച് നിരവധി ഊ​ഹാപോഹങ്ങൾ നിറഞ്ഞ വാർത്തകൾ വന്നപ്പോഴും സാമന്ത മാത്രമാണ് പരസ്യമായി പ്രതികരിച്ചത്. നാ​ഗചൈതന്യ അപ്പോഴും മൗനം പാലിക്കുകയായിരുന്നു. സോഷ്യൽമീഡിയ വഴി പ്രചരിക്കുന്ന വാർത്തകളോട് പ്രതികരിക്കാൻ താൽപര്യമില്ലാത്തയാളാണെന്ന് നേരത്തെ തന്നെ നാ​ഗചൈതന്യ വ്യക്തമാക്കിയിട്ടുണ്ട്.

Recommended Video

ചാനലുകൾക്കെതിരെ പരാതിയുമായി സാമന്ത | FilmiBeat Malayalam

നാ​ഗചൈതന്യയുടെ പുതിയ വിശേഷം ലാൽ സിങ് ഛദ്ദ എന്ന താരത്തിന്റെ ആദ്യ ബോളിവുഡ് സിനിമ റിലീസിന് തയ്യാറെടുക്കുന്നുവെന്നതാണ്. ആമിർ ഖാൻ, കരീന കപൂർ എന്നിവർ കേന്ദ്ര കഥാപാത്രങ്ങളാകുന്ന സിനിമ ഹോളിവുഡ് സിനിമ ഫോറസ്റ്റ് ​ഗബ്ബിന്റെ ഇന്ത്യൻ റീമേക്കാണ്. നാ​ഗചൈതന്യയും ചിത്രത്തിൽ ശ്രദ്ധേയമായ വേഷം കൈകാര്യം ചെയ്യുന്നുണ്ട്. 2022 ഏപ്രില്‍ 14ന് ലാൽ സിങ് ഛദ്ദ തിയേറ്ററുകളിലെത്തുമാണ് അണിയറപ്രവർത്തകർ അറിയിച്ചിരിക്കുന്നത്. ഇതേ ദിവസം തന്നെയാണ് ബ്രഹ്മാണ്ഡ പാൻ ഇന്ത്യൻ സിനിമ കെജിഎഫ് ചാപ്റ്റർ 2വും റിലീസ് ചെയ്യുന്നത്. വലിയ രണ്ട് സിനിമകൾ ഒരേ ദിവസം റിലീസിനെത്തുന്ന ആവേശത്തിലാണ് ആരാധകരും.