ദിവസം ഒരു നേരം മാത്രം ഭക്ഷണം, പല ജോലികളും ചെയ്തു; പഠനകാലത്തെക്കുറിച്ച് സമാന്ത

ഒരിക്കല്‍ താന്‍ നേരിട്ട വെല്ലുവിളികളെക്കുറിച്ച് സമാന്ത തന്നെ മനസ് തുറന്നിരുന്നു. ''അധികം വര്‍ഷങ്ങള്‍ മുമ്പൊന്നുമല്ല, ഞാന്‍ നിങ്ങളെ പോലൊരാളായിരുന്നു. നിങ്ങളെല്ലാവരും കൂടുതല്‍ പ്രശസ്തരും പണക്കാരും കരുത്തരും ആകട്ടെ എന്ന് ഞാന്‍ ആശംസിക്കുന്നു. ആത്മാര്‍ത്ഥമായി തന്നെ ഞാനത് നിങ്ങള്‍ക്കെല്ലാവര്‍ക്കും ആശംസിക്കുന്നുണ്ട്. കാരണം അത് സാധ്യമാണെന്നത് കൊണ്ട് തന്നെ. പഠിക്കുന്ന കാലത്ത് അച്ഛനും അമ്മയും എന്നോട് പറഞ്ഞിരുന്നത് പഠിക്ക് പഠിക്ക് എന്നാലേ വലിയ ആളാന്‍ പറ്റൂ എന്നായിരുന്നു. നിങ്ങളെ ഉപദേശിക്കാന്‍ ഞാന്‍ ആളല്ല. എന്നാലും ഞാന്‍ നന്നായി പഠിച്ചു. കോളേജിലെ ടോപ്പര്‍ ആയി. പക്ഷെ തുടര്‍ പഠനത്തിനുള്ള പണം എന്റെ മാതാപിതാക്കളുടെ പക്കലുണ്ടായിരുന്നില്ല. എനിക്കൊരു സ്വപ്‌നമോ ഭാവിയോ ഒന്നുമുണ്ടായിരുന്നില്ല'' സമാന്ത പറയുന്നു.

''ഞാന്‍ പറയുന്നത് എന്താണെന്ന് വച്ചാല്‍, നിങ്ങളുടെ മാതാപിതാക്കളോ മറ്റോ നിങ്ങള്‍ തിരഞ്ഞെടുക്കുമെന്ന് കരുതുന്നൊരു പാതയുണ്ടാകാം. പക്ഷെ ഞാന്‍ പറയുന്നത് നിങ്ങള്‍ക്ക് ഒരു സ്വപ്‌നമുണ്ടാകണം. അത് എന്ത് തന്നെയാണെങ്കിലും നിങ്ങളത് നേടണം എന്നാണ്'' എന്നായിരുന്നു പെണ്‍കുട്ടികളുമായി നടത്തിയ ഇന്ററാക്ഷനില്‍ സമാന്ത അന്ന് പറഞ്ഞത്. പിന്നാലെ താന്‍ തുടക്കകാലത്ത് ഒരു നേരം മാത്രം ഭക്ഷണം കഴിച്ചും, പല തരത്തിലുള്ള ജോലികള്‍ ചെയ്തും ഏറെ നാള്‍ കഷ്ടപ്പെട്ടതിനെക്കുറിച്ചും സമാന്ത മനസ് തുറന്നു. ഈ സമയത്തായിരുന്നു സമാന്ത മോഡിലിംഗ് പാര്‍ട്ട് ടൈം ആയി ചെയ്യാന്‍ തുടങ്ങുന്നത്. ആ വഴി പക്ഷെ സമാന്തയുടെ ജീവിതം മാറ്റി മറിക്കുന്നതായിരുന്നു.

ഇന്ന് സമാന്ത തെന്നിന്ത്യന്‍ സിനിമയിലെ സൂപ്പര്‍ താരമാണ്. ഫാമിലി മാനിലെ സമാന്തയുടെ പ്രകടനം താരത്തിന് ഒരുപാട് പ്രശംസ നേടിക്കൊടുത്തിരുന്നു. പിന്നാലെ താന്‍ ബോളിവുഡില്‍ സാന്നിധ്യം അറിയിക്കാന്‍ തീരുമാനിച്ചതായാണ് സമാന്ത പറയുന്നത്. ഇതിന്റെ ഭാഗമായി കഥകള്‍ കേള്‍ക്കുകയാണ് സമാന്ത ഇപ്പോള്‍. ബോളിവുഡ് താരം താപ്‌സി പന്നു നിര്‍മ്മിക്കുന്ന, സ്ത്രീകേന്ദ്രീകൃതമായൊരു സിനിമയ്ക്കായുള്ള ചര്‍ച്ചകള്‍ നടക്കുകയാണ് ഇപ്പോള്‍. താപ്‌സി നിര്‍മ്മിക്കുന്ന ചിത്രത്തില്‍ താന്‍ അഭിനയിക്കുമെന്ന് ഈയ്യടുത്ത് സമാന്ത തന്നെ വ്യക്തമാക്കിയിരുന്നു. മറ്റ് സിനിമകളുടേയും കഥകള്‍ കേള്‍ക്കുന്നുണ്ട് താരം. അതേസമയം പുഷ്പയിലെ സമാന്തയുടെ ഡാന്‍സ് നമ്പര്‍ ട്രെന്റായി മാറിയിരുന്നു. അഞ്ച് കോടിയാണ് ഇതിനായി സമാന്ത പ്രതിഫലം വാങ്ങിയതെന്നും റിപ്പോര്‍ട്ടുകളുണ്ട്.

Recommended Video

Kapp movie pooja ceremony | Alwyn Antony | Mathew Thomas | FilmiBeat Malayalam

അതേസമയം ഈയ്യടുത്തായിരുന്നു സമാന്തയും നാഗ ചൈതന്യയും വിവാഹ മോചിതരായത്. ഏറെ നാളത്തെ പ്രണയത്തിന് ശേഷം 2017 ലായിരുന്നു ഇരുവരും വിവാഹിതരായത്. എന്നാല്‍ തങ്ങളുടെ നാലാം വിവാഹ വാര്‍ഷികത്തിന് ദിവസങ്ങള്‍ മാത്രം ബാക്കി നില്‍ക്കെ പിരിഞ്ഞതായി താരങ്ങള്‍ സോഷ്യല്‍ മീഡിയയിലൂടെ അറിയിക്കുകയായിരുന്നു. എന്നാല്‍ എന്തുകൊണ്ടാണ് തങ്ങള്‍ പിരിയാന്‍ തീരുമാനിച്ചതെന്ന് സമാന്തയും നാഗ ചൈതന്യയും വ്യക്തമാക്കിയിട്ടില്ല. ഇതിനിടെ സമാന്തയ്‌ക്കെതിരെ സോഷ്യല്‍ മീഡിയയില്‍ ചില വ്യാജ പ്രചരണങ്ങള്‍ നടന്നിരുന്നു. താരത്തിന് മറ്റൊരു പ്രണയമുണ്ടെന്നടക്കം പ്രചരണങ്ങളുണ്ടായിരുന്നു. ഇത്തരം പ്രചരണങ്ങള്‍ക്കെതിരെ സമാന്ത തന്നെ സോഷ്യല്‍ മീഡിയയിലൂടെ രംഗത്ത് എത്തുകയായിരുന്നു.