ഒമർ ലുലു സിനിമ ബിഗ് ബോസിലെത്താനുള്ള ഷോർട്ട് കട്ട്! ഇവർ ബിഗ് ബോസിലെത്തിയത് ഒമര്‍ ലുലു വഴിയോ?

ബിഗ് ബോസ് മലയാളം സീസണ്‍ 2വിലെ മത്സരാര്‍ത്ഥിയായിരുന്നു പരീക്കുട്ടി പെരുമ്പാവൂര്‍. ഒമര്‍ ലുലു സംവിധാനം ചെയ്ത ഹാപ്പി വെഡ്ഡിംഗ്‌സിലൂടെയായിരുന്നു പരീക്കുട്ടിയുടെ സിനിമാ അരങ്ങേറ്റം. ചിത്രം ശ്രദ്ധിക്കപ്പെട്ടതോടെ തുടര്‍ച്ചയായി വന്ന ചില ഒമര്‍ ലുലു ചിത്രങ്ങളിലും പരീക്കുട്ടി അഭിനയിച്ചിരുന്നു. സിനിമയ്ക്ക് പുറത്തും ഒമര്‍ ലുലുവുമായി അടുത്ത സൗഹൃദമാണ് പരീക്കുട്ടിക്കുള്ളത്.  

ബിഗ് ബോസ് മലയാളം സീസണ്‍ 3യില്‍ വൈല്‍ഡ് കാര്‍ഡ് എന്‍ട്രിയിലൂടെ എത്തിയ മത്സരാര്‍ത്ഥിയായിരുന്നു നടി രമ്യ പണിക്കര്‍. ഒമര്‍ ലുലു ചിത്രം ചങ്ക്‌സിലൂടെയാണ് രമ്യ ശ്രദ്ധിക്കപ്പെടുന്നത്. മോഡലിങ്ങിലൂടെ കരിയര്‍ തുടങ്ങിയ രമ്യ 2016ല്‍ പുറത്തിറങ്ങിയ ഒരേ മുഖം എന്ന ചിത്രത്തിലൂടെയായിരുന്നു വെള്ളിത്തിരയിലെത്തുന്നത്. തുടര്‍ന്ന് മാസ്റ്റര്‍പീസ്, ടിയാന്‍, ലിയാന്‍സ്, സണ്‍ഡേ ഹോളിഡേ തുടങ്ങി നിരവധി ചിത്രങ്ങളില്‍ അഭിനയിക്കുകയും ചെയ്തിരുന്നു. എങ്കിലും ബിഗ് ബോസ് താരം എന്ന നിലയില്‍ തന്നെയാണ് രമ്യ കൂടുതലും അറിയപ്പെട്ടത്.  

ബിഗ് ബോസ് സീസണ്‍ 3യിലെ മറ്റൊരു മത്സരാര്‍ത്ഥിയായിരുന്നു നടിയും മോഡലുമായ മിഷേല്‍ ആന്‍ ഡാനിയേല്‍. ഒമര്‍ ലുലു സംവിധാനം ചെയ്ത ഒരു അഡാര്‍ ലവിലൂടെയാണ് മിഷേലും പ്രേക്ഷകര്‍ക്കിടയില്‍ ശ്രദ്ധിക്കപ്പെടുന്നത്.  

ഒമര്‍ ലുലു ചിത്രം നല്ല സമയത്തിലൂടെ സിനിമയിലെത്തിയ എയ്ഞ്ചലീന മറിയയാണ് ബിഗ് ബോസ് മലയാളത്തില്‍ പങ്കെടുക്കുന്ന മറ്റൊരു ഒമര്‍ ലുലു നായിക. ചിത്രത്തിന്റെ റിലീസിന്റെ അന്നു തന്നെ വിവാദ പ്രസ്താവനയിലൂടെ സോഷ്യല്‍മീഡിയില്‍ ശ്രദ്ധിക്കപ്പെട്ട എയ്ഞ്ചലീന ബിഗ് ബോസിലെ മികച്ച മത്സരാര്‍ത്ഥിയായിരിക്കുമെന്നാണ് പ്രേക്ഷകര്‍ പറയുന്നത്.