കത്രീനയ്ക്കും വിക്കിക്കും പുറകെ പാപ്പരാസികൾ, താരങ്ങളുടെ പുതിയ വീഡിയോ വൈറൽ

വിക്കി കൗശലും കത്രീനയും തമ്മിൽ പ്രണയത്തിലാണെന്ന് നിരവധി വാർത്തകൾ വരുമ്പോഴും ഇരുവരും വാർത്തകൾ നിഷേധിച്ച് രം​ഗത്തെത്തിയിട്ടില്ല. അതിനാൽ തന്നെ ഇരുവരേയും ഒരുമിച്ച് കാണുമ്പോഴെല്ലാം താരങ്ങൾക്കിടയിൽ സൗഹൃദത്തിനും മുകളിൽ എന്തോ ഒന്ന് ഉള്ളതായാണ് ആരാധകരും കണക്കാക്കുന്നത്. ഇപ്പോൾ വിക്കി-കത്രീന ജോഡിയുടെ പുതിയൊരു വീഡിയോയാണ് വൈറലാകുന്നത്. വിക്കി കൗശലിനെ കെട്ടിപിടിച്ച് നിൽക്കുന്ന കത്രീനയുടെ വീഡിയോയാണത്. ഇതാണ് യഥാർഥ സ്നേഹമെന്നാണ് വീഡിയോയ്ക്ക് കമന്റായി ആരാധകർ കുറിച്ചത്. വിക്കി കൗശലിന്റേതായി കഴിഞ്ഞ ദിവസം റിലീസായ പുതിയ സിനിമ സർദാർ ഉദ്ദം കാണാനെത്തിയപ്പോഴുള്ള കത്രീനയുടെ വീഡിയോയാണത്.

വിക്കി കൗശലിന്റെ ആരാധകരുടെ ഇൻസ്റ്റ​ഗ്രാം പേജിലാണ് വൈറലായ ഈ വീഡിയോ പ്രത്യക്ഷപ്പെട്ടത്. കത്രീനക്കായി തിയേറ്ററിന് പുറത്ത് കാത്തുനിൽക്കുന്ന വിക്കി കൗശലിനെയും ശേഷം വാഹനത്തിൽ തിയേറ്ററിന് മുമ്പിൽ വന്നിറങ്ങിയ കത്രീന വന്നയുടൻ വിക്കി കൗശലിനെ വാരിപുണർന്ന് നിൽക്കുന്നതുമാണ് വീഡിയോയിൽ കാണാൻ സാധിക്കുന്നത്. വിക്കിയോടൊപ്പം നിൽക്കുമ്പോൾ കത്രീനയുടെ മുഖത്ത് അതിയായ സന്തോഷം കാണാൻ സാധിക്കുന്നുണ്ടെന്നും വാക്കുകളാൽ പറയാത്ത പലതും കത്രീനയുടെ കണ്ണുകൾ പറയുന്നുണ്ടെന്നുമാണ് വീഡിയോയ്ക്ക് ആരാധകർ കമന്റായി കുറിച്ചത്. ഈ താരജോഡി ഇഷ്ടപ്പെടുന്ന ആരാധകർ ഇരുവരും ഒന്നിക്കുന്നത് കാണാൻ ആ​ഗ്രഹമുണ്ടെന്നും കമന്റായി കുറിച്ചിരുന്നു.

കുറച്ച് മാസങ്ങൾക്ക് മുമ്പ് നടൻ ഹർഷ് വർധൻ കപൂർ വിക്കി കൗശലും കത്രീന കൈഫും ഡേറ്റിങ്ങിലാണെന്ന് ഒരു ചാറ്റ് ഷോയ്ക്കിടെ പറഞ്ഞിരുന്നു. ഇവയെല്ലാം ചേർത്തുവെച്ചാണ് ആരാധകരും വിക്കി-കത്രീന പ്രണയജോഡികളെ കുറിച്ച് ആകാംഷയോടെ പറയുന്നത്. വിക്കി കൗശല്‍ നായകനായ സര്‍ദാര്‍ ഉദ്ധം ഷൂജിത് സിര്‍കാര്‍ ആണ് സംവിധാനം ചെയ്തിരിക്കുന്നത്. സര്‍ദാര്‍ ഉദ്ധം എന്ന ചിത്രത്തിലെ ഫോട്ടോകള്‍ ഓണ്‍ലൈനില്‍ തരംഗമായിരുന്നു. ഉദ്ധം സിംഗിന്റെ വേഷത്തിലാണ് ചിത്രത്തില്‍ വിക്കി കൗശല്‍ അഭിനയിക്കുക. ഇന്ത്യൻ സ്വാതന്ത്ര്യസമരത്തിലെ യഥാര്‍ഥങ്ങളെ സംഭവങ്ങളെ ആസ്‍പദമാക്കിയാണ് ചിത്രം ഒരുക്കിയിരിക്കുന്നത്. 1919ലെ ക്രൂരമായ ജാലിയൻവാലാബാഗ് കൂട്ടക്കൊലയെ ന്യായീകരിച്ച മൈക്കിള്‍ ഒ ഡ്വിയറെ വെടിവെച്ച് കൊന്ന സ്വാതന്ത്ര്യസമര സേനാനിയായിരുന്നു ഉദ്ധം സിംഗ്. ഉദ്ധം സിംഗിന്റെ വേഷത്തിലാണ് ചിത്രത്തില്‍ വിക്കി കൗശല്‍ അഭിനയിക്കുന്നത്. ആമസോൺ പ്രൈമിലും ചിത്രത്തിന്റെ സ്ട്രീമിങ് ആരംഭിച്ചിട്ടുണ്ട്.

Recommended Video

ബോളിവുഡ് താര ദമ്പതികളും, പ്രണയ കഥയും | FilmiBeat Malayalam

ഉറി: ദ സര്‍ജിക്കല്‍ സ്‍ട്രൈക്ക് എന്ന സിനിമയിലൂടെ രാജ്യത്താകെ ആരാധകരെ സ്വന്തമാക്കിയ നടനാണ് വിക്കി കൗശല്‍. മികച്ച നടനുള്ള ദേശീയ പുരസ്‍കാരവും ചുരുങ്ങിയ സിനിമാ ജീവിതത്തിലൂടെ വിക്കി കൗശൽ നേടിയിരുന്നു. വിക്കി കൗശലും കത്രീന കൈഫും ഒന്നിച്ചുള്ള ഫോട്ടോകളും നേരത്തെ സാമൂഹ്യമാധ്യമങ്ങളില്‍ ശ്രദ്ധനേടിയിരുന്നു. അടുത്ത കാലത്തായി വിക്കി കൗശലും കത്രീന കൈഫും ഒന്നിച്ചാണ് പ്രോഗ്രാമുകളില്‍ പങ്കെടുക്കാറുള്ളത്. ഷെര്‍ഷയുടെ സ്‍ക്രീനിങിന് ഇരുവരും ഒന്നിച്ച് എത്തിയത് സിനിമാ മാധ്യമങ്ങള്‍ റിപ്പോര്‍ട്ട് ചെയ്‍തിരുന്നു.