ആരോടും നോ പറയാൻ അറിയില്ല, ആരാധകർ ദൈവമാണെന്നാണ് അദ്ദേഹം പറയുക; വിജയ് സേതുപതിയെ കുറിച്ച് ഗായത്രി

ഏകദേശം അഞ്ചിലധികം ചിത്രങ്ങളിൽ വിജയ് സേതുപതിക്ക് ഒപ്പം ഗായത്രി അഭിനയിച്ചിട്ടുണ്ട്. വിജയ് സേതുപതിയുടെ ആദ്യകാല ചിത്രങ്ങളിൽ ഒന്നായ നടുവുള്ള കൊഞ്ചം പാകത കാണോം മുതൽ അവസാനമിറങ്ങിയ മാമാനിതൻ വരെ ഒരുമിച്ചു പ്രവർത്തിച്ച ഗായത്രി താരത്തെ കുറിച്ച് പറഞ്ഞ വാക്കുകളാണ് ശ്രദ്ധനേടുന്നത്. കൗമുദി മുവീസിന് നൽകിയ അഭിമുഖത്തിലാണ് വിജയ് സേതുപതിയെ കുറിച്ചും അദ്ദേഹവുമായുള്ള സൗഹൃദത്തെ കുറിച്ചും സംസാരിച്ചത്.

'വിജയ് സേതുപതിക്ക് ആരോടും നോ പറയാൻ അറിയില്ല. ആരാധകരൊക്കെ ഫോട്ടോ വേണം എന്നൊക്കെ പറഞ്ഞു വന്നാൽ അദ്ദേഹം അതിനെല്ലാം നിന്ന് കൊടുക്കും. ഹോട്ടൽ റൂമിലേക്ക് വരെ ഫോളോ ചെയ്ത് വരുന്നവരുണ്ട് എന്നാലും അദ്ദേഹം ഫോട്ടോയ്ക്ക് നിന്ന് കൊടുക്കും. ഈ അടുത്ത് മാമനിതൻ എന്ന ഷൂട്ടിങ് നടക്കുമ്പോൾ ഒരു സംഭവമുണ്ടായി. തേനി ജില്ലയിൽ ആയിരുന്നു ഷൂട്ട്. ഷൂട്ടിങ് നടക്കുന്നുണ്ട്. വിജയ് സേതുപതി ഉണ്ട് എന്നൊക്കെ അറിഞ്ഞു അടുത്ത ജില്ലകളിൽ നിന്ന് വരെ ആളെത്തി.'

Also Read: മോഹൻലാൽ അന്ന് ജനപ്രിയൻ, സിൽക് സ്മിതയുടെ വരവോടെ കാര്യങ്ങൾ മാറി മറിഞ്ഞു; സ്ഫടികത്തിൽ സംഭവിച്ചത്

'ഷൂട്ട് തുടങ്ങി മൂന്ന് ദിവസം കഴിഞ്ഞപ്പോഴേക്കും ഷൂട്ടിങ് ലൊക്കേഷനിൽ വലിയ ജനക്കൂട്ടമായി അടുത്ത സ്ഥലങ്ങളിൽ നിന്ന് ബൈക്കിൽ കോളേജ് പിള്ളേരൊക്കെയാണ് വന്നത്. ഇവർ ഷൂട്ട് എല്ലാം ഇൻസ്റ്റഗ്രമിൽ ഇടാൻ തുടങ്ങി. വിജയ് ചെന്ന് അവരോട് സഹകരിക്കണം. നിങ്ങൾക്ക് ഫോട്ടോയൊക്കെ ഞാൻ തരാം എന്ന് പറഞ്ഞു.'

'അങ്ങനെ ഉച്ചയ്ക്ക് ഞങ്ങളൊക്കെ വിശ്രമിക്കുന്ന സമയത്ത് അദ്ദേഹം എല്ലാവർക്കും സെൽഫി കൊടുക്കുകയായിരുന്നു. അദ്ദേഹത്തിന്റെ കാരവാന് പുറത്ത് ഫോട്ടോ എടുക്കാൻ വലിയ ക്യൂ ആയിരുന്നു. ആരെയോ കെട്ടി പിടിച്ചു ഉമ്മ വെച്ച് ഫോട്ടോ എടുത്തപ്പോ എല്ലാവർക്കും അങ്ങനെ വേണം. അങ്ങനെ എല്ലാവരുടെയും ഒപ്പം ഫോട്ടോ എടുത്തു. നിങ്ങൾ നടിമാരെക്കാൾ ആണുങ്ങളെയാണല്ലോ ഉമ്മ വച്ചത് എന്നൊക്കെ ചോദിച്ച് ഞങ്ങൾ കളിയാക്കി. അദ്ദേഹം ആരാധകരെ ദൈവമായാണ് കാണുന്നത്. അങ്ങനെ അവർ വന്ന് ഫോട്ടോ ചോദിക്കുമ്പോൾ എന്തിന് കൊടുക്കാതെ ഇരിക്കണം എന്നാണ് അദ്ദേഹം ചോദിക്കുന്നത്,' ഗായത്രി പറഞ്ഞു.

Also Read: അര്‍ഹതപ്പെട്ടതോ അല്ലതെയോ കിട്ടിയ പത്ത് പതിനാല് അവാര്‍ഡിനെക്കാളും വിലയുണ്ട്; സന്തോഷം പങ്കുവെച്ച് നടി അശ്വതി

തന്റെ സിനിമയിലേക്കുള്ള വരവിനെ കുറിച്ചും ഗായത്രി സംസാരിക്കുന്നുണ്ട്. താൻ വേണമെന്ന് വച്ച് സിനിമയിൽ എത്തിയതല്ല. വെറുതെ വന്ന അവസരമാണ്. സ്‌കൂളിൽ പഠിക്കുമ്പോൾ അവസരം വന്നിട്ട് എല്ലാവരോടും പറഞ്ഞു പോയി അഭിനയിച്ചു. എന്നാൽ ആ സിനിമ ഇറങ്ങിയില്ല. പിന്നീട് ഡിഗ്രി ചെയ്യുമ്പോഴാണ് 18 വയസ് എന്ന സിനിമ വരുന്നതെന്ന് ഗായത്രി പറഞ്ഞു.