'നവ്യാ നായരെ വിവാഹം ചെയ്യാൻ ആ​ഗ്രഹിച്ചിരുന്ന ധ്യാനും, മീര ജാസ്മിനെ സ്നേഹിച്ചിരുന്ന വിനീതും'

അച്ഛന്റെ പാത പിന്തുടർന്ന് മക്കളായ വിനീത് ശ്രീനിവാസനും ധ്യാൻ ശ്രീനിവാസനും സിനിമയിലേക്ക് എത്തിയിരുന്നു. ഇരുവരും അച്ഛനെപോലെ തന്നെ സിനിമയിലെ എല്ലാ മേഖലകളിലും കൈയ്യൊപ്പം പതിപ്പിച്ച് കഴിഞ്ഞു. വിനീത് ഇതുവരെ നാല് സിനിമകളാണ് സംവിധാനം ചെയ്തിട്ടുള്ളതാണ്. നാലും തിയേറ്ററുകളിൽ തരം​ഗമായിരുന്നു. അഞ്ചാമത്തെ സിനിമ ഹൃദയം റിലീസിന് തയ്യാറെടുക്കുകയാണ്. വിനീതിനെ സകലകലാവല്ലഭൻ എന്നാണ് ആരാധകർ വിശേഷിപ്പിക്കുന്നത്. പിന്നണി​ ​ഗായകനായും അഭിനേതാവായും സംവിധായകനായും ഇതിനോടകം പ്രതിഭ തെളിയിച്ചുവെന്നത് തന്നെയാണ് ആരാധകരുടെ ഈ വിളികൾക്ക് പിന്നിലെ കാരണം. ധ്യാനും അഭിനയവും സംവിധാനവും ചെയ്യാറുണ്ട്. വിനീത് സിനിമ തിരയിലൂടെയായിരുന്നു ധ്യാനിന്റെ അരങ്ങേറ്റം. അച്ഛന്റെ പ്രതിഭ ഒട്ടും കുറയാതെ മക്കൾ രണ്ടുപേരിലുമുണ്ടെന്ന് ഇരുവരുടേയും സിനിമകളിൽ നിന്നും വ്യക്തമാണ്.

ഇപ്പോൾ ശ്രീനിവാസന്റേയും കുടുംബത്തിന്റേയും പഴയൊരു അഭിമുഖമാണ് വൈറലാകുന്നത്. കൈരളി ടിവി പ്രേക്ഷകരോട് സിനിമാ, കുടുംബവിശേഷങ്ങൾ പങ്കുവെക്കുന്ന ശ്രീനിവാസനും കുടുംബവുമാണ് വീഡിയോയിലുള്ളത്. അഭിമുഖത്തിനിടെ താൻ നവ്യാനായരെ വിവാഹം ചെയ്യാൻ ആ​ഗ്രഹിച്ചിരുന്നുവെന്ന് ധ്യാൻ വളരെ നിഷ്കളങ്കതയോടെ പറയുന്നത് കാണാം. ഇരുവരും വിദ്യാർഥികളായിരുന്നപ്പോഴുള്ള വീഡിയോയാണ് ഇപ്പോൾ സോഷ്യൽമീഡിയയിൽ തരം​ഗമാകുന്നത്. നവ്യ നായരെ വലിയ ഇഷ്ടമായിരുന്നുവെന്നും വിവാഹം കഴിക്കാൻ ആഗ്രഹം ഉണ്ടായിരുന്നുവെന്നുമാണ് ധ്യാൻ അഭിമുഖത്തിൽ വെളിപ്പെടുത്തുന്നത്. മലയാളത്തിൽ ഇഷ്ടമുള്ള നടിമാർ ആരൊക്കെയാണ് എന്ന് ചേദിക്കുമ്പോഴാണ് നവ്യാനായരെ ഇഷ്ടമായിരുന്നുവെന്ന് ധ്യാൻ വെളിപ്പെടുത്തിയത്. ഒപ്പം ചേട്ടൻ വിനീത് ശ്രീനിവാസന് ഒരിടക്ക് മീര ജാസ്മിനോട് ക്രഷുണ്ടായിരുന്നുവെന്നും തന്നോട് അത് വെളിപ്പെടുത്തിയിട്ടുണ്ടെന്നും ധ്യാൻ പറയുന്നു.

'ഇഷ്ടമുള്ള നടിമാർ ശോഭനയും നവ്യാ നായരും ആയിരുന്നു. ഇപ്പോ അങ്ങനൊന്നുമില്ല. വെള്ളിത്തിരയിലെ ചില പോസ്റ്ററുകൾ കണ്ടതോടെയാണ് നവ്യാ നായരോടുള്ള ഇഷ്ടം പോയത്. വെള്ളിത്തിര കണ്ടപ്പോൾ പൃഥ്വിരാജ് വളരെ ലക്കിയാണെന്ന് തോന്നിയിട്ടുണ്ട്. ഏട്ടന് മീരാ ജാസ്മിനെ ഇഷ്ടമായിരുന്നു. മീരാ ജാസ്മിൻ നിന്റെ ഏട്ടത്തിയമ്മയായി വരുന്നതിൽ കുഴപ്പമുണ്ടോയെന്ന് ഏട്ടൻ ചോദിച്ചിട്ടുണ്ട് എന്നോട്. ഏട്ടന് പക്ഷെ ഇപ്പോ ഇഷ്ടമല്ല. തമിഴിലേക്ക് അഭിനയിക്കാൻ പോയപ്പോൾ മീര ജാസ്മിന്റെ ഇഴുകി ചേർന്നുള്ള അഭിനയം കണ്ടപ്പോഴാണ് ഏട്ടന് മീര ജാസ്മിനെ ഇഷ്ടമല്ലാതെയായത്' ധ്യാൻ പറഞ്ഞു. മോഹൻലാലാണ് ഏറ്റവും പ്രിയപ്പെട്ട നടനെന്നും ധ്യാന്‌ വെളിപ്പെടുത്തി. അദ്ദേഹത്തിന്റെ സിനിമകളാണ് അധികവും കണ്ടിരുന്നതെന്നും അതിനാലാണ് അദ്ദേഹത്തെ ഇഷ്ടപ്പെടുന്നതെന്നും ധ്യാൻ പറഞ്ഞു. വിനീതും സോഹദരൻ ധ്യാനിനെ പോലെ മോഹൻലാൽ ഫാനാണ്.

ചേട്ടനെ പോലെ പാട്ട് പാടാൻ താൽപര്യമുണ്ടോയെന്ന ചോദ്യത്തിന് ഇല്ല എന്നായിരുന്നു ധ്യാനിന്റെ മറുപടി. താൻ അഭിനയത്തെയാണ് സ്നേഹിക്കുന്നതെന്നും ധ്യാൻ വെളിപ്പെടുത്തി. താരകുടുംബത്തിന്റെ വീഡിയോ ഇപ്പോൾ സോഷ്യൽമീഡിയയിൽ വൈറലാണ്. തങ്ങളുടെ ഇഷ്ടാനിഷ്ടങ്ങളെ കുറിച്ചും അച്ഛനോടുള്ള അഭിപ്രായ വ്യത്യാസങ്ങളെ കുറിച്ചുമെല്ലാം ഇരുവരും തുറന്ന് പറയുന്നുണ്ട്. ഇതെല്ലാം നിറഞ്ഞ ചിരിയോടെ ആസ്വദിക്കുന്ന ശ്രീനിവാസനേയും ഭാര്യയേയും അഭിമുഖത്തിൽ കാണാം. മക്കൾക്ക് എല്ലാത്തരത്തിലുള്ള അഭിപ്രായ സ്വാതന്ത്ര്യവും നൽകി വളർത്തിയ നടൻ ശ്രീനിവാസനെയാണ് ആരാധകർ കമന്റുകളിലൂടെ അഭിനന്ദിക്കുന്നത്. അച്ഛന്റെ ചില നിലപാടുകളോടുള്ള തന്റെ അഭിപ്രായ വ്യത്യാസത്തെ കുറിച്ചുമെല്ലാം വിനീത് ആ അഭിമുഖത്തിൽ തുറന്ന് പറഞ്ഞിരുന്നു.

സായാഹ്‌ന വാർത്തകളാണ് ധ്യാനിന്റെ റിലീസ് കാത്തുകിടക്കുന്ന ചിത്രം. നിരവധി ചിത്രങ്ങൾ അണിയറയിൽ ഒരുങ്ങുന്നുണ്ട്. പാതിര കുർബാന, പ്രകാശൻ പറക്കട്ടെ എന്നിവയാണ് അവയിൽ ചിലത്. തിരയിലൂടെ അഭിനയം ആരംഭിച്ച ധ്യാൻ അടുത്തിടെ സംവിധായകനായും അരങ്ങേറിയിരുന്നു. 2019ൽ നിവിൻ പോളിയെ നായകനാക്കി പുറത്തിറക്കിയ ലവ് ആക്ഷൻ ഡ്രാമ എന്ന സിനിമയാണ് ധ്യാനിന്റെ സംവിധാനത്തിൽ പുറത്തിറങ്ങിയ ആദ്യ സിനിമ. നയൻതാരയായിരുന്നു ചിത്രത്തിൽ നായിക. ഹൃദയം ആണ് വിനീത് ശ്രീനിവാസന്റെ ഏറ്റവും പുതിയ ചിത്രം. ഹൃദയത്തിലെ ദർശന ഗാനം കഴിഞ്ഞ ദിവസം പുറത്തിറങ്ങിയിരുന്നു. പ്രണവ് മോഹൻലാൽ, ദർശന, കല്യാണി പ്രിയദർശൻ എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. സംഗീത സംവിധായകൻ ഹേഷം അബ്ദുൽ വഹാബും നായിക ദർശന രാജേന്ദ്രനുമാണ് കഴിഞ്ഞ ദിവസം പുറത്തിറങ്ങിയ ദർശന എന്ന ​ഗാനം ആലപിച്ചത്. ​വൈറലായ ​ഗാനം യുട്യൂബിൽ ട്രെന്റിങാണ്. പാട്ടുസീനിലെ പ്രണവിന്റെ പ്രകടനവും ഭാവങ്ങളുമൊക്കെയാണ് ആരാധകർ ഏറ്റെടുത്തിരിക്കുന്നത്.

Recommended Video

Vineeth Sreenivasan Biography | വിനീത് ശ്രീനിവാസന്റെ ജീവചരിത്രം | FilmiBeat Malayalam

അജു വർഗ്ഗീസ്, ബൈജു സന്തോഷ്, അരുൺ കുര്യൻ, വിജയരാഘവൻ തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. മെറിലാന്റ് സിനിമാസ് ആന്റ് ബിഗ് ബാങ് എന്റർടൈയ്‌മെന്റിന്റെ ബാനറിൽ വൈശാഖ് സുബ്രഹ്മണ്യനാണ് ചിത്രം നിർമിച്ചിരിക്കുന്നത്. ചിത്രത്തിന് തിരക്കഥ ഒരുക്കിയിരിക്കുന്നത് വിനീത് ശ്രീനിവാസൻ തന്നെയാണ്. വിശ്വജിത്ത് ഒടുക്കത്തിൽ ആണ് ചിത്രത്തിന്റെ ഛായാഗ്രഹണം. 2022 ജനുവരിയിലാണ് ചിത്രം തിയേറ്ററുകളിൽ എത്തുക.