'ഷൂട്ടിങിന് പോകുന്നുവെന്നറിയുമ്പോൾ സങ്കടമാണ്, കൂടെയുണ്ടാകണമെന്നാണ് ആ​ഗ്രഹം'

ഒരുപാട് നാളുകൾക്ക് ശേഷം നിവിൻ ഒരു മുഴുനീള കോമഡി എന്റർടെയ്നറിന്റെ ഭാ​ഗമായിരിക്കുന്നു എന്നത് തന്നെയാണ് സിനിമക്കായി ആകാംഷയോടെ പ്രേക്ഷകർ കാത്തിരിക്കാനുള്ള ഒരു പ്രധാന കാരണവും. ഇപ്പോൾ സിനിമയെ കുറിച്ചും സ്വകാര്യ ജീവിതത്തെ കുറിച്ചുമെല്ലാമുള്ള വിശേഷങ്ങൾ പങ്കുവെച്ചിരിക്കുകയാണ് നിവിൻ. തുടക്കം മുതൽ അവസാനം വരെ ചിരിച്ച് സന്തോഷിച്ച് കാണാൻ സാധിക്കുന്ന സിനിമയാണ് കനകം കാമിനി കലഹമെന്നാണ് നിവിൻ പറയുന്നത്. രതീഷ് ആദ്യമായി കഥ പറ‍ഞ്ഞപ്പോഴെ ഒരുപാട് ഇഷ്ടപ്പെട്ടിരുന്നുവെന്നും അതുകൊണ്ടാണ് സിനിമ ചെയ്യാനും നിർമിക്കാനും തീരുമാനിച്ചതെന്നും നിവിൻ പറയുന്നു.

സംവിധായകന്റെ ജീവിതത്തിൽ സംഭവിച്ചിട്ടുള്ള ചില അനുഭവങ്ങളാണ് സിനിമയുടെ കഥയ്ക്ക് പിന്നിലെന്നും നിവിൻ വ്യക്തമാക്കി. അടുത്തിടെ ഇറങ്ങിയ സിനിമകൾ സീരിയസ് കഥാപാത്രങ്ങൾ ആയിരുന്നുവെന്നതുകൊണ്ട് കോമഡി സിനിമ ചെയ്യാൻ തീരുമാനിച്ചതല്ലെന്നും ലഭിക്കുന്ന കഥകളിൽ രസകരമായി തോന്നിയത് ചെയ്യുന്നുവെന്നേയുള്ളൂവെന്നും താരം പറയുന്നു. 'പന്ത്രണ്ട് വർഷത്തോളം നീണ്ട സിനിമ ജീവിതത്തിനിടയിൽ ഏറ്റവും ചലഞ്ചിങ്ങായി തോന്നിയത് മൂത്തോനിലെ കഥാപാത്രമാണ്. ഞാൻ ഷൂട്ടിങിന് പോകുന്നുവെന്ന് പറയുമ്പോൾ മക്കൾക്ക് സങ്കടം വരാറുണ്ട്. അവർക്കൊപ്പം എപ്പോഴും ഞാൻ ഉണ്ടാകണമെന്നാണ് അവരുടെ ആ​ഗ്രഹം. ഞാൻ ഷൂട്ടിങിന് ഇറങ്ങുമ്പോൾ തന്നെ ഞാൻ എന്നാണ് തിരിച്ച് വരിക എന്ന് ചോദിക്കാൻ തുടങ്ങും'

Recommended Video

സ്വർണ്ണം പണയം വെക്കാൻ വീട്ടിൽ ഉണ്ടായ അടി.. വിൻസിയുടെ പൊളി ഇന്റർവ്യൂ..| Filmibeat Malayalam

തമിഴ്നാട്ടിൽ നിന്നടക്കം നിരവധി ആരാധകരുടെ കത്തുകളും മറ്റും ലഭിക്കാറുണ്ടെന്നും നിവിൻ പറയുന്നു. 'പുറത്തൊക്കെ പോകുമ്പോൾ പലരും സ്നേഹം കൊണ്ട് വന്ന് കെട്ടിപ്പിടിക്കാറൊക്കെയുണ്ട്. കൂടാതെ കത്തുകളൊക്കെ വീട്ടിലേക്ക് വരും. പലരും ഫോൺ നമ്പറുകൾ അടക്കം ഉൾപ്പെടുത്തിയാണ് കത്ത് അയക്കാറുള്ളത്. അവരെ തിരിച്ച് വിളിക്കണം, കത്തിന് മറുപടി വേണം എന്നൊക്കെയുള്ള ആവശ്യങ്ങൾ ഉന്നയിച്ചാണ് ആരാധകരുടെ കത്തുകൾ ലഭിക്കുന്നത്' നിവിൻ പോളി പറയുന്നു. നിവിന്‍ പോളിക്ക് പുറമെ ഗ്രേസ് ആന്റണി, വിനയ് ഫോര്‍ട്ട് എന്നിവരും ചിത്രത്തിൽ മറ്റ് പ്രധാന വേഷങ്ങളിലഭിനയിച്ചിരിക്കുന്നു. നിവിന്‍ പോളിയുടെ പോളി ജൂനിയര്‍ പിക്‌ചേഴ്‌സാണ് സിനിമ നിർമിച്ചിരിക്കുന്നത്. കനകം കാമിനി കലഹം കുടുംബപ്രേക്ഷകര്‍ക്ക് ഇഷ്ടപ്പെടുന്ന ചിത്രമായിരിക്കുമെന്നാണ് അണിയറപ്രവർത്തകർ ഉറപ്പ് നൽകുന്നത്. വിചിത്രമായ കഥാപാത്രങ്ങളും വൈവിധ്യമായ നിരവധി സീനുകളും ധാരാളം നര്‍മമുഹൂര്‍ത്തങ്ങളും ചിത്രത്തിലുണ്ടെന്നാണ് ട്രെയിലർ സൂചിപ്പിച്ചത്. മലയാളികള്‍ കാണാന്‍ ഇഷ്ടപ്പെടുന്ന നര്‍മവും അല്പം സസ്‌പെന്‍സും ചിത്രത്തിലുണ്ടെന്നും നേരത്തെ നായകൻ നിവിൻ പോളി പറഞ്ഞിരുന്നു.