'ആ അടി ഞാൻ മേടിക്കേണ്ടത് അല്ലായിരുന്നുവെന്ന് പിന്നീട് എല്ലാവർക്കും മനസിലാകും'; വിൻസി അലോഷ്യസ്

വിൻസിയുടെ കരിയറിലെ രണ്ടാമത്തെ സിനിമയാണ് കനകം കാമിനി കലഹം. നിവിൻ പോളിയാണ് നായകനെന്ന് അറിഞ്ഞപ്പോൾ മൂത്തോനാണ് മനസിലേക്ക് വന്നത്. ആ സിനിമയിലെ നിവിന്റെ പ്രകടനങ്ങൾ മനസിൽ കണ്ടാണ് കനകം കാമിനി കലഹത്തിൽ അഭിനയിക്കാൻ പോയതെന്നും എന്നാൽ തീർത്തും വ്യത്യസ്ഥനായ ഒരു നിവിൻ പോളിയെയാണ് സെറ്റിൽ കണ്ടതെന്നും വിൻസി പറയുന്നു.'മൂത്തോൻ സിനിമയായിരുന്നു സെറ്റിലേക്ക് പോകുമ്പോൾ മനസിൽ. എന്നാൽ നിവിൻ ചേട്ടനോട് സംസാരിച്ചപ്പോൾ അദ്ദേഹം എല്ലാവരോടും സൗഹൃദത്തോടെ സംസാരിക്കുന്ന സപ്പോർട്ടീവായ ഒരാളായിട്ടാണ് അനുഭവപ്പെട്ടത്. സിനിമ നിർമിച്ചിരിക്കുന്നതും നിവിൻ ചേട്ടനാണ്. എന്നാൽ അങ്ങനൊരു പ്രൊഡ്യൂസറായി അദ്ദേഹം ഒരിക്കലും പെരുമാറിയില്ല. നിവിൻ ചേട്ടൻ വളരെ സിമ്പിളും കൂളുമായിട്ടുള്ള വ്യക്തിയാണ്. അദ്ദേഹത്തോട് ദേഷ്യത്തിൽ സംസാരിക്കേണ്ട രം​ഗങ്ങൾ ഷൂട്ട് ചെയ്യുമ്പോൾ മികച്ചത് പുറത്തെടുക്കാനുള്ള ആത്മവിശ്വാസമാണ് നിവിൻ ചേട്ടൻ തന്നത്' വിൻസി പറയുന്നു.

ട്രെയിലറിൽ കാണിക്കുന്ന മുഖത്ത് അടി കിട്ടുന്ന രം​ഗത്തെ കുറിച്ചും വിൻസി വിവരിച്ചു. ​ഗ്രേസ് ആന്റണിയിൽ നിന്നും തനിക്ക് കിട്ടേണ്ട തല്ലായിരുന്നില്ല അത് എന്ന് സിനിമ കാണുമ്പോൾ എല്ലാവർക്കും മനസിലാകും എന്നാണ് ആ രം​ഗത്തെ കുറിച്ചുള്ള ചോദ്യത്തിന് മറുപടിയായി വിൻസി പറയുന്നത്. ​ഗ്രേ് ആന്റണിയുടെ അഭിനയം കണ്ട് അത്ഭുതപ്പെട്ടിട്ടുണ്ടെന്നും വിൻസി പറഞ്ഞു. 'ഗ്രേസ് ശരിയ്ക്കും ആ കഥാപാത്രമായി ജീവിക്കുകയാണ് ചെയ്തത്. അത്തരം സന്ദര്‍ഭങ്ങള്‍ ലൊക്കേഷനില്‍ ഉണ്ടായിട്ടുണ്ട്. ഒരു ഇമോഷന്‍ രംഗം ചെയ്ത് കഴിഞ്ഞ്... ഓകെ കട്ട് എന്ന് പറഞ്ഞ് കഴിഞ്ഞിട്ടും ആ കഥാപാത്രത്തില്‍ നിന്നും പുറത്ത് കടക്കാന്‍ കഴിയാതെ ഗ്രേസ് നിൽക്കുന്ന ഒരു സംഭവം ഷൂട്ടിങിനിടയില്‍ ഉണ്ടായിരുന്നു. ഭയങ്കര ഡെഡിക്കേറ്റഡ് ആണ് ഗ്രേസ്. എനിക്ക് തോന്നുന്നു ഞാന്‍ കൊടുക്കുന്ന എഫേര്‍ട്ടിലും ഒരു 20 ശതമാനത്തില്‍ അധികം എഫേര്‍ട്ട് അവള്‍ കൊടുക്കുന്നുണ്ടെന്ന്. ഗ്രേസിന് അടുത്ത് നില്‍ക്കുമ്പോള്‍ നമുക്കും ആ ഒരു പവര്‍ അനുഭവപ്പെടും. ഷൂട്ടിങിന് ഇടയില്‍ നമ്മളെ സഹായിക്കുകയും ചെയ്യും. മികച്ച നടിയാണ്' വിൻസി പറഞ്ഞു.

പ്രണയമുണ്ടോ എന്ന ചോദ്യത്തിന് എല്ലാത്തിനോടും പ്രണയമുണ്ടെന്നും അത് ഏത് തരത്തിലുള്ളതാണെന്ന് വിവരിക്കാൻ സാധിക്കില്ലെന്നും വിൻസി പറയുന്നു. ആർക്കിടെക്ടായ വിൻസി കോളജ് പഠനകാലത്താണ് നായിക നായകനിൽ പങ്കെടുക്കാൻ എത്തിയത്. നായിക നായകനിലെ മറ്റൊരു മത്സരാർഥിയായിരുന്ന ആഡിസുമായുള്ള വിൻസിയുടെ ഒരു പെർഫോമൻസ് വൈറലായിരുന്നു. കോമഡിയും നന്നായി കൈകാര്യം ചെയ്യുന്ന വ്യക്തിയാണ് വിൻസി. ഇൻസ്റ്റ​​ഗ്രാമിലെ വിൻസിയുടെ റീൽസിന് നിരവധി ആരാധകരാണുള്ളത്.