'സിദ്ധാർഥിന്റെ ജീവിതത്തിൽ വീണ്ടും കയറിപറ്റാൻ സുമിത്രയ്ക്കെതിരെ കരുക്കൾ നീക്കി വേദിക'

സുമിത്രയോട് തീർത്താൽ തീരാത്ത വൈരാ​ഗ്യം വേദികയ്ക്കുണ്ടെന്ന് വിവാഹശേഷം മാത്രമാണ് സിദ്ധാർഥ് മനസിലാക്കിയത്. സുമിത്ര എത്രത്തോളം നല്ലവളായിരുന്നു എന്ന് സിദ്ധാർഥ് മനസിലാക്കിയതും വളരെ വൈകിയാണ്. സുമിത്രയ്ക്കെതിരെയുള്ള വേദികയുടെ നീക്കങ്ങൾ അതിര് കടന്നപ്പോൾ സിദ്ധാർഥ് പലവട്ടം വേദികയ്ക്ക് മുന്നറിയിപ്പുകൾ നൽകുകയും എതിർപ്പ് പ്രകടിപ്പിക്കുകയും ചെയ്തിരുന്നു. എന്നാൽ മാറാൻ വേദിക തയ്യാറായിരുന്നില്ല. സുമിത്രയുടെ ബിസിനസ് തകർക്കാൻ വേദിക പൊലീസ് കേസിൽപ്പെടുത്തി സുമിത്രയെ അകത്താക്കാൻ ശ്രമിച്ചിരുന്നു. ഇത് മനസിലാക്കി സിദ്ധാർഥ് തന്നെയാണ് സുമിത്രയെ സഹായിക്കുന്നതും. ശേഷം വേദിക ഇതിന്റെ പേരിൽ കേസിൽപ്പെടുകയും സിദ്ധാർഥ് വേദികയെ വീട്ടിൽ നിന്നും പുറത്താക്കുകയും ചെയ്തിരുന്നു.

സിദ്ധാർഥ് വീട്ടിൽ നിന്നും പുറത്താക്കിയ ശേഷം ഇതുവരേയും അവിടേക്ക് തിരികെ കയറാൻ വേദികയ്ക്ക് ആയിട്ടില്ല. വേദികയെ പുറത്താക്കിയ ശേഷം സിദ്ധാർഥിന് ആരോ​ഗ്യപരമായ ബുദ്ധിമുട്ടുകൾ നേരിട്ടപ്പോൾ സുമിത്രയാണ് ചികിത്സിക്കാനും ആശുപത്രിയിൽ എത്തിക്കാനും മുന്നിലുണ്ടായിരുന്നത്. അന്ന് മുതൽ സുമിത്രയുടെ യഥാർഥ സ്നേഹം സിദ്ധാർഥ് തിരിച്ചറിയാൻ തുടങ്ങിയിരുന്നു. എന്നാൽ സിദ്ധാർഥ് മറ്റൊരു സ്ത്രീയുടെ ഭർത്താവായതിനാൽ ഒരു വഴിയാത്രക്കാരനോട് കാണിക്കുന്ന സഹതാപവും നീതിയും മാത്രമാണ് സുമിത്ര സിദ്ധാർഥിനോട് കാണിക്കുന്നത്. സിദ്ധാർഥിന്റെ വീട്ടിലേക്ക് കയറാനുള്ള അടവുകളെല്ലാം ചീറ്റിപോയപ്പോൾ ​ഗ​ർഭിണിയാണെന്ന അടവുമായിട്ടാണ് വേദിക പിന്നീട് എത്തിയത്. എന്നാൽ അതും വൈകാതെ സിദ്ധാർഥിന്റെ സ്നേഹിതർ ചേർന്ന് കള്ളമാണെന്ന് കണ്ടെത്തിയതോടെ പൊളിഞ്ഞു.

Recommended Video

Churuli' shown on OTT is not the certified version of the film, says CBFC | Filmibeat Malayalam

വേദിക ​ഗർഭിണിയാണെന്ന് അറിഞ്ഞപ്പോൾ പകുതി മനസോടെ വേദികയെ സ്വീകരിക്കാൻ സിദ്ധാർഥ് തയ്യാറെടുക്കുമ്പോഴാണ് വീട്ടിലേക്ക് തിരികെ വരാനുള്ള വേദികയുടെ അടവാണെന്ന് മനസിലാക്കിയത്. വേദികയുടെ കള്ളങ്ങൾ വിശ്വസിച്ച സരസ്വതിയമ്മയും ശരണ്യയും വരെ വേദികയെ സ്വീകരിക്കാൻ തയ്യാറായി എത്തിയിരുന്നുവെങ്കിലും നുണയാണെന്ന് മനസിലായതോടെ അവരും വേദികയെ കയ്യൊഴിഞ്ഞു. ഇനിയൊരിക്കലും വേദികയെ സ്വീകരിക്കില്ലെന്ന നിലപാടിലാണിപ്പോൾ സിദ്ധാർഥ് ഉള്ളത്. എന്നാൽ വേദിക സുമിത്രയെ വീണ്ടും കള്ളക്കേസിൽ കുടുക്കി തകർക്കാനുള്ള ശ്രമങ്ങളിലാണ്. ഇതിനായി പുതിയ പദ്ധതികൾ ആവിഷ്കരിക്കാൻ വക്കീലിന്റെ സഹായം തേടുന്ന വേദികയെയാണ് പുതിയ പ്രമോയിൽ കാണിക്കുന്നത്. ഏത് വിധേനയും സുമിത്രയെ കുടുക്കണമെന്ന ആവശ്യമാണ് വക്കീലിന് മുമ്പിൽ വേദിക വെക്കുന്നത്. തനിക്ക് സിദ്ധാർഥിന്റെ വീട്ടിൽ കയറിപറ്റുക മാത്രമാണ് ഇപ്പോൾ ലക്ഷ്യമെന്നും വേദിക വക്കീലിനോട് പറയുന്നുണ്ട്. സിദ്ധാർഥ് വീണ്ടും തന്നെ സ്വീകരിക്കാൻ തയ്യാറായില്ലെങ്കിൽ സിദ്ധു സ്നേഹിക്കുന്ന എല്ലാവരേയും താൻ പാഠം പഠിപ്പിക്കുമെന്ന് നേരത്തെ സിദ്ധാർഥിനെ വേദിക താക്കീത് ചെയ്തിരുന്നു.