പ്രേക്ഷക ഹൃദയം കവര്‍ന്ന് ഈ പാട്ടുകള്‍; 2021 ലെ മികച്ച 5 മലയാള ഗാനങ്ങള്‍

2021ല്‍ മലയാളികള്‍ ഒന്നടങ്കം ഏറ്റുപാടിയ ഗാനമായിരുന്നു വെള്ളത്തിലെ ''ആകാശമായവളെ''. നിധീഷ് നടേരിയുടെ വരികള്‍ക്ക് ബിജിബാല്‍ സംഗീതം പകര്‍ന്ന ഗാനം ഷഹബാസ് അമനാണ് ആലപിച്ചത്. ഈ ഗാനത്തിനൊപ്പം തന്നെ ചിത്രത്തിലെ മറ്റു ഗാനങ്ങളും ഏറെ ശ്രദ്ധിക്കപ്പെട്ടിരുന്നു.  

2021ല്‍ പ്രേക്ഷകഹൃദയം കീഴടക്കിയ മറ്റൊരു ഗാനമായിരുന്നു മാലിക്കിലെ ''തീരമേ'' എന്നു തുടങ്ങുന്ന ഗാനം. അന്‍വര്‍ അലിയുടെ വരികള്‍ക്ക് സുഷിന്‍ ശ്യാം സംഗീതം പകര്‍ന്ന ഗാനം കെ എസ് ചിത്രയും സൂരജ് സന്തോഷും ചേര്‍ന്നാണ് ആലപിച്ചത്. പുറത്തിറങ്ങി ചുരുങ്ങിയ സമയത്തിനകം ഗാനം ട്രെന്‍ഡിങ്ങില്‍ ഇടം പിടിക്കുകയും ചെയ്തിരുന്നു.

2021ല്‍ കേരളക്കരയാകെ തരംഗമായി മാറിയ ഗാനമായിരുന്നു ഹൃദയത്തിലെ ''ദര്‍ശനാ'' എന്നു തുടങ്ങുന്ന ഗാനം. റിലീസ് ചെയ്തു നിമിഷങ്ങള്‍ക്കകം യുട്യൂബ് ട്രെന്‍ഡിങ്ങിള്‍ ഒന്നാം സ്ഥാനത്തെത്തിയ ഗാനം ഹിഷാം അബ്ദുള്‍ വഹാബും ദര്‍ശന രാജേന്ദ്രനും ചേര്‍ന്നാണ് ആലപിച്ചത്. അരുണ്‍ ഏലാട്ടിന്റെതാണ് വരികള്‍. ഈ ഗാനമുള്‍പ്പെടെ ചിത്രത്തിലെ 15 ഗാനങ്ങളുടെയും സംഗീത സംവിധാനം നിര്‍വ്വഹിച്ചത് ഹിഷാം അബ്ദുള്‍ വഹാബാണ്.

2021ല്‍ പ്രേക്ഷഹൃദയം കീഴടക്കിയ മറ്റൊരു ഗാനമായിരുന്നു കുറുപ്പിലെ ''പകലിരവുകള്‍''. അന്‍വര്‍ അലിയുടെ വരികള്‍ക്ക് സുഷിന്‍ ശ്യാം സംഗീതം പകര്‍ന്ന ഗാനം നേഹ നായരാണ് ആലപിച്ചത്. ദുല്‍ഖര്‍ സല്‍മാനും ശോഭിത ധൂലിപാലയും ഒന്നിച്ചെത്തിയ ഗാനം ചുരുങ്ങിയ സമയത്തിനുള്ളില്‍ ഹിറ്റ്ചാര്‍ട്ടുകളില്‍ ഇടം പിടിക്കുകയും ചെയ്തിരുന്നു.  

2021ല്‍ കേരളക്കരയും കടന്ന് സൂപ്പര്‍ഹിറ്റായി മാറിയ ഗാനമായിരുന്നു അജഗജാന്തരത്തിലെ ''ഓളുള്ളേരു''. ജസ്റ്റിന്‍ വര്‍ഗീസ് ഈണമിട്ട ഗാനം പ്രശസ്ത നാടന്‍പാട്ടു ഗായിക പ്രസീത ചാലക്കുടിയാണ് ആലപിച്ചത്. സന്തോഷ് വര്‍മയുടേതാണ് വാദ്യം. ഹിന്‍ഷ ഹിലരി, ഹിംന ഹിലരി എന്നിവരാണ് കോറസ് പാടിയിരിക്കുന്നത്.