മലയാളത്തിന്റെ മെഗാസ്റ്റാര്‍; മമ്മൂട്ടിയെ മമ്മൂട്ടിയാക്കിയ അഞ്ച് കാര്യങ്ങള്‍

പുതുമുഖ സംവിധായകര്‍ക്ക് എപ്പോഴും അവസരം നല്‍കുന്ന നടനാണ് മെഗാസ്റ്റാര്‍. പുതുമുഖങ്ങള്‍ക്ക് പുതുതായി എന്തെങ്കിലും പറയാനുണ്ടാകും എന്നതിനാലാണ് അത്തരക്കാര്‍ക്ക് താന്‍ അവസരം കൊടുക്കുന്നത് എന്നാണ് മമ്മൂട്ടി ഇതെക്കുറിച്ച് പറയുന്നത്.ഏതാണ്ട് 70തിലധികം പുതുമുഖ സംവിധായകരാണ് മമ്മൂട്ടിയുടെ സിനിമയിലൂടെ മലയാള സിനിമയിലെത്തിയത്.  

നടനായും, പ്രതിനായകനായും, കാമുകനായും അങ്ങനെയങ്ങനെ വ്യത്യസ്തങ്ങളായ കഥാപാത്രങ്ങളിലൂടെ മലയാളികളെ അമ്പരിപ്പിച്ച മമ്മൂട്ടിക്ക് നെഗറ്റീവ് റോളുകള്‍ ചെയ്യാനാണ് കൂടുതല്‍ താല്‍പര്യം. ചില അഭിമുഖങ്ങളില്‍ അക്കാര്യം അദ്ധേഹം തുറന്നു പറയുകയും ചെയ്തിട്ടുണ്ട്‌.

മലയാള സിനിമയുടെ മെഗാസ്റ്റാറായിട്ടും ഇപ്പോഴും സിനിമയില്‍ ചാന്‍സ് ചോദിക്കുന്ന നടനാണ് മമ്മൂട്ടി. ''സിനിമയോട് അത്രയ്ക്ക് ഭ്രമമാണ്. അതുകൊണ്ട് ചാന്‍സ് ചോദിച്ചു പോകുന്നതാണ്. അതൊരു കുറവായിട്ട് എനിക്ക് ഇപ്പോഴും തോന്നുന്നില്ലെന്നും. ചോദിക്കാതെ ഒന്നും കിട്ടില്ല ''. എന്നുമായിരുന്നു ഇക്കാര്യത്തെക്കുറിച്ച് ചോദിച്ചപ്പോള്‍ മമ്മൂട്ടി പറഞ്ഞത്.

അഭിനയത്തോടൊപ്പം തന്നെ ഡബ്ബിംഗിങ്ങിലും ശ്രദ്ധിക്കുന്ന നടനാണ് മമ്മൂട്ടി. മലയാളം, തമിഴ്, തെലുങ്ക്, ഹിന്ദി, കന്നഡ എന്നീ ഭാഷകളിലായി 400ലധികം സിനിമകളില്‍ അഭിനയിച്ച മെഗാസ്റ്റാര്‍ തന്റെ കഥാപാത്രങ്ങള്‍ക്കെല്ലാം സ്വന്തം ശബ്ദം തന്നെയാണ് നല്‍കിയിരിക്കുന്നത്.

തന്റെ പോരായ്മകളെക്കുറിച്ച് മിക്ക അഭിമുഖങ്ങളിലും മെഗാസ്റ്റാര്‍ തുറന്നു സംസാരിച്ചിട്ടുണ്ട്. അതോടൊപ്പം തന്നെ തന്നെ കളിയാക്കികൊണ്ടുള്ള സ്‌കിറ്റുകളും ട്രോളുകളും മറ്റും ആസ്വദിക്കുന്ന നടന്‍ കൂടിയാണ് അദ്ധേഹം.