മമ്മൂട്ടിയുടെ കരിയര്‍ ബെസ്റ്റോ ? നന്‍പകല്‍ നേരത്ത് മയക്കത്തിന് ഇത്ര കാത്തിരിപ്പ് എന്തിന്‌

പ്രഖ്യാപനം മുതല്‍ സിനിമാപ്രേമികള്‍ ഒന്നടങ്കം കാത്തിരിക്കുകയാണ് നന്‍പകല്‍ നേരത്ത് മയക്കത്തിനായി. വര്‍ഷങ്ങള്‍ക്ക് മുമ്പ് രണ്ടോ മൂന്നോ സിനിമകള്‍ മമ്മൂക്കയുമായി ലിജോ ചര്‍ച്ച ചെയ്തിരുന്നു. പലതും പല കാരണങ്ങള്‍ കൊണ്ടും നടക്കാതെ പോവുകയായിരുന്നു. ഏറ്റവുമൊടുവിലാണ് മമ്മൂട്ടിയെ നായകനാക്കി നന്‍പകല്‍ നേരത്ത് മയക്കം ലിജോ പ്രഖ്യാപിച്ചത്.

മമ്മൂട്ടി കമ്പനി നിര്‍മ്മിച്ച ചിത്രം തിയേറ്ററുകളിലെത്തിക്കുന്നത് ദുല്‍ഖര്‍ സല്‍മാന്റെ വേഫേറര്‍ ഫിലിംസ് ആണ്. ട്രൂത്ത് ഫിലിംസാണ് ചിത്രത്തിന്റെ ഓവര്‍സീസ് റിലീസ് നടത്തുക. മമ്മൂട്ടി കമ്പനിയുടെ പേരില്‍ മമ്മൂട്ടി ആദ്യമായി നിര്‍മ്മിച്ച ചിത്രം കൂടിയാണ് നന്‍പകല്‍ നേരത്ത് മയക്കം.

ജെയിംസ്, സുന്ദരം എന്നിങ്ങനെ രണ്ട് കഥാപാത്രങ്ങളെയാണ് മമ്മൂട്ടി അവതരിപ്പിക്കുന്നത്. വേളാങ്കണ്ണി യാത്ര കഴിഞ്ഞ് മടങ്ങുന്ന ഒരു മലയാളി സംഘം അപ്രതീക്ഷിതമായി ഒരു തമിഴ് ഗ്രാമത്തില്‍ എത്തുന്നതും തുടര്‍ന്നുണ്ടാകുന്നു സംംഭങ്ങളുമാണ് നന്‍പകല്‍ നേരത്ത് മയക്കം അവതരിപ്പിക്കുന്നത്. ചിത്രത്തിലെ കഥാപാത്രത്തില്‍ നിന്നും മമ്മൂട്ടിയെ ഒരിക്കലും മാറ്റിനിര്‍ത്താന്‍ സാധിക്കില്ലെന്ന് ലിജോ ജോസ് പെല്ലിശ്ശേരി തുറന്നു പറഞ്ഞിരുന്നു.

ഇരുപത്തി ഏഴാമത് കേരള അന്താരാഷ്ട്ര ചലച്ചിത്ര മേളയില്‍ ചിത്രം പ്രദര്‍ശിപ്പിച്ചിരുന്നു. എന്നാല്‍ അന്ന് വളരെ കുറച്ച് പേര്‍ക്ക് മാത്രമായിരുന്നു ചിത്രം കാണാന്‍ സാധിച്ചിരുന്നത്. പിന്നാലെ ഇതിനെച്ചൊല്ലി വലിയ പ്രതിഷേധവും നടന്നിരുന്നു. മേളയില്‍ മികച്ച പ്രേക്ഷക ചിത്രമായി നന്‍പകല്‍ നേരത്ത് തിരഞ്ഞെടുക്കപ്പെട്ടിരുന്നു.  

2021 നവംബര്‍ ഏഴിന് വേളാങ്കണ്ണിയില്‍ വച്ചായിരുന്നു സിനിമയുടെ ചിത്രീകരണം ആരംഭിച്ചത്. തമിഴ്‌നാട്ടിലായിരുന്നു സിനിമയിയുടെ ഭൂരിഭാഗം ഷൂട്ടിങ്ങും നടന്നത്. പഴനിയായിരുന്നു പ്രധാന ലൊക്കേഷന്‍. തമിഴ് താരം രമ്യ പാണ്ഡ്യന്‍, അശോകന്‍, കൈനകരി തങ്കരാജ് എന്നിവരാണ് മറ്റു പ്രധാന അഭിനേതാക്കള്‍.