പഠാന് പിന്നാലെ സമ്പത്തിലും കുതിച്ച് ഷാരൂഖ് ഖാന്‍, പിന്നാലെ ബച്ചന്‍; ബിടൌണിലെ കോടീശ്വരന്മാർ

ഷാരൂഖ് ഖാനാണ് നിലവില്‍ ബോളിവുഡിലെ ഏറ്റവും വലിയ സമ്പന്നന്‍. കണക്കുകള്‍ പ്രകാരം 750 മില്യണ്‍ ആണ് കിംഗ് ഖാന്റെ ആകെ ആസ്തി. അതില്‍ മുംബൈയിലുള്ള താരത്തിന്റെ മന്നത്താണ് ഏറ്റവും വില കൂടിയ വസ്തു. 2023ലെ റിപ്പോര്‍ട്ടുകള്‍ അനുസരിച്ച് 200 കോടിയാണ് മന്നത്തിന്റെ വില. കൂടാതെ ഷാരൂഖിന്റെ വാനിറ്റി വാനിന്റെ ഏകദേശ വില അഞ്ച് കോടി രൂപയാണ്. ഏതാണ്ട് 30 മുതല്‍ 40 കോടി വരെയാണ് ഷാരൂഖ് ഒരു ചിത്രത്തിനായി വാങ്ങുന്ന പ്രതിഫലം.

ഷാരൂഖ് ഖാന്‍ കഴിഞ്ഞാല്‍ ബോളിവുഡിലെ ഏറ്റവും വലിയ സമ്പന്നന്‍ അമിതാഭ് ബച്ചനാണ്. വീടുകളും കാറുകളുമായി കോടികളുടെ സ്വത്തുക്കളാണ് ബിഗ് ബിക്കുള്ളത്. പുറത്ത് വരുന്ന റിപ്പോര്‍ട്ടുകള്‍ പ്രകാരം 400 മില്യണ്‍ ആണ് ആകെ ആസ്തി. മുംബൈയില്‍ ഏതാണ്ട് എഴ് ആഢംബര വീടുകളാണ് അമിതാഭിനുള്ളത്.  

ബോളിവുഡില്‍ ഏറ്റവും കൂടുതല്‍ പ്രതിഫലം വാങ്ങുന്ന നടന്മാരില്‍ ഒരാളാണ് സല്‍മാന്‍ ഖാന്‍. സിനിമകള്‍ക്ക് പുറമെ ടെലിവിഷന്‍ അവതാരകനായും തിളങ്ങിയ സല്‍മാന്‍ ഖാന് കോടികളുടെ സ്വത്തുക്കളാണുള്ളത്. മുംബൈയിലെ ഗ്യാലക്‌സി അപ്പാര്‍ട്ട്‌മെന്റ്, പാന്‍വെല്‍ ഫാം ഹൗസ്, ദുബായിലെ വീട്, മഹാരാഷ്ട്രയിലെ ബംഗ്ലാവ് തുടങ്ങി കോടികളുടെ വീടാണ് സല്‍മാന് ഖാന് സ്വന്തമായുള്ളത്. ഇതിനെല്ലാം പുറമെ താരത്തിന് സ്വന്തമായി ഒരു ഉല്ലാസ ബോട്ട് കൂടിയുണ്ട്. 2016ലായിരുന്നു സല്‍മാന്‍ ഉല്ലാസ ബോട്ട് സ്വന്തമാക്കുന്നത്. ഏതാണ്ട് 260 മില്യണ്‍ ആണ് സല്‍മാന്‍ ഖാന്റെ ആകെ ആസ്തി.  

കോടികള്‍ പ്രതിഫലം വാങ്ങുന്ന മറ്റൊരു ബോളിവുഡ് നടനാണ് അക്ഷയ് കുമാര്‍. അഭിനയത്തിനു പുറമെ റിയല്‍ എസ് റ്റേറ്റ് ബിസിനസിലും സജീവമായ അക്ഷയ് കുമാറിന്റെ ആകെ ആസ്തി 250 മില്യണ്‍ ആണ്. ജുഹുവിലെ ബംഗ്ലാവ് കൂടാതെ മൗറീഷ്യസിലും കാനഡയിലും അക്ഷയ് കുമാറിന് വീടുകളുണ്ട്.  

2023ലെ റിപ്പോര്‍ട്ടുകള്‍ പ്രകാരം 340 കോടിയാണ് ആമിര്‍ ഖാന്റെ ആകെ ആസ്തി. ബോക്‌സോഫീസ് ഹിറ്റുകളിലൂടെ കോടിക്കണക്കിന് സ്വത്തുക്കളാണ് ആമിര്‍ ഖാന്‍ സമ്പാദിച്ചത്. അഭിനയത്തിനു പുറമെ പരസ്യ ചിത്രങ്ങളിലും അഭിനയിക്കുന്ന ആമിര്‍ പ്രതിഫലമായി കോടികളാണ് വാങ്ങുന്നത്. ഒരു സിനിമയ്ക്കായി 85 കോടി മുതല്‍ വാങ്ങുന്ന ആമിര്‍ ആ ചിത്രത്തിന്റെ ലാഭവിഹിതവും വാങ്ങുന്നുണ്ടെന്നാണ് റിപ്പോര്‍ട്ടുകള്‍.