മുന്നില്‍ കുതിച്ച് കുടുംബവിളക്ക്, വിട്ടു കൊടുക്കാതെ മറ്റുള്ളവരും; പ്രേക്ഷക മനസ് കീഴടക്കിയ ഏഷ്യാനെറ്റ് പരമ്പരകള്‍

2020 ജൂണ്‍ 22നായിരുന്നു അമ്മയറിയാതെ എന്ന സീരിയലിന്റെ ആദ്യ എപ്പിസോഡ്‌. സംപ്രേഷണം തുടങ്ങി ഒരാഴ്ചക്കുള്ളില്‍ തന്നെ സീരിയല്‍ ശ്രദ്ധിക്കപ്പെട്ടു തുടങ്ങിയിരുന്നു. ശ്രീതു കൃഷ്ണന്‍, നിഖില്‍ നായര്‍, റീന, കീര്‍ത്തി ഗോപിനാഥ് തുടങ്ങി പുതുമുഖങ്ങള്‍ അണിനിരന്ന അമ്മയറിയാതെ നിലവില്‍ 750 എപ്പിസോഡുകള്‍ പിന്നിട്ടുകഴിഞ്ഞു.   

നിലവില്‍ മലയാളത്തിലെ ഏറ്റവും ജനപ്രീതിയുള്ള ടെലിവിഷന്‍ പരമ്പരയാണ് സാന്ത്വനം. ഒരു കൂട്ടുകുടുംബത്തിന്റെ മനോഹരമായ കഥ പറയുന്ന പരമ്പരയില്‍ ചിപ്പിയാണ് കേന്ദ്രകഥാപാത്രമായി എത്തുന്നത്. ഭര്‍ത്താവ് ബാലകൃഷ്‌നും (രാജീവ് പരമേശ്വര്‍) സഹോദരങ്ങള്‍ക്കുമൊപ്പം സന്തോഷത്തോടെ കഴിയുന്ന ശ്രീദേവിയുടെ(ചിപ്പി) കുടുംബത്തില്‍ സഹോദരങ്ങളുടെ വിവാഹത്തോടെ സംഭവിക്കുന്ന അപ്രതീക്ഷിതമായ സംഭവങ്ങളിലൂടെയാണ് പരമ്പര മുമ്പോട്ട് പോവുന്നത്. മികച്ച തിരക്കഥയാണ്  സാന്ത്വനത്തെ ഇത്രയും വലിയ മെഗാഹിറ്റാക്കി മാറ്റിയത്.  

സംപ്രേഷണം തുടങ്ങി ആദ്യ ആഴ്ചക്കുള്ളില്‍ തന്നെ ടെലിവിഷന്‍ പ്രേക്ഷകരുടെ ഇടയില്‍ ഹിറ്റായി മാറിയ പരമ്പരയാണ് കുടുംബവിളക്ക്.   സുമിത്ര എന്ന വീട്ടമ്മയുടെ ത്യാഗത്തിന്റെ കഥ പറഞ്ഞ പരമ്പരയില്‍ മീര വാസുദേവാണ് സുമിത്രയായി എത്തുന്നത്. ഒരു ഘട്ടത്തില്‍ സുമിത്രയെ ഭര്‍ത്താവ് ഉപേക്ഷിക്കുകയും പിന്നീട് സുമിത്ര മികച്ച ബിസിനസ് വുമണാവുകയും ചെയ്യുന്നു. പിന്നാലെ ആദ്യ ഭര്‍ത്താവിന് വീണ്ടും സുമിത്രയോട്‌ ഇഷ്ടം തോന്നുന്നതും തുടര്‍ന്നുണ്ടാകുന്ന സംഭവങ്ങളിലൂടെയുമാണ് പരമ്പര മുമ്പോട്ട് പോവുന്നത്. നിലവില്‍ 780 എപ്പിസോഡുകള്‍ പിന്നിട്ട കുടുംബവിളക്ക് സോഷ്യല്‍മീഡിയയിലും വൈറലാണ്.  

ടെലിവിഷന്‍ പ്രേക്ഷകര്‍ക്കിടയില്‍ ഏറെ ശ്രദ്ധിക്കപ്പെട്ട മറ്റൊരു പരമ്പരയാണ് ഏഷ്യാനെറ്റില്‍ സംപ്രേഷണം ചെയ്യുന്ന മൗനരാഗം. തെലുങ്ക് സീരിയല്‍ മൗനരാഗത്തിന്റെ റീമേക്കായ പരമ്പരയില്‍ ഐശ്വര്യ റംസായ്, നലീഫ് ജിയ എന്നിവരാണ് പ്രധാന കഥാപാത്രങ്ങളായി എത്തുന്നത്. 2019 ഡിസംബര്‍ 16ന് സംപ്രേഷണം ആരംഭിച്ച പരമ്പര നിലവില്‍ 775 എപ്പിസോഡുകള്‍ പിന്നിട്ടുകഴിഞ്ഞു.  

ഏഷ്യാനെറ്റിലെ മറ്റൊരു മെഗാഹിറ്റ് സീരിയലാണ് കൂടെവിടെ. സൂര്യ എന്ന പെണ്‍കുട്ടിയുടെ ജീവിതകഥ പറയുന്ന സീരിയലില്‍ അന്‍ഷിത അഞ്ചിയാണ് പ്രധാന കഥാപാത്രത്തെ അവതരിപ്പിക്കുന്നത്. 2021ല്‍ സംപ്രേഷണം ആരംഭിച്ച സീരിയല്‍ നിലവില്‍ 550 എപ്പിസോഡുകള്‍ പിന്നിട്ട് കഴിഞ്ഞു.