ആദ്യ ചിത്രം സൂപ്പർ ഹിറ്റ്, എന്നിട്ടും സിനിമ ഉപേക്ഷിച്ചു: എവിടെയാണ് ഈ നായികമാർ?

വന്ദനം എന്ന ഒരൊറ്റ ചിത്രത്തിലൂടെ  മലയാളികളുടെ ഹൃദയത്തില്‍ ഇടം നേടിയ അഭിനേത്രിയാണ് ഗിരിജ ഷെട്ടാര്‍. 1989ല്‍ പുറത്തിറങ്ങിയ ഗീതാഞ്ജലി എന്ന തെലുങ്ക് ചിത്രത്തിലൂടെയായിരുന്നു ഗിരിജ വെള്ളിത്തിരയിലെത്തുന്നത്. തുടര്‍ന്ന് മോഹന്‍ലാലിന്റെ നായികയായി വന്ദനത്തിലൂടെ മലയാള സിനിമയിലുമെത്തി. എന്നാല്‍ 2003ല്‍ പുറത്തിറങ്ങിയ തുജേ മേരി കസം എന്ന ചിത്രത്തിനുശേഷം ഗിരിജ സിനിമകളില്‍ അഭിനയിച്ചിട്ടില്ല. നിലവില്‍ പത്രപ്രവര്‍ത്തകയായി ജോലി ചെയ്യുകയാണ് താരം.  

മോഹന്‍ലാല്‍ നായകനായി എത്തിയ ഹലോ എന്ന ചിത്രത്തിലൂടെയായിരുന്നു പാര്‍വതി മില്‍ട്ടന്‍ മലയാള സിനിമയിലെത്തുന്നത്. തുടര്‍ന്ന് 2007ല്‍ തന്നെ ഫളാഷ് എന്ന ചിത്രത്തിലും പാര്‍വതി അഭിനയിച്ചിരുന്നു. തെലുങ്ക് സിനിമയിലൂടെ വെള്ളിത്തിരയിലെത്തിയ പാര്‍വതി പക്ഷേ 2012ല്‍ പുറത്തിറങ്ങിയ യമഹോ യമ എന്ന ചിത്രത്തിനുശേഷം സിനിമയില്‍ നിന്നും വിട്ടുനില്‍ക്കുകയാണ്. വിവാഹശേഷമായിരുന്നു പാര്‍വതി സിനിമയില്‍ നിന്നും ഇടവേളയെടുത്തത്.  

മലയാളത്തിലെ ഹിറ്റ് ചിത്രങ്ങളിലൊന്നായ വെട്ടമായിരുന്നു ഭാവ്‌ന പാനിയുടെ ആദ്യ മലയാള ചിത്രം. ദിലീപിന്റെ നായികയായി എത്തിയ ഭാവ്‌ന ഇന്നും മലയാളികളുടെ പ്രിയപ്പെട്ട നടിയാണ്. വെട്ടത്തിനുശേഷം 2014ല്‍ ആമയും മുയലും എന്ന ചിത്രത്തില്‍ ഐറ്റം ഡാന്‍സറായും താരമെത്തിയിരുന്നു. ഹിന്ദി, കന്നഡ, തെലുങ്ക്, തമിഴ് എന്നീ ഭാഷകളിലും തിളങ്ങിയ ഭാവന 2019ല്‍ പുറത്തിറങ്ങിയ സ്‌പേസ് മോംമസ് എന്ന ഹിന്ദി ചിത്രത്തോടെ അഭിനയം നിര്‍ത്തുകയായിരുന്നു.  

പ്രിയം എന്ന ചിത്രത്തിലൂടെ മലയാളികളുടെ മനസ് കീഴടക്കിയ താരമാണ് ദീപ നായര്‍. എഞ്ചിനീയറിംഗ് പഠിക്കുന്നതിനിടെയായിരുന്നു കുഞ്ചാക്കോ ബോബന്റെ നായികയായി ദീപ മലയാള സിനിമയിലെത്തുന്നത്. എന്നാല്‍ പ്രിയത്തിനുശേഷം പഠനം പൂര്‍ത്തിയാക്കാനായി സിനിമയില്‍ നിന്നും ദീപ വിട്ടുനിന്നിരുന്നു. പിന്നീട് ഇന്‍ഫോസിസില്‍ ജോലി ലഭിച്ചതോടെ സിനിമയില്‍ നിന്നും പൂര്‍ണമായും വിട്ടുനില്‍ക്കുകയായിരുന്നു. നിലവില്‍ കുടുംബത്തോടൊപ്പം ഓസ്‌ട്രേലിയയിലെ മെല്‍ബണിലാണ് താരം.

മമ്മൂട്ടി ചിത്രം പട്ടാളത്തിലൂടെ ശ്രദ്ധിക്കപ്പെട്ട ടെസ തുടര്‍ന്നും മലയാള സിനിമയില്‍ സജീവമായിരുന്നു. എന്നാല്‍ 2017ല്‍ പുറത്തിറങ്ങിയ ഗോള്‍ഡ് കോയിന്‍സിനുശേഷം ടെസ സിനിമകളില്‍ അഭിനയിച്ചിട്ടില്ല. നിലവില്‍ ടെലിവിഷന്‍ സീരിയലുകളിലാണ് ടെസ അഭിനയിച്ചുകൊണ്ടിരിക്കുന്നത്.