വിവാഹമോചനത്തോടെ വിവാഹം തന്നെ വേണ്ടെന്ന് വച്ച നായികമാർ

2011ലായിരുന്നു മംമ്ത മോഹന്‍ദാസും ബിസിനസുകാരനായ പ്രജിത് പദ്മനാഭനും തമ്മിലുള്ള വിവാഹം. ബഹ്‌റെനിലെ സ്‌ക്കൂളില്‍ പ്രജിത്തും മംമ്തയും ഒരുമിച്ചായിരുന്നു പഠിച്ചിരുന്നത്. അതുകൊണ്ടുതന്നെയും ഇരുവരുടെയും കുടുംബങ്ങള്‍ തമ്മിലും വര്‍ഷങ്ങള്‍ നീണ്ട അടുപ്പമുണ്ടായിരുന്നു. എന്നാല്‍ വിവാഹം കഴിഞ്ഞ് ഒരു വര്‍ഷമായപ്പോഴേക്കും ഇരുവരും വിവാഹമോചിതരാവാന്‍ തീരുമാനിക്കുകയായിരുന്നു. വിവാഹമോചനത്തിനുശേഷം സിനിമയില്‍ വീണ്ടും സജീവമായ മംമ്ത ഇപ്പോഴും പുനര്‍വിവാഹം ചെയ്തിട്ടില്ല.  

നീണ്ട ആറു വര്‍ഷത്തെ പ്രണയത്തിനൊടുവില്‍ 1990ലായിരുന്നു സംവിധായകന്‍ പ്രിയദര്‍ശനുമായുള്ള ലിസിയുടെ വിവാഹം. എന്നാല്‍ വര്‍ഷങ്ങള്‍ നീണ്ടു നിന്ന ദാമ്പത്യത്തിനുശേഷം ഇരുവരും 2016ല്‍ വിവാഹമോചിതരാവുകയായിരുന്നു. വേര്‍പിരിയലിനുശേഷവും പ്രിയദര്‍ശന്‍ സിനിമകളുമായി മുന്നോട്ടു പോയപ്പോഴും ലിസി സിനിമയില്‍ നിന്നും വിട്ടു നില്‍ക്കുകയായിരുന്നു. ലിസി രണ്ടാമത് വിവാഹം കഴിക്കുന്നു എന്ന തരത്തില്‍ നിരവധി വാര്‍ത്തകള്‍ തുടര്‍ന്ന് വന്നിരുന്നു. എന്നാല്‍ ഇപ്പോഴും സിംഗിളായി ജീവിക്കുകയാണ് ലിസി.  

2011ലായിരുന്നു ആലപ്പുഴ സ്വദേശിയായ അരുണുമായുള്ള രചന നാരായണന്‍കുട്ടിയുടെ വിവാഹം. എന്നാല്‍ വിവാഹം കഴിഞ്ഞ് ദിവസങ്ങള്‍ക്കുള്ളില്‍ തന്നെ ഇരുവര്‍ക്കുമിടയില്‍ പൊരുത്തക്കേടുകള്‍ ഉണ്ടാവാന്‍ തുടങ്ങി. വെറും 19 ദിവസം മാത്രമാണ് ഇരുവരും ഭാര്യ- ഭര്‍ത്താക്കന്മാരായി ജീവിച്ചത്. പ്രശ്‌നങ്ങളെ തുടര്‍ന്ന് 2012ല്‍ രചന വിവാഹമോചനം നേടുകയായിരുന്നു. തുടര്‍ന്ന് സീരിയലില്‍ അഭിനയിക്കാന്‍ തുടങ്ങിയ രചന പ്രേക്ഷകരുടെ പ്രിയതാരമായി മാറി. നിലവില്‍ സിനിമയില്‍ സജീവമായ രചന ഇപ്പോഴും പുനര്‍വിവാഹം ചെയ്തിട്ടില്ല.  

സിനിമയില്‍ തിളങ്ങി നില്‍ക്കുന്ന സമയത്തായിരുന്നു ദിലീപുമായുള്ള മഞ്ജു വാര്യരുടെ വിവാഹം. തുടര്‍ന്ന് മഞ്ജു സിനിമയില്‍ നിന്നും വിട്ടുനില്‍ക്കുകയും ചെയ്തിരുന്നു. എന്നാല്‍ 2014ല്‍ ഇരുവരും വിവാഹമോചിതരാവുകയായിരുന്നു. പിന്നീട് മഞ്ജു സിനിമയില്‍ സജീവമാകുകയും ചെയ്തിരുന്നു. വിവാഹമോചനത്തിനു പിന്നാലെ ദിലീപ് കാവ്യ മാധവനെ വിവാഹം ചെയ്യുകയും ചെയ്തു. എന്നാല്‍ മഞ്ജു ഇപ്പോഴും സിംഗിളായി തന്നെയാണ് ജീവിക്കുന്നത്.  

2016ലായിരുന്നു സോളോ സ്‌റ്റേജ് ഷോകളിലൂടെ പ്രശസ്തനായ അബീഷ് മാത്യുവുമായുള്ള അര്‍ച്ചന കവിയുടെ വിവാഹം. ശേഷം സിനിമയില്‍ നിന്നും അര്‍ച്ചന വിട്ടു നില്‍ക്കുകയും ചെയ്തിരുന്നു. എന്നാല്‍ 2021ല്‍ ഇരുവരും വേര്‍പിരിയുകയായിരുന്നു. തുടര്‍ന്ന് അര്‍ച്ചന ടെലിവിഷന്‍ സീരിയലുകളില്‍ സജീവമാകുകയായിരുന്നു. സീരിയലുകള്‍ക്കൊപ്പം സോഷ്യല്‍ മീഡിയയിലും, യൂട്യൂബിലും സജീവമായ നടി ഇപ്പോഴും സിംഗിളായി ജീവിക്കുകയാണ്.